Вәһий
12 Андин асманда әҗайип аламәт пәйда болди. Мән қуяшқа кийингән аялни көрдүм, униң аяқ астида ай, бешида 12 юлтуздин ибарәт таҗ болғанди. 2 У һамилдар еди вә толғақ азавидин қийнилип вақиравататти.
3 Шундақла асманда башқа аламәт пәйда болди: йоған, йәттә башлиқ вә он мүңгүзлүк чоғдәк қизил әҗдиһа һәм униң башлирида йәттә таҗ бар еди. 4 Әҗдиһа қуйруғи билән асман юлтузлириниң үчтин бир қисмини сөрәп, уларни йәргә ташлавәтти. Андин, аял бошанған чағда униң балисини жутуветиш үчүн, әҗдиһа аялниң алдиға келип, бошинишини күтүп туратти.
5 У оғул бовақни бошанди, у бала барлиқ хәлиқләрни төмүр қалтиги билән башқуридиған болиду. Аялниң бовиғи дәрһал Худаға вә Униң тәхтигә елип кетилди. 6 Аял болса чөлгә, Худа униң үчүн тәйярлап қойған җайға, қечип кәтти. У йәрдә уни 1260 күн озуқландуруши керәк еди.
7 Асманда җәң башланди: Микаил вә униң пәриштилири әҗдиһаға қарши һәм әҗдиһа вә униң пәриштилириму уларға қарши җәң қилди. 8 Амма әҗдиһа елишалмиди вә уларға асманда әнди җай тепилмиди. 9 Пүткүл аһалилиқ йәрни аздуруватқан һелиқи қедимий илан, Иблис яки Шәйтан дәп атилидиған бүйүк әҗдиһа йәр-зиминға ташланди вә униң билән биллә униң пәриштилириму ташланди. 10 Мән асмандин җараңлиқ авазниң мундақ дегинини аңлидим:
«Әнди Худайимизниң ниҗатлиғи, қудрити, Падишалиғи вә Униң Мәсиһиниң һакимийити намайән болди, чүнки Худайимизниң алдида кечә-күндүз бурадәрлиримизни әйипләватқан Төһмәтхор йәргә ташланди! 11 Улар Қозиниң қени вә өзиниң гувалиқ сөзи һәм һәтта өлүм алдида өз җенини айимиғини билән уни йәңди. 12 Асман вә униңда яшиғучилар хурсән болуңлар! Амма йәр вә деңизниң һалиға вай! Чүнки силәргә Иблис қәһрий ғәзәптә чүшти вә у вақтиниң аз қалғанлиғини билиду».
13 Әҗдиһа йәргә ташланғинини көрүп, оғул бовақни бошанған аялни тәқипләшкә башлиди. 14 Лекин аялға чөлдә тәйярлап қоюлған җайға учуп кетиши үчүн, бүркүтниң йоған икки қанити берилди. Уни иланниң көзидин жирақ җайда вақит, вақитлар һәм йерим вақит давамида озуқландуриши лазим.
15 Шу чағда илан аялниң чөкүп кетиши үчүн, униң кәйнидин еғизидин суни дәриядәк пүркиди. 16 Амма йәр аялға ярдәмгә кәлди: йәр ағзини ечип, әҗдиһаниң еғизидин чиқирилған дәрияни жутувәтти. 17 Әҗдиһа аялға дәрғәзәплинип, Худаниң вәсийәтлиригә әмәл қиливатқан һәм Әйса һәққидә гувалиқ паалийитини жүргүзүш тапшуруғини алған әвладиға қарши уруш башлиди.