Тимотийға 1-хәт

3 Тоғра ейтилған: кимду-ким ақсақал вәзипилиригә интилса, яхши ишни халайду. 2 Шуңлашқа ақсақал әйипсиз, бир аяллиқ, адәтлиридә чекини билидиған, сағлампикирлик, жиғинчақ, меһмандост, тәлим беришкә қабилийәтлик болуши керәк. 3 У һарақ-шарапқа амрақ, зомигәр, урушқақ киши болмай, пулпәрәс әмәс, бәлки пәм-парасәтлик* киши болуши шәрт. 4 У өз аилә әзалирини яхши башқуралайдиған, балилирини беқиништа туталайдиған болуши күтүлиду. 5 (Чүнки әгәр киши өз аилисини башқурушни билмисә, у қандақларчә Худаниң җамаити тоғрилиқ ғәмхорлуқ қилалайду?). 6  Тәкәббурлишип кәтмиши һәм Иблисқа чиқирилған һөкүмгә чүшмиши үчүн, йеқинда өзини беғишлиғанни ақсақал қилип тайинлашқа болмайду. 7 Униңдин ташқири, әйипләрдин хали болуши һәм Иблисниң қилтиғиға чүшмиши үчүн, у сирттикиләрниң яхши гувалиғиға сазавәр болуши керәк.

8 Шуниңдәкла ярдәмчиләрму җиддий болуши керәк, улар йә иккийүзлүк, йә һарақ-шарапқа берилидиған, йә натоғра киримгә тамагәр әмәс, 9 бәлки пак виждани билән етиқатниң муқәддәс сирини сақлалайдиған болуши лазим.

10 Улар авал ярамлиққа синалсун вә әгәр лайиқ болса, андин хизмәт қилсун.

11 Аялларму ялихор болмай, җиддий, адәтлиридә чекини билидиған, һәммә нәрсидә садиқ болуши керәк.

12 Җамаәт ярдәмчиси бир аяллиқ, пәрзәнтлирини вә өйдикилирини яхши башқуридиған болсун. 13 Чүнки ким мунасип хизмәт қилса, абройлуқ атаққа сазавәр болуп, Мәсиһ Әйсаға болған етиқатта сөз әркинлигигә еришиду.

14 Гәрчә пат-йеқинда саңа келишкә үмүтләнсәмму, буни йезишимниң сәвәви, 15 әгәр мабада кечикип қалсам, Худаниң өйидә — һәқиқәтниң түврүги һәм таянчиси болған тирик Рәббимизниң җамаитидә өзәңни қандақ тутуш керәклигини билисән. 16 Һә, Худаға болған вапалиқниң муқәддәс сири, сөзсиз, бүйүктур: «У тәндә аян болди, роһта һәққаний дәп елан қилинди, пәриштиләргә көрүнди, хәлиқләр арисида вәз қилинди, етиқат билән дунияда қобул қилинди, шан-шөһрәттә асманға елинди».