Римлиқларға
15 Биз, күчлүкләр, өзүмизни ойлимастин, күчсизләрниң аҗизлиқлирини көтиришимиз керәк. 2 Һәрбиримиз өз йенимиздикиниң пайдисиға уни мустәһкәмләш үчүн, разилиғини тапайли. 3 Чүнки Мәсиһму өзини ойлимиған, бирақ йезилғинидәк: «Сени һақарәтлигәнләрниң һақарәтлири мениң үстүмгә чүшти». 4 Авал йезилғанларниң һәммиси Муқәддәс Язмилардин тәссәлли елиш һәм тәқабиллиғимиз түпәйлидин үмүтимиз болуши үчүн, бизниң нәсиһәт қилинишимизға йезилған еди. 5 Тәқабиллиқ вә тәссәлли беридиған Худаниң арқисидин силәрдиму Мәсиһ Әйсада болған ой-пикирләр тәрзи болсун. 6 Буниң билән силәр бирликтә, бир еғиздин, Худани һәм Һакимдаримиз Әйса Мәсиһниң Атисини мәдһийиләңлар.
7 Шуңа Худаниң шан-шәрипигә Мәсиһ силәрни шат-хорам қобул қилғандәк, бир-бириңларни шат-хорам қобул қилиңлар. Мундақ қилип, силәр Атимизни улуқлайсиләр. 8 Шуни ейтимәнки, Худаниң һәқлигигә гувалиқ беришкә һәм У бурун әҗдатлиримизға бәргән вәдилирини тәстиқләш үчүн, Мәсиһ хәтнә қилинғанларниң хизмәтчиси болди. 9 Һәм башқиму хәлиқләр Пәрвәрдигарниң рәһим-шәпқәтлигини улуқлиши үчүн: «Шуңлашқа хәлиқләр арисида Сени очуқ етирап қилимән вә Сениң исмиңни саз билән мәдһийиләймән», дәп Муқәддәс Язмиларда йезилған. 10 Йәнә мундақ дәйду: «Хәлиқләр, Униң хәлқи билән биллә шат-хорам болуңлар». 11 Йәнә: «Барлиқ хәлиқләр, Йәһвани мәдһийиләңлар, Уни һәммә қәбилиләр махтисун!» 12 Йәшая пәйғәмбәр болса, мундақ дәйду: «Йишайниң йилтизи пәйда болиду һәм у хәлиқләрни башқуруш үчүн көтирилинип чиқиду. Униңға хәлиқләр өз үмүтини артиду». 13 Силәр үмүттә муқәддәс роһниң қудритиниң молчилиғида болушуңлар үчүн, үмүт мәнбәси — Худа силәрни етиқатиңлар арқилиқ толуқ шатлиқ вә хатирҗәмликкә толтурғай.
14 Мән өзәмму, бурадәрләр, силәр тоғрисида шу нәрсигә ишинимәнки, силәр изгүлүк көрситишкә тәйяр, чүнки толуқ билимгә йәттиңлар һәм бир-бириңларни үгитәләйсиләр. 15 Амма бәзибир мәсилиләр һәққидә, Худа маңа көрсәткән инайәт түпәйлидин әсләткән болуп, силәргә ошуғирақ уттурлуқ билән йезиватимән. 16 Муқәддәс роһ билән хасийәтләнгән һәдийә — башқа хәлиқләр лайиқ болуши үчүн, мән Мәсиһ Әйсаниң хизмәтчиси болуп бәлгүлинип, башқа хәлиқләргә Худаниң хушхәвәрлик муқәддәс ишини қиливатимән.
17 Шуниң үчүн Рәббимгә қилған хизмитимгә тәәллуқ мәсиһийдәк хошал болумән. 18 Башқа хәлиқләр итаәтчан болуши үчүн, мән пәқәт Мәсиһ мениң арқилиқ қилған ишларни ейтимән. Сөзлирим вә әмәллирим, 19 карамәтләр вә мөҗүзиләрниң күчи, муқәддәс роһниң қудрити билән Йерусалимдин башлап та Иллирик өлкисигичә йетип, мән Мәсиһ тоғрисидики хуш хәвәрни асаслиқ вәз қилдим. 20 Униң үстигә, мән башқа һулниң үстидә қурмаслиқ, йәни Мәсиһниң исмини билидиған җайларда хуш хәвәрни җакалимаслиқни мәхсәт қилдим, 21 чүнки Язмиларда йезилғанғу: «Униң һәққидә хәвәрсиз болғанлар — көриду, аңлимиғанлар — чүшиниду».
22 Мана мошу сәвәптин, йениңларға бериш арминим көп қетим әмәлгә ашмиди. 23 Әнди болса, мошу әтрапларда мән тәгмигән җайлар қалмиғанда һәм нәччә жил бойи силәргә келишни интайин халиғанлиғимдин, 24 Испанияға маңғанда йолда силәр билән көрүшишимгә һәм азирақ болсиму муамилимизгә хошал болғандин кейин, силәр мени узитип қоюшуңларға наһайити үмүтлинимән. 25 Һазир болса, мән Йерусалимға муқәддәсләрниң хизмитидә болушқа кетиватимән, 26 чүнки Македонийә вә Ахаяда яшаватқан қериндашлар Йерусалимдики муқәддәсләрниң арисидики кәмбәғәллиригә ианә топлап, өз мүлки билән ихтиярий бөлүшти. 27 Раст, улар гәрчә муқәддәсләрниң қәриздарлири болсиму, буни ихтиярий хурсәнликтә қилди. Сәвәви, әгәр башқа хәлиқләр уларниң роһий байлиқлиридин һөзүрләнсә, у чағда уларму тәнгә һаҗәтлик нәрсиләр билән уларға хизмәт қилиши керәк. 28 Мән улар үчүн жиғилғанларни аман-есән йәткүзгәндин кейин, силәрниң өлкилириңлар арқилиқ Испанияға кетимән. 29 Шундақла Мәсиһниң мәрт бәрикәтлири билән силәргә баридиғанлиғимни билимән.
30 Әзизлирим, Һакимдаримиз Әйса Мәсиһ вә муқәддәс роһниң меһир-муһәббити билән силәрдин өтүнүмәнки, Худаға мениң билән мән үчүн дуа қилишта тиришиңлар. 31 Мән Йәһудийәдики етиқат қилмиғанлардин қутулай һәм Йерусалимдики хизмитим муқәддәсләргә лайиқ болсун. 32 Шу чағда Худа ирадиси бойичә силәргә хурсәнлик билән келип, биргә тәскин тапайли. 33 Течлиқ бәргүчи Егимиз һәммиңлар билән биллә болғай. Амин!