Луқа
14 Бир күни шәнбидә у пәрисийләрдин болған башчиниң өйигә чүшлүк ғизаға барди вә өйдикиләрниң барлиғи қадилип, уни байқиди. 2 Шу йәрдә сулуқ ишшиқ кесилигә гириптар бир адәм болғанди. 3 Шунда Әйса тәвратшунаслардин вә пәрисийләрдин: «Шәнбидә давалаш Қанунға уйғунму яки әмәсму?»— дәп сориди. 4 Бирақ улар унчуқмиди. Шу чағда у һелиқи бемарға қолини тәккүзүп, уни сақайтип, йолға салди. 5 Уларға болса у: «Араңларда қайсибириңлар, әгәр униң оғли яки топиғи шәнбә күни қудуққа чүшүп кәтсә, уни дәрру тартип чиқармайду?»— дәп сориди. 6 Улар бу сөзләргә җававән һечнәрсә ейталмиди.
7 Чақирилған меһманларниң өзлиригә төрдин орун таллиғинини байқап, у уларға мундақ мисални кәлтүрди: 8 «Бирси сени той мәрикисигә тәклип қилғанда, төрдики орунда янпашлашқа интилма. Бәлким, мошу вақиттила саһипхан сениңдинму атақлиқ бирсини тәклип қилған болуши мүмкин. 9 У чағда саһипхан йениңға келип: «Бу орунни мону кишигә бәргин»,— дәп қалса, сән шәрмәндичиликтә әң төвән орунға барисән. 10 Әксичә, сени тәклип қилғанда, әң төвән орунда янпашла, шуниң билән чақирған саһипхан саңа келип: «Достум, төригә чиқ»,— дәйду. Шундақ қилип, кәлгән меһманларниң алдида саңа һөрмәт көрситилиду. 11 Чүнки өзини жуқури тутқан киши пәсәйтилиду, әксичә, өзини пәсәйткән киши үстүнлиниду».
12 Андин у саһипханға мундақ деди: «Әгәр сиз чүшлүк яки кәчқурунлуқ зияпәт уюштурғиниңизда йә достлириңизни, йә қериндашлириңизни, йә уруқ-туққанлириңизни, йә бай холум-хошнилириңизни чақирмаң. Чүнки уларму бир вақитта сизни меһманға чақириду вә бу сизгә соғат орнида болиду. 13 Шуңа зияпәт бәргәндә, гадайларни, накаларни, ақсақ-чолақларни, қарғуларни чақириң 14 вә бәхитлик болисиз, чүнки улар сизгә һечнәрсә қайтуралмайду. Һәм сиз һәққанийларниң тирилишидә мукапатлинисиз».
15 Кәлгән меһманларниң арисида бири буни аңлап, униңға: «Худаниң Падишалиғида ғизалинидиған киши бәхитликтур»,— деди.
16 Әйса буниңға мисал кәлтүрди: «Бир киши чоң зияпәтни уюштурушқа қарар қилип, нурғун меһманларни чақирипту. 17 Зияпәтниң вақти кәлгәндә, у қулини чақирилғанларға әвәтип: “Мәрһәмәт, келиңлар, һәммә нәрсә тәйяр болди”,— дәп ейтипту. 18 Бирақ уларниң һәммиси келишивалғандәк бармаслиққа банә тепипту. Бири: “Мән етиз сетивалғандим һәм шуни берип көрүшүм керәк. Илтимас, мени кәчүргин”,— дәпту. 19 Иккинчиси: “Мән бәш қошлуқ өкүз сетивалдим вә уларни синап көрүшүм керәк. Өтүнимән, мени кәчүргин”,— дәпту. 20 Үчинчиси болса: “Мән йеңила өйләнгән едим, шуңа баралмаймән”,— дәпту. 21 Қул қайтип келип, һәммә нәрсини ғоҗайиниға мәлум қипту. Шунда саһипхан ғәзәплинип, қулиға: “Дәрһал шәһәрниң чоң-кичик кочилириға чиқип, гадайларни, чолақларни, корларни вә токуларни мошу йәргә елип кәл!”— дәп буйрупту. 22 Бираз вақиттин кейин қул: “Ғоҗайин, сиз буйриғиниңиз орунланди, лекин техи орунлар бар”,— дәпту. 23 Ғоҗайин қулиға: “Йолларға һәм кичик мәлиләргә барғин вә шу йәрдики адәмләрни өйүм толуши үчүн қайил қилип, елип кәлгин. 24 Ейтимәнки, дәсләптә чақирилғанларниң һечқайсиси мениң зияпитимдин еғиз тәгмәйду”,— дәпту».
25 Әйса билән көплигән хәлиқ маңди вә у бурулуп, уларға: 26 «Әгәр маңа кәлгән киши мени атиси вә аниси, аяли вә балилири, ака-укилири вә һәдә-сиңиллиридин һәм һәтта өз җенидинму артуқ яхши көрмисә, у мениң шагиртим болалмайду. 27 Ким өзиниң азап түврүгини көтирип кәйнимдин маңмиса, у мениң шагиртим болалмайду. 28 Мәсилән, әгәр араңларда бири мунар салмақчи болса, у балдур олтирип, хираҗәтлири мунар селип түгитишкә йетәмду дәп, бар хираҗитини һесаплап чиқмасму? 29 Болмиса, у һулини селип қоюп, қурулушни түгитәлмисә, байқаватқанлар униң үстидин күлүп: 30 “Мону адәм қурулушни башлиди, лекин түгитәлмиди”,— дәйду. 31 Яки бир падиша йәнә бир падишаға қарши җәңгә атлиништин авал олтирип, өзи 10 000 әскири билән униңға қарши 20 000 әскири билән келиватқанни йеңивалалаймәнму дәп, башқилири билән мәслиһәт қилишмамду? 32 Әгәр йеңәлмишигә көзи йәтсә, дүшмини техи жирақ турғанда, униңға әлчилирини әвәтип, течлиқ келишимини сорайду. 33 Демәк, шуни билиңларки, кимду-ким барлиқ мүлкидин айрилалмиса, у мениң шагиртим болалмайду.
34 Туз, әлвәттә, яхши нәрсә. Лекин әгәр туз күчини йоқатса, униңға қандақ қилип, яңливаштин тәм берисән? 35 Әнди у йә топраққа ишлитишкиму, йә оғутқиму яримайду. Уни талаға төкүветиду. Аңлиғидәк қулиғи барлар, аңлисун»,— деди.