Әлчиләр
5 Һанания исимлиқ бир киши вә униң аяли Сапфира мүлкини сетип, 2 пулиниң бир қисмини йошуруп, қалғинини әлчиләргә елип кәлди. Аялиму бу иштин хәвәрдар еди. 3 Шу чағда Петрус униңға мундақ деди: «Һанания, Шәйтанниң муқәддәс роһқа ялған ейтиш пикрини жүригиңгә селишиға һәм етизниң баһасиниң қисмән пулини йошурушқа қандақларчә йол қойдуң? 4 Сетилиштин алдин у сениңки едиғу. Уни сатқандин кейинму, у пулни тәхсимләш өз ихтияриңда әмәсмеди? Немишкә мундақ ишни нийәт қилдиң? Сән адәмләргә әмәс, Худаға ялған ейтиң». 5 Бу сөзләрдин кейин Һанания йәргә жиқилип, өлүп қалди. Шу чағда буни аңлиғанларниң һәммисини зор қорқунуч басти. 6 Яшлар орнидин туруп, уни кепинләп, сиртқа апирип көмүп қойди.
7 Тәхминән үч сааттин кейин, бу ишлардин хәвири болмиған униң аяли кирип кәлди. 8 Петрус униңдин: «Маңа ейтиңа, силәр йәрни палан пулға саттиңларму?»— дәп сориди. У аял: «Һә, шундақ саттуқ»,— деди. 9 Петрус сөзини давам қилип: «Силәр немә, Йәһваниң роһини синашқа келишивалдиңларму? Мана, ериңизни көмгәнләр ишик алдида туриду. Улар сизниму елип чиқиду»,— деди. 10 Шу ан аял униң айиғиға жиқилип, җан үзди. Жигитләр кирип, униң өлүп қалғинини көрдидә, уни апирип, ериниң йениға көмди. 11 Бу вақиәни аңлиғанларниң һәммиси вә пүтүн җамаәт зор қорқунучқа толди.
12 Шундақла хәлиқ арисида әлчиләрниң қоллири билән нурғун карамәтләр вә мөҗүзиләр йүз бәрди. Уларниң һәммиси Сулайман пешайванида бир кишидәк жиғилип турушатти. 13 Башқилири уларға қошулушқа жүръәт қилалматти, лекин хәлиқ уларни махтап һөрмәт қилатти. 14 Һакимдаримизға ишәнгән әр вә аялларниң сани көпийишкә давамлашти, 15 шуңлашқа Петрус өтүп кетиватқанда, һеч болмиса униң көләңгиси чүшсун дәп, адәмләр чүшәк вә зәмбилләрдә бемарларни чоң кочиларға елип чиқишти. 16 Шундақла Йерусалимниң әтрапидики шәһәрләрдин нурғунлири кесәл вә җин чаплашқанларни әкелип, уларниң һәммиси дава тапти.
17 Амма башроһаний вә униң шериклири, йәни шу вақитта болған садуқий диний мәзһипи, көрәлмәсликтин қарши чиқип, 18 әлчиләрни қолға елип, шәһәрниң зинданиға ташлиди. 19 Бирақ кечиси Йәһваниң пәриштиси зинданниң ишиклирини ечип, уларни чиқарғач, мундақ деди: 20 «Бериңлар, мәркизий ибадәтханида туруп, халайиққа бу һаят тоғрисида сөзләрни ейтиңлар». 21 Ушбу көрсәтмини аңлап, улар сәһәрдә мәркизий ибадәтханиға кирип, тәлим беришкә башлиди.
