Тимотийға 1-хәт

4 Лекин роһландурулған сөзләр шуни ениқ ейтидуки, кейинки вақитларда бәзиләр җинларниң езиқтуридиған тәлимлирини һәм роһланған сөзлирини тиңшап, етиқатидин таниду. 2 Бу ялған сөзләватқанларниң иккийүзлүгидин, гоя шуларниң вижданида қизиқ тамға бесилғандәк болғини үчүн йүз бериду. 3 Улар некалинишни мәнъий қиливатиду вә етиқатни һәм һәқиқәтни тоғра билидиғанлар миннәтдарлиқ билән ғизалиниши үчүн Худа яратқан таамларни истимал қилмаслиққа мәҗбурлаватиду. 4 Пәрвәрдигарниң һәрқандақ яратмиси гөзәлдур һәм әгәр шүкүр билән қобул қилинса, һечнәрсә рәт қилинмаслиғи лазим, 5 сәвәви, ғиза Худаниң сөзи һәм дуа билән муқәддәслиниду.

6 Қериндашларға бу мәслиһәтләрни берип, сән топ-тоғра әмәл қиливатқан гөзәл тәлимат һәм етиқат сөзлири билән озуқлиниватқан Мәсиһ Әйсаниң үлгилик хизмәтчиси болисән. 7 Муқәддәсликни булғайдиған момайларниң әпсанилирини рәт қил. Әксичә, Худаға вапа болушқа интилип, буниңда мәшиқләнгин. 8 Чүнки бәдәнни мәшиқләндүрүш азирақ пайда әкелиду, Худаға болған вапалиқ һәммә нәрсә үчүн пайдилиқтур, сәвәви у һазирқи һәм кәлгүси өмүргә тәәллуқ вәдидин ибарәт. 9 Бу сөзләр һәқ вә пүтүнләй қобул қилишқа әрзийду. 10 Һәрқандақ адәмләрниң, болупму садиқларниң Қутқузғучиси, тирик Илаһқа өз үмүтимизни артқанлиғимиздин, биз һәм әмгәк қиливатимиз, һәм күч чиқириватимиз.

11 Бу көрсәтмиләрни беришни һәм мошуниңға үгитишни давамлаштурғин. 12 Һечким сени яш дәп камситмисун. Амма садиқлар үчүн гепиңдә, жүрүш-турушиңда, меһир-муһәббитиңдә, етиқатиңда вә паклиғиңда үлгә-ибрәт болғин. 13 Мән кәлгичә, башқилар үчүн җан-дилиң билән үнлүк оқушни, дәвәт қилишни, тәлим беришни давамлаштур. 14 Ақсақаллар кеңиши саңа қоллирини қоюп, сениң тоғрилиқ алдин берилгән бәшарәт бойичә алған соғаңни көзгә илмай жүрмә. 15 Сениң роһий утуқлириң һәммисигә рошән болуши үчүн, бу һәққидә мулаһизә қил һәм буниңға пүтүнләй киришкин. 16 Дайим өзәңгә бақ һәм қандақ тәлим бериватқиниңға диққәтлик бол. Мошуниңда болғин, чүнки шундақ қилғиниңда, өзәңниму вә сени тиңшаватқанларниму қутқузисән.