Малаки
3 «Мән Өз хәвәрчимни әвәтимән һәм у алдимда йолни түзләйду. Андин силәр издәватқан һәқиқий Пәрвәрдигар туюқсиз Өз ибадәтханисиға келиду. Шундақла силәр тәшна болуватқан келишим хәвәрчисиму келиду. У чоқум келиду!»— дәйду Йәһва, қошунлар Худайи.
2 «Лекин униң келиш күнини ким көтирәләйду вә у кәлгәндә, ким путида туруп қалалайду? Чүнки у еритқучиниң отидәк вә жуйғучиниң аччиқ совунидәк болиду. 3 У күмүчни тазилаватқан еритқучидәк олтирип, Ләвийниң оғуллирини тазилайду. У уларни алтун һәм күмүчтәк тазилап, улар Йәһва үчүн қурбанлиқни һәққанийлиқта әкелидиған хәлиқ болиду. 4 Шу чағда Йәһудия билән Йерусалимниң қурбанлиғи Йәһва үчүн кәби жирақтики заманда вә қедимдики күнләрдә тәғдим қилинған һәдийәләрдәк йеқимлиқ болиду.
5 Мән силәрни сотлашқа келимән вә вақ қалмай җодигәрләр вә нека вападарлиғини бузуватқан, ялған қәсәмләрни бериватқан, яллиған ишчилирини алдаватқан вә тул аяллар билән житимларни езиватқан, мусапирларға ярдәм қилиштин баш тартиватқанларға қарши чиқимән. Улар Мәндин зади қорқмайду»,— дәйду Йәһва Сәрдар.
6 «Мән — Йәһва болғанлиқтин, һеч өзгәрмәймән. Шуңлашқа силәр — Яқуп оғуллири болғанлиғиңлардин һалак болуп, йоқимидиңлар. 7 Атилириңларниң дәвридин тартип силәр Мениң тохтамлиримдин чекиндиңлар вә уларни сақлимидиңлар. Маңа қайтиңлар, шу чағда Мәнму силәргә қайтимән»,— дәйду Йәһва Сәрдар.
Лекин силәр: «Биз өз орнимизда, немишкә биз қайтишимиз керәк?»— дәйсиләр.
8 «Адәм балиси Худани оғриламду? Бирақ силәр Мени оғрилаватисиләр». Силәр: «Биз немини Сениңдин оғрилаватимиз?»— дәп сораватисиләр.— «Онлуқларни, қурбанлиқларни һәм ианиләрни. 9 Силәр ләнәткә учриғанлар, чүнки силәр Мени оғрилаватисиләр, һалбуки, пүткүл хәлиқ. 10 Барчә онлуқларни амбарларға әкелиңлар, Мениң өйүмдә дайим озуқ болсун. Шуңдақ қилип, мәрһәмәт, Мени синап көрүңлар,— дәйду Йәһва Сәрдар.— Силәр шуни байқайсиләрки, Мән силәр үчүн асман деризилирини ечип, силәргә бәрикәтләрни мол төкимән».
11 «Мән һәммини қиритидиған һашарәтләргә йериңларниң һосулини йәветишкә вә етизиңлардики үзүм ғолиниң мевисиз қелишиға йол қоймаймән»,— дәйду Йәһва Сәрдар.
12 «Һәммәйлән хәлиқләр силәрни бәхитлик, дәп атайду, чүнки силәрниң зиминиңлар әҗайип илтипат йери болиду!»— дәп вәдә қилиду Йәһва Сәрдар.
13 «Силәрниң сөзлириңлар Мән үчүн һақарәтликтур»,— дәйду Йәһва. Силәр болсаңлар: «Немә дәп, биз Сени һақарәтләватимиз?»— дәйсиләр.
14 «Силәр: “Худаға хизмәт қилиш — бекар әмгәк. Биз өз вәзипилиримизни Униң алдида орунлап, Йәһва Сәрдарниң алдида ғәмкин жүргинимиздин немә пайда? 15 Әнди болса, биз һакавурларни бәхитлик һесаплаймиз. Қанунсизлар утуққа йетип, улар Худани синисиму, җазасиз қеливатиду”,— дәйсиләр».
16 Бирақ шу вақитта Йәһвадин қорққанлар бир-бирси, һәрким өз йеқини билән сөзлишиду, Йәһва болса, уларни диққәтлик тиңшайду. Униң алдида Йәһвадин әйминип, Униң исми һәққидә чоңқур мулаһизә қилғанлар тоғрилиқ хатирә китап йезилиду.
17 «Мән һәрикәткә келидиған мәзкүр күндә,— дәйду Йәһва Сәрдар,— улар Мениң алаһидә баһалиқ бир мүлкүм болиду. Мән уларни атиси еһтиятлиқ оғлини айиғандәк аяймән вә уларни сақлаймән. 18 Шу вақитта силәр яңливаштин һәққаний һәм рәзил арисида болудиған пәриқни көрисиләр. Худаға хизмәт қилған һәм Униңға хизмәт қилмайдиған кишиләр арисида айримчилиқни ениқ байқайсиләр».