Башроһаний вә униң шериклири Алий кеңәшни вә Исраил оғуллириниң пүткүл ақсақаллирини жиғди. Әлчиләрни әкелиш үчүн зинданға адәм әвәтти. 22 Лекин күзәтчиләр зинданға келип, уларни тапалмиди. Қайтип келип бу һәққидә хәвәрләп, 23 мундақ деди: «Биз зинданниң мәккәм қулупланғанлиғини һәм ишик түвидә қаравулларниң турғанлиғини байқидуқ, амма ишикни ечип, ичидә һечкимни тапалмидуқ». 24 Бу сөзләрни аңлиған ибадәтханиниң башлиғи вә чоң роһанийлар чүшинәлмәй, әнди немә болудиғанлиғини билмәй қалди. 25 Шу чағда бир киши келип: «Мана, силәр зинданға қамап қойған адәмләр ибадәтханида туруп, кишиләргә тәлим бериватиду»,— дәп хәвәрлиди. 26 Шу вақитта башлиқ һәм күзәтчиләр берип, уларни елип кәлди, бирақ хәлиқниң ташлар билән уруп кетишидин қорқуп, уларға күч қолланмиди.
27 Әлчиләрни елип келип, Алий кеңәш сарийида оттуриға чиқарди. Башроһаний уларни сораштуруп: 28 «Биз силәргә бу исимниң намидин тәлим бәрмәңлар дәп қаттиқ чәклигәнғу, әнди немә болмақта?! Силәр Йерусалимни бу тәлимгә толтуруп, әшу адәмниң қенини бизгә артишни қарар қиливатисиләр»,— деди. 29 Петрус билән башқа әлчиләр җававән: «Биз Һөкүмран сүпитидә инсанларға әмәс, бәлки Худаға беқинишимиз керәк. 30 Әҗдатлиримизниң Худаси силәр түврүккә миқлап өлтүргән Әйсани тирилдүрди. 31 Исраил товва қилип, гуналириға кәчүрүм елиши үчүн, Худа уни Йетәклигүчи вә Қутқузғучи қилип, Өзиниң оң қоли дәриҗисигичә улуқлиди. 32 Буниңға гувачилар биз вә муқәддәс роһ, чүнки уни Худа Өзигә Һөкүмран сүпитидә беқинғанларға пәқәт бериду»,— деди.
33 Улар аңлиғанлиридин интайин ғәзәплинип, уларни өлтүрмәкчи болди. 34 Лекин пүткүл хәлиқниң һөрмитигә сазавәр болған Гамалиил исимлиқ пәрисий вә Қанун устази Алий кеңәштә орнидин туруп, бу кишиләрни бираз вақитқа сиртқа елип чиқишни буйриди. 35 Уларға болса: «Һәй, исраиллиқлар, бу кишиләрни немә қилмақчи болғиниңлар һәққидә яхши ойлинип көрүңлар. 36 Бу күнләргичә Тәвдас дегән киши пәйда болуп, өзини улуқ дәп, униңға бирмунчә адәм қошулди, җәми 400гә йеқин киши. Бирақ у өлтүрүлди, уни тиңшиғанларниң һәммиси чечилип йоқап кәтти. 37 Униң арқисидин, аһалини тизимға елиш вақтида, җәлилийәлик Йәһудаму пәйда болди, уму өзигә адәмләрни әгәштүрди. Уму қаза тапти вә уни тиңшиғанларму тәрәп-тәрәпкә чечилип кәтти. 38 Әнди ейтмақчи болғиним: бу кишиләрниң арамиға тәгмәңлар, чүнки бу нийәт яки иш инсанлардин болса, у вәйран болиду, 39 амма әгәр у Худадин болса, силәр уни йоқиталмайсиләр. Әксичә, Худаға қаршилашқучилар болуп қелишиңлар мүмкин»,— деди. 40 Улар униң сөзини қобул қилип, әлчиләрни чақирди вә уларни қамчилитип, Әйсаниң намидин тәлим бәрмәсликни буйруп, қоювәтти.
41 Әлчиләр Әйсаниң исми үчүн шәрмәндилик тартқиниға хошал болғач, у йәрдин чиқип кәтти. 42 Вә улар һәр күни мәркизий ибадәтханида вә өйму-өй тохтатмай тәлим бәрди вә Мәсиһ Әйса тоғрисида хуш хәвәрни җакалиди.