Коринтлиқларға 1-хәт
7 Әнди силәр язған мәсилә тоғрилиқ: әр кишиниң аял кишигә йеқинлашмаслиғи яхши. 2 Амма һәммә җайда җинсий әхлақсизлиқ тарқалғачқа, һәрбир әркишиниң өз аяли болсун һәм һәрбир аялниң өз ери болсун. 3 Ери аялиға нисбәтән өз мәҗбурийитини, аялиму шундақла еригә нисбәтән өз мәҗбурийитини орунлисун. 4 Аяли өз тенигә егә әмәс: бу һоқуқ униң еригә тәәллуқ, шуниңға охшашла ериму өз тенигә егә әмәс, бәлки бу һоқуқ униң аялиға тәәллуқтур. 5 Буниңда бир-бириңлардин баш тартмаңлар, бәлки пәқәт келишип, дуаға вақит бөлгән чағда — бәлгүлүк вақитқила вә Шәйтан силәрниң өзәңларни туталмайдиғиниңлар арқилиқ аздуруп кәтмәслиги үчүн, яңливаштин биллә болуңлар. 6 Амма буларни буйруқ әмәс, бәлки рухсәт ретидә ейтиватимән. 7 Лекин барлиқ адәмләрниң маңа охшаш болушини халаттим. Бирақ һәрқайсиниң Худадин өз соғиси бар: бирсиниң мундақ, йәнә бирсиниң башқичә.
8 Некада болмиғанларға вә тулларға ейтимән: мениңдәк қелиш улар үчүн яхши болиду. 9 Бирақ әгәр улар өзлирини туталмиса, некалансун, чүнки шәһвәт отида көйгәндин көрә, некалиқ болуш яхширақ.
10 Некада болуватқанларға нәсиһәт беримән — мән әмәс, бәлки Һакимдаримиз: аяли еридин кәтмисун, 11 әгәр кәтсә, у турмушқа чиқмисун яки ери билән яришивалсун. Шундақла әрму аялини ташлап кәтмисун.
12 Башқилириға болса мән ейтиватимән — мән, Һакимдаримиз әмәс: әгәр қандақту-бир бурадәрниң аяли етиқатсиз болуп, униң билән яшашқа келишсә, у аялини ташлимисун. 13 Аялниңму ери етиқатсиз болса вә у униң билән яшашқа келишсә, ерини ташлимисун. 14 Етиқатсиз әр қериндаш арқилиқ, етиқатсиз аял бурадәр арқилиқ муқәддәслиниду, болмиса силәрниң пәрзәнтлириңлар һәқиқәтән напак болатти, әнди болса, улар муқәддәстур. 15 Амма, әгәр етиқатсиз киши кәтсә, кетивәрсун, бундақ әһвалларда бурадәр яки қериндаш мәҗбурийәт билән бағланмайду. Худа силәрни течлиққа чақирди. 16 Аял, сән нәдин билисән, мүмкин ериңни қутқузуп қалалайсән? Яки сән, әр, нәдин билисән, мүмкин аялиңни қутқузуп қалалайсән?
17 Һалбуки, Йәһва һәрқайсиға қандақ бәлгүлигән болса, һәрким шундақ яшисун — уни Худа чақирған һаләттә болувәрсун. Мән буни һәммә җамаәтләргә җекиймән. 18 Бирси хәтнилик болуп чақирилдиму? У хәтнилик болувәрсун. Бирси хәтнисиз чақирилдиму? У хәтнә қилмисун. 19 Хәтнилик болуш һечнәрсини билдүрмәйду, хәтнисизликму һечнәрсини билдүрмәйду — пәқәт Худаниң вәсийәтлирини орунлаш әһмийәтлик болиду. 20 Һәрбирси қайси һаләттә чақирилған болса, шуниңда қаливәрсун. 21 Сән қул болуп чақирилдиңму? Тәшвишләнмә. Лекин әгәр азатлиққа чиқалисаң, мундақ пурсәттин пайдиланғин. 22 Чүнки Һакимдаримизниң хизмәтчиси болуп чақирилған һәрбир қул — Һакимдарниң азатлиққа чиқирилған адимидур. Мошуниңға охшаш, азат туруп чақирилған — һазир Мәсиһниң қули. 23 Силәр жуқури баһаға сетип елиндиңлар, әнди инсанларниң қуллири болушни тохтитиңлар. 24 Һәрбириңлар қайси һаләттә чақирилған болсаңлар, шу һаләттә Худа билән болуңлар.
25 Иппәтликләргә тегишлик нәрсигә кәлсәк, мениңда Һакимдардин буйруқ йоқ, бирақ маңа Һакимдарим рәһимлик көрсәткән кишидәк, өз ой-пикримни ейтиватимән. 26 Моҗут шараитлар тәсиридин ойлаймәнки, адәм балисиға әшу әһвалда қелиш яхши. 27 Аялиң барму? Униңдин аҗришишни издимә. Аялсизму? Өйлинишни издимә. 28 Әгәр некаға турсаңму, гуна қилған болмайсән. Әгәр иппәтликму некаланса, гуна қилған болмайду. Амма уларниң һаятида йеңи қийинчилиқлар пәйда болиду. Мән болсам силәрни улардин хали қилғум келиду.
29 Һалбуки, қериндашлар, шуни силәргә ейтимәнки, қалған вақит қисқираватиду. Буниңдин бу ян аяллири барлар йоқлардәк болсун, 30 жиғлаватқанлар — жиғлимиғанлардәк вә шатлиниватқанлар — шатланмиғанлардәк вә сетивалғучилар — егә болмиғанлардәк, 31 дуния билән пайдилиниш мүмкинчилиги болғанлар — униң билән толуқ мөлчәрдә пайдиланмиғанлардәк болуңлар, чүнки бу дунияниң сәһниси өзгәрмәктә. 32 Мән силәрниң ғәмсиз болушуңларни халаймән. Өйләнмигән киши Һакимдарниң мақуллишини елиш үчүн, униң мәнпийәтлири һәққидә тәшвишлиниду. 33 Өйләнгән киши болса аялиниң разилиғини елиш үчүн, дуниядики нәрсиләрниң ғемини қилиду 34 вә у иккилиниду. Шундақла турмуш қурмиған аял вә иппәтлик қиз тени һәм роһи билән муқәддәс болуши үчүн, Һакимдарниң мәнпийәтлириниң ғемини қилиду. Турмуштики аял болса, ериниң разилиғини елиш үчүн, дуниядики нәрсиләрниң ғемини қилиду. 35 Буни силәрниң азатлиғиңларни чәкләш үчүн әмәс, бәлки силәрниң һәр ишни лайиқ түрдә қилишиңлар вә дайим Һакимдаримизға вападарлиқ сақлап, диққитиңлар бөлүнмәй хизмәт қилишиңлар үчүн, силәрниң пайдаңларға ейтиватимән.
36 Амма, әгәр бирси бойдақлиғи билән хата иш қиливатимән, дәп ойлиса һәм әгәр иппәтлик дәвриниң яшлиқ баһари өтүп кәткән болса вә турмуш қуруш вақти кәлди десә, шундақ қилсун, у гуна қилған болмайду. Ундақлар некаға турсун. 37 Бирақ, әгәр бирсиниң буниңда һаҗәтлиги болмиса вә көңлидә чиң туруп, өз ирадисини қолида тутуп, қәлбидә өз иппәтлигини сақлаймән, дегән қарарға кәлсә, шундақ қилғини яхши болиду. 38 Шуңлашқа некаланған киши яхши иш қилиду, амма некаланмиған киши униңдинму яхширақ иш қилиду.
39 Ериниң һаят вақтида аяли униңға бағланғандур. Амма ери өлүп кәтсә, аяли халиған кишигә, пәқәт Һакимдарниң избасариға турмушлуқ болушқа әркин. 40 Лекин мениң оюмчә, әгәр у тул қалса, бәхитлигирәк болиду. Мән ойлаймәнки, мәндиму Худаниң роһи бардур.