Аюп
38 Ушбу чағда Йәһва Худа Аюпқа борандин аваз чиқирип, мундақ дәп җавап бәрди:
2 «Ким бу Мениң
Бәлгүлимилиримни араңғулаштурушқа
Билимсиз сөзләр билән урунған?
3 Әрдәк белиңни бағла
Һәм Мән саңа қоюдиған
соалларни чүшәндүргин.
4 Мән йәрни бәрпа қилғанда,
Сән қәйәрдә болдуң?
5 Ким униң өлчәмлирини бәлгүлиди
Вә ким униңға өлчәш
ағамчисини тартти?
6 Униң һули немидә асасланған,
Яки ким униң булуңтешини қойған?
7 Сәһәр юлтузлириниң шатлинишида,
Худаниң оғуллири апирин ейтишқанда, улар қоюлди!
8 Ким деңизни дәрвазилар билән япти,
У кәби қосақтин чиқишқа алдирап, етилған наресидәк еди.
9 Мән уни кийимдәк булутқа
кийдүрүп, туманға уни йөгигәндә,
10 Униң алдида сизиғимни сизип,
Қулуплар билән етип,
дәрвазиларни қойғанда.
11 Мән: “Мәзкүр йәргичә барисән,
андин нери әмәс,
Мошу җайда мәғрур
долқунлириңниң чеки”,— дедим.
12 Өмрүңдә сәһәргә вәсийәт бәрдиңму?
Таңға униң орнини көрсәттиңму,
13 У йәрниң қанатлирини тутуп,
Рәзилләрни силкиветиши үчүндур?
14 Йәр тамғиланған лайдәк өзгирип,
Ушбу шапаәткә пүркиниду.
15 Қанунсиз нурдин мәһрум болиду
Вә егиз көтирилгән булҗуң
сундурулуп, вәйран болиду.
16 Сән деңизниң мәнбәлиригичә
чүшүп йәттиңму?
Һаңниң ичилиридә жүрдүңму?
17 Сениң үчүн өлүмниң
дәрвазилири ечиламду вә
Өлүм сайисиниң қап-қара
ишиклирини көрдүңму?
18 Сәйяриниң кәңлигини көрәләмсән?
Ейт, әгәр буларни билсәң.
19 Йоруқлуқ маканиниң йолини
Вә зулмәтниң орнини тапаламсән?
20 Әгәр сән уларни чегарисигичә
йетәкләп апарсаң вә өйлири
Саңа мәлум болса, ейтқин.
21 Сән шу вақитта туғулдиңму
Вә күнлириң көпсанлиқ үчүн
буни биләмсән?
22 Қарниң амбарлириға бардиңму?
Мөлдүрниң көкәйлирини көрдиңму?
23 Мән уларни қистаң вақит үчүн,
Җәң һәм уруш күнигә сақлаватимән.
24 Нур тарилидиған йоллар нәдә?
Шәрқий шамал учудиған
йөнилиш қәйәрдә?
25 Ким суларға йол бәрмәктә
Вә гүлдүрлигән чақмаққа тохтам?
26 Ким ямғурни қақас зиминға әвәтип,
Адәм йоқ чөлдә төккүзиду?
27 Чөл һәм явайи йәрләрни тойғузуп,
Кокат-гияни өстүриду?
28 Ямғурниң атиси барму?
Ким шәбнәм тамчилирини туғиду?
29 Неминиң қарнидин муз чиқиду,
Асман қирусини ким туғиду?
30 Қачан су һаңиниң үсти
таштәк тоңлайду, сулар
музниң астида йошуруниду?
31 Сән Кима юлтузлириниң
риштилирини бағлаламсән?
Яки Кесил юлтузлириниң боққучлирини йешиветәләмсән?
32 Сән Маззарот түркүмини
өз вақтида ачиқаламсән?
Ас түркүмини оғуллири билән кәйниңдин әгәштүрәләмсән?
33 Әрш қаидилирини тонуп-билдиңму
Вә уларниң йәр үстидин болған һоқуқини тәстиқләләмсән?
34 Авазиңни булутларға көтирәләмсән,
Саңа мол сулар йеғиши үчүн?
35 Чақмақларни әвәтәләмсән,
Улар саңа: “Мана биз”,— дәмду?
36 Ким даналиқни булутлар
қатламлириға салди вә
Сама һадисилиригә әқил бәрди?
37 Кимдә бар булутларни санашқа
даналиқ моҗут,
Ким асман қачилирини төкәләйду?
38 Шу чағда топа-чаң лайға айлинип,
Еритилгән маддидәк еқип,
Йәр топилири даңгал
болушуп чаплишиду.
39 Сән шир үчүн олҗа туталамсән,
Тоймас яш ширларни бақаламсән?
40 Улар мөкүнүшүп орилирида
олтирип, тәйярлиқта ятқанда?
41 Қарғиниң җүҗүлири Тәңригә
ярдәм сорап, вичирлиғанда,
Улар озуқ тапалмай жүргәндә,
Ким қарғиға йәм тәйярлайду,
Сән шуни биләмсән?