Даниял
7 Бабил шаһи Бәлшасарниң биринчи жилида Даниял чүшидә вәһийләрни көрди. У шу заманла ушбу чүшини йезип, униң маһийитини изһар қилди.
2 Мана, униң баянати: «Кечиси вәһийләрдә мән төрт асман шамилиниң бүйүк деңизни қаттиқ долқунлатқанлиғини көрдүм. 3 Деңиздин бир-биригә охшимайдиған төрт зор һайван чиқти.
4 Биринчиси ширға охшатти, бирақ униң бүркүтниңкидәк қанатлири бар еди. Мән униңға қарап турғинимда, униң қанатлири жулунди, андин у йәрдин көтирилип, икки путиға адәмдәк турди. Униңға инсаний жүрәк берилди.
5 Иккинчи һайван болса, ейиққа охшатти. Униң бир айиғи көтириклик болуп, ағзида үч қовурға чишләклик еди. Униңға: “Тур, көп әт йә!”— дейилди.
6 Андин мән йәнә бир һайванни көрдүм. У барсқа охшатти, лекин униң дүмбисидә қушниң төрт қанити болатти. Бу һайванниң шундақла төрт беши болуп, униңға башқуруш үчүн һакимийәт берилди.
7 Буниңдин кейин мән түндики аянлиримда төртинчи һайванни көрдүм. У интайин қорқунучлуқ, дәһшәтлик һәм бәк күчлүк турқи билән пәриқлинәтти. Униң йоған төмүр чишлири бар еди. У һәммә нәрсини ялмап йәп, жиртатти, қалғинини болса, аяқлири билән чәйләтти. У қалған һайванлардин бәк пәриқлинип, униң он мүңгүзи бар еди. 8 Мән мәзкүр мүңгүзләрни қараватқинимда, мана, уларниң арисида йәнә бир, йоған әмәс бир мүңгүз пәйда болди, һә, авалқи он мүңгүзниң үчи болса, униңға орнини бериши үчүн, жулуп ташланди. Йеңи чиққан мүңгүзниң адәм балисиға қияс көзлири вә тәкәббур сөзләйдиған ағзи болғанди.
9 Андин мән шуни байқидимки, тәхтләр қоюлди вә Өз тәхтигә Әзәлдин Мәңгү Яшиғучи олтарди. Униң кийими ақ қардәк, бешидики чачлири әң таза жуңдәк еди. Униң тәхти көйүватқан ялқундәк, тәхтиниң чақлири лавулдиған өрттәк еди. 10 Униңдин отлуқ дәрия ақатти вә Униңға миңлиған миңлар хизмәт қилатти һәм 100 миллион Униң алдида туратти. Сот башлинип, китаплар ечилди.
11 Мән қарашни давамлаштурдум, чүнки ахирқи мүңгүз ейтқан тәкәббур сөзләрни аңлиғандим. Мән байқиғиним, ушбу һайван өлтүрүлди вә униң җәсиди отқа ташлинип, көйдүрүлди. 12 Башқа һайванлар болса, һакимийитидин мәһрум қилинип, уларниң һаяти пәқәт бир вақитқа вә муддәткә узартилди.
13 Кейин мән түндики вәһийлиримдә әрш булутлири билән инсан оғлиға охшайдиған бирини көрдүм. У Әзәлдин Мәңгү Яшиғучиниң алдиға кәлтүрүлди вә униңға йеқинлишишқа рухсәт берилди. 14 Андин униңға һакимийәт, шөһрәт вә Падишалиқ берилди, сәвәви, һәрхил тилларда сөзләйдиған барчә хәлиқләрдин кишиләр униңға хизмәт қилиши үчүндур. Униң һөкүмранлиғи — әбәдий һөкүмранлиқ, у һечқачан түгимәйду вә униң Падишалиғи һечқачан вәйран болмайду!
15 Мән, Даниял, паракәндиликкә чүштүм, чүнки ушбу вәһийләр мени қорқутивәтти. 16 Мән шу йәрдә турған бирсиниң йеңиға келип, униңдин бу вақиәләрниң мәнасини соридим. У маңа чүшәндүргәч, мундақ деди: 17 “Мону йоған һайванлар — йәр-зиминда пәйда болудиған төрт шаһни билдүриду. 18 Амма Әң Алий Һөкүмранниң муқәддәслири Падишалиқни қобул қилип, униңға әбәдий егидарлиқ қилиду”.
19 Шу чағда мән башқилиридин пәриқлинидиған, бәк қорқунучлуқ, төмүр чишлири һәм мис тирнақлири бар һайван һәққидә көпирәк билгүм кәлди, чүнки ушбу һайван һәммини йәп-бузуп, қалғинини путлири билән дәпсәндә қилатти. 20 Шундақла мән униң бешидики он мүңгүзи вә арисидин өсүп чиққан бир мүңгүзи вә униң кесиридин чүшүп кәткән үч мүңгүзи һәққидә билгүм кәлди, чүнки мошу көзлири һәм ағзи бар вә чоң сөзләйдиған мүңгүз Худаға қарши сөзләтти вә түридинму башқа мүңгүзләрдин әһмийәтлигирәк көрүнәтти.
21 Кейинирәк мән мәзкүр мүңгүзниң муқәддәсләргә қарши урушуп, уларниң үстидин ғалибә қазанғанлиғиниму байқидим. 22 Бирақ Әзәлдин Мәңгү Яшиғучи келип, асмандики сот Әң Алий Һөкүмранниң муқәддәслири пайдисиға қарар чиқарди вә муқәддәсләр Падишалиқни алидиған вақит башланди, шу вақиттин тартип вәзийәт өзгәрди.
23 Мана, Тәңри һозуридики шәхс мундақ деди: “Төртинчи һайван — бу йәрдә һасил болудиған төртинчи шаһлиқтур. У башқа шаһлиқлардин тамамән пәриқлиниду. У пүткүл йәрни ялмап жутуп, уни чәйләп, вәйран қилиду. 24 Он мүңгүз — бу мошу шаһлиқтин чиқидиған он шаһтур. Улардин кейин йәнә бирси пәйда болуп, у башқа онидин пәриқлинип, үч шаһни пәсәйтиду. 25 У Әң Алий Һөкүмранни һақарәтләп, Әң Алий Һөкүмранниң муқәддәслирини һалак қилишқа интилиду. У вақитлар билән қанунни йөткәшни арман қилиду вә муқәддәсләр униң қолиға бир вақитқа, икки вақитқа вә йерим вақитқа тапшурулиду. 26 Лекин сот башлиниