Мәтта
10 Әйса он икки шагиртини чақирип, уларға җинларни һайдиши һәм һәрхил кесәлләрни сақайтиши үчүн, напак роһлар үстидин һоқуқ бәрди.
2 Мана 12 әлчиниң исимлири: Петрус дәп атилидиған Симун һәм униң иниси Әндәр; Яқуп вә униң иниси Йоһан — Зәбәдийниң оғуллири; 3 Филип вә Бартоломай*; Томас вә селиқчи Мәтта*; Һалпайниң оғли Яқуп вә Тадай*; 4 Симун Кананит һәм кейинәрәк Әйсаға сатқунлуқ қилған Йәһуда Ишқарийот.
5 Әйса мошу 12ни әвәтип, уларға монуларни буйриди: «Башқа хәлиқләргә апиридиған йол билән маңмаңлар һәм самарийәликләрниң шәһәрлиригә кирмәңлар, 6 бәлки Исраил өйиниң жүтүп кәткән қойлириға бериңлар. 7 Маңғач вәз қилип: “Асман Падишалиғи йеқинлашти!”— дәңлар. 8 Ағриқларни сақайтиңлар, өлгәнләрни тирилдүрүңләр, мохоларни тазилаңлар, җинларни қоғлаңлар. Бекарға алдиңларму — бекарға бериңлар. 9 Бәлбеғиңлардики қапчуқларға йә алтун, йә күмүч, йә мис салмаңлар 10 һәм өзәңлар билән йолға йә ғоҗун, йә артуқ көйнәк, йә аяқ-кийим, йә һаса таяқ алмаңлар, чүнки әмгәкчи ризқисиға мунасиптур.
11 Қайсила шәһәр яки йезиға кирсәңлар, лайиқ кишиләрни издәп тепиңлар һәм кәткичә шу җайда болуңлар. 12 Өйгә киргәндә, өй ичидикиләргә течлиқ тиләңлар. 13 Әгәр әшу өй-макан лайиқ болса, силәр униңға тилигән течлиқ-аманлиқ униңға келиду, әксичә һаләттә, тилигән аманлиғиңлар өзәңларға қайтиду. 14 Әгәр бир йәрдә силәрни қобул қилмиса яки сөзлириңларни тиңшимиса, шу өйдин яки шәһәрдин чиққач, айиғиңлардики топини қеқиветиңлар. 15 Силәргә һәқни ейтай: Сот күни мошу шәһәргә қариғанда, Садом һәм Гамора йеригә оңайарақ болиду.
16 Мән силәрни бөриләрниң арисиға әвәтилгән қойлардәк әвәтиватимән, шуңлашқа иланлардәк еһтиятчан һәм кәптәрләрдәк аддий болуңлар. 17 Адәмләрдин пәхәс болуңлар, чүнки улар силәрни сотларға тутуп бериду вә өз ибадәтханилирида қамчилайду. 18 Мән үчүн силәр һакимлар вә падишалар алдиға уларға һәм башқа хәлиқләргә гувалиқ беришкә апирилисиләр. 19 Силәрни сотларға тартқанда, қандақ һәм немә җавап бериштин әнсиримәңлар, сәвәви, шу вақитта немә дәйдиғиниңлар силәргә несип қилиниду. 20 Чүнки бир силәр җавап бәрмәйсиләр, бәлки Атаңларниң роһиму силәр арқилиқ сөзләйду. 21 Ака укиға, ата балиға һәм балилири ата-анисиға қарши чиқип, уларни өлүмгә тутуп бериду. 22 Һәммиси мениң исмим үчүн силәрни өч көрүдиған болиду, амма ким ахириғичә туруп қалса, шу қутқузулиду. 23 Силәрни бир шәһәрдә тәқиплисә, башқа бир шәһәргә қечиңлар. Силәргә һәқни ейтиватимәнки: силәр Исраилниң барлиқ шәһәрлирини арилап чиққичә, инсан Оғли келиду.
24 Шагирт өз устазидин һәм қул өз егисидин үстүн әмәс. 25 Шагиртқа устазидәк һәм қулға униң егисидәк болуш йетәрликтур. Әгәр өйниң егисини Баалзәбул* дәп атиған болса, униң өйидикиләрниму шундақ атимамду? 26 Улардин қорқмаңлар! Чүнки ашкарә болмайдиған йошурун һечнәрсә һәм рошән болмайдиған мәхпий һечнәрсә болмайду. 27 Қараңғулуқта силәргә ейтиватқинимни йоруқлуқта сөзләңлар һәм пичирланған нәрсини өгүзләрдин җакалаңлар. 28 Һәм тәнни өлтүрүп, җанни өлтүрәлмәйдиғанлардин қорқмаңлар, әксичә, җениңларниму һәм тениңларниму җәһәннәмдә һалак Қилғучидин қорқуңлар! 29 Икки қушқачни бир ушшақ тийинға сетивалғили болиду? Шундақ болсиму, уларниң һечқайсиси Атаңларниң хәвирисиз йәргә жиқилмайду. 30 Силәрниң болса, һәтта бешиңлардики чечиңларму санақлиқ. 31 Шуңлашқа қорқмаңлар: силәр көплигән қушқачлардинму қиммәтликтур.
32 Адәмләр алдида мениң билән бирлигини етирап қилған һәрбир кишини мәнму асмандики Атам алдида етирап қилимән, 33 амма адәмләр алдида мәндин ваз кәчкән кишидин мәнму асмандики Атам алдида ваз кечимән. 34 Мени йәргә течлиқ әкәлгили кәлди, дәп ойлимаңлар. Мән течлиқ әмәс, бәлки қилич әкәлгили кәлдим. 35 Чүнки мән оғлини атисидин, қизини анисидин һәм келинни қейинанисидин айриветишкә кәлдим. 36 Адәмниң өйидикилири униң дүшмәнлири болиду. 37 Ким атисини яки анисини мениңдин артуқ қәдирлисә, у маңа лайиқ әмәс. Ким оғлини яки қизини мениңдин артуқ қәдирлисә, у маңа лайиқ әмәс. 38 Ким өзиниң азап түврүгини көтирип, изимдин маңмиса, маңа лайиқ әмәстур. 39 Ким өз җенини сақлиса, уни йоқитип қойиду, әксичә, ким өз җенини мән үчүн йоқатса, уни сақлап қалиду.
40 Силәрни қобул қилғанлар, мениму қобул қилған болиду, мени қобул қилғанлар болса, мени Әвәткүчиниму қобул қилған болиду. 41 Пәйғәмбәрни, у пәйғәмбәр болғанлиғи үчүн, қобул қилғанлар пәйғәмбәрдәк мукапатқа еришиду һәм һәққаний инсанни униң һәққанийлиғи үчүн қобул қилғанлар һәққанийдәк мукапатқа еришиду. 42 Силәргә һәқни ейтимәнки, ким мошу әрзимәсләр арисидин бирәрсигә униң шагиртлиғи үчүн бир чинә соғ су бәрсә, шу киши өз мукапитини йоқатмайду».