Тимотийға 1-хәт
1 Қутқузғучимиз Худаниң ирадиси бойичә вә бизниң үмүтимиз Мәсиһ Әйсаниң әлчиси болған мән Паулдин — 2 етиқаттики һәқиқий оғлум Тимотийға салам.
Рәбб Атимиз вә Һакимдаримиз Мәсиһ Әйсадин саңа мол меһирлик, рәһимдиллик һәм хатирҗәмлик болғай.
3 Македонийәгә йол тутқинимда сени Әфәстә қелишқа дәвәт қилғинимдәк, һазирму шундақ дәймән. Бу шуниң үчүнки, сән бәзилиригә башқа нәрсигә үгитишни тохтитишни тәләп қилғин. 4 Әпсаниләр һәм нәсәбнамиларға артуқчә диққәт бөлмәсликни җекилигин, чүнки улардин һечқандақ пайда йоқ, әксичә, улар етиқат билән бағлиқ Худаниң тәлиминиң тарқитилишиға ярдәмләшмәйду. 5 Бу көрсәтмиләрниң мәхсити — пак жүрәктин, пак виждандин вә иккийүзлүксиз етиқаттин чиққан меһир-муһәббәткә үндәштур. 6 Буниңдин чәтнәп, бирмунчилири қуруқ сөзләргә киришип кәтти. 7 Тәврат қануниниң устазлири болушни халап, лекин ейтиватқан нәрсилириниму вә тиришип тәкитләватқанлириниму һәтта өзлири чүшәнмәйду.
8 Бизгә мәлумки, әгәр Муса қанунини қануний түрдә қолланса, у әҗайиптур. 9 Шуни чүшинимизки, Қанун һәққаний киши үчүн әмәс, бәлки җинайәтчиләр вә беқинмайдиғанлар, рәзилләр һәм гунакарлар, вапасизлар һәм муқәддәс нәрсини булғайдиғанлар, қатиллар, шу қатарда ата-анисини өлтүргүчиләр үчүн орнитилған, 10 шундақла паһишивазлар, әрхумар әрләр, адәм оғрилиғучилар, ялғанчилар, қәсәм бузғучилар вә сағлам тәлиматқа қарши туридиған барлиқ нәрсиләрни қилғучилар үчүн түзүлгәндур. 11 Мәзкүр сағлам тәлимат бәхитлик Худаниң шәрәплик хуш хәвиригә мувапиқ, хуш хәвәр болса, маңа аманәт қилинған.
12 Мени хизмәткә бәлгүләп, садиқ дәп һесаплиған һәм күч бәргән Һакимдаримиз Мәсиһ Әйсаға миннәтдармән. 13 Гәрчә бурун мән Худаға күпүрлүк қилғучи, тәқиплигүчи һәм һакавур болсамму, маңа рәһимлик көрситилди, чүнки мән надан едим вә ишәнмигәнлигимдин мошундақ иш қилған едим. 14 Амма Һакимдаримиз маңа мән лайиқ болмиған рәһимликни көрситип, мән Мәсиһ Әйсадин етиқат вә меһир-муһәббәтни алдим. 15 Мәсиһ Әйса дунияға гунакарларни қутқузуш үчүн кәлгини (шу җүмлидин мән — әң гунакари) дәрһәқиқәт. Мана мошу сөзләр пүтүнләй қобул қилишқа лайиқ һәм һәқтур: 16 маңа рәһимдиллик шуниң үчүн билдүрүлдики, мениң алаһидә вәзийитимдә Мәсиһ Әйсаниң көрсәткән көп чидамлиғи нәқәдәрдур вә униңға ишинип, мәңгү һаятқа еришидиғанларға үлгә болуп қалғуси үчүндур.
17 Мәңгүлүкниң Падишаси, өлмәс, көрүнмәс, бирдинбир Худаға әбәдил-әбәткичә шан-шәрәп һәм шөһрәт болсун. Амин!
18 Бу көрсәтмиләрни, оғлум Тимотий, сениң тоғрилиқ алдин-ала берилгән пәйғәмбәрлик сөзлиригә асасән саңа тапшуримән. Уларға түпәйли сән шавкәтлик җәңни жургизисән.19 Етиқат һәм пак вижданни сақлиғин. Уни бәзиләр рәт қилип, етиқати апәткә учриған кемидәк вәйран болди. 20 Уларниң арисида Һиминей һәм Искәндәр, улар Худаға күпүрлүк қилмаслиқни җаза арқилиқ үгиниши үчүн, мән уларни Шәйтанға тапшурдум.