Вәһий
16 Мән һәрәмдин қаттиқ аваз йәттә пәриштигә: «Бериңлар вә йәттә қачиға толған Худа ғәзивини йәргә төкүңлар»,— дегинини аңлидим.
2 Биринчи пәриштә берип, қачини йәргә төкти. Шу чағда жиртқуч һайванниң бәлгүси бар вә униң тәсвиригә ибадәт қилған кишиләрдә ағритидиған вә жириңлиған хәтәрлик ярилар пәйда болди.
3 Иккинчи пәриштә қачини деңизға төкти. Деңиз өлүкниң қениға охшаш қанға айланди вә деңиздики һәрқандақ тирик җан өлди.
4 Үчинчи пәриштә қачини дәрияларға вә су мәнбәлиригә төкүведи, уларму қанға айланди. 5 Шуниңдин кейин су үстидин һоқуқдар пәриштиниң мундақ дегинини аңлидим: «Һазир вә әзәлдин Бар Болғучи, вападар Пәрвәрдигар — Сән адил, чүнки мошундақ һөкүмләрни чиқардиң. 6 Улар муқәддәсләрниң һәм пәйғәмбәрләрниң қенини төккәнлиги үчүн, Сән уларға қан ичкүздиң. Улар буниңға лайиқ». 7 Қурбангаһниңму: «Раст, Һәммигә Қадир Йәһва Худа, Сениң һөкүмлириң тоғра вә адилдур»,— дегинини аңлидим.
8 Төртинчи пәриштә қачини қуяшқа төкти вә қуяшқа адәмләрни от билән көйдүрүш рухсәт қилинди. 9 Адәмләрни күчлүк аптап көйдүрди, лекин улар мошу апәтләрниң үстидин һоқуқи болған Худаниң исмини қарғиди. Улар товва қилмиди вә Униңға һәмдусәна ейтмиди.
10 Бәшинчи пәриштә қачини жиртқуч һайванниң тәхтигә төкти, шу чағда униң падишалиғи қараңғулуққа чөмди. Кишиләр ағриқтин тиллирини чишләшти, 11 лекин өз ишлириға товва қилмиди, ағриқлири вә хәтәрлик жириң ярилири үчүн асмандики Худани қарғашти.
12 Алтинчи пәриштә қачини бүйүк Фират дәриясиға төкти вә униңдики су шәриқ Падишалириға йол тәйяр болуши үчүн қуруп кәтти.
13 Мән әҗдиһаниң ағзидин, жиртқуч һайванниң ағзидин вә сахта пәйғәмбәрниң ағзидин пақиларға охшаш үч напак хәвәрниң чиқиватқанлиғини көрдүм. 14 Бу сөзләр җинлардин илһамланған болуп, карамәт-аламәтләрни көрсәтмәктә. Улар Һәммигә Қадир Худаниң улуқ күнидә болудиған урушқа жиғиш үчүн, пүткүл йәрниң падишалириға йол тутмақта.
15 «Мана, оғридәк келиватимән! Ким ялиңач болмай, уятқа қалмаслиғи үчүн һошияр болуп, өзиниң кийимини сақлап қалса, шу бәхитликтур».
16 Улар ибранийчә Һар-Магедон дәп атилидиған җайға падишаларни топлиди.
17 Йәттинчи пәриштә қачини һаваға төкти. Һәрәм тәхтидин: «Орунланди!»— дегән қаттиқ аваз чиқти. 18 Шуан чақмақлар чеқип, авазлар чиқип, һава гүлдүрләп, бүйүк йәр тәврәш йүз бәрди. Мошундақ күчлүк йәр тәврәш инсанлар зиминда пәйда болушидин бери болмиған еди. 19 Бүйүк пайтәхт үч қисимға бөлүнди вә хәлиқләрниң барчә шәһәрлири вәйран болди. Худа Бүйүк Бабилни әскә алди вә Өзиниң қәһрий дәрғәзәп шаравиға толған қәдәһини униңға бәрди. 20 Һәрқандақ арал йоқиди вә тағларму ғайип болди. 21 Асмандин еғирлиғи 20 килограммдәк қаттиқ мөлдүр адәмләргә төкүлди вә инсанлар бу мөлдүр үчүн Худани қарғиди, чүнки бу апәт наһайити еғир болди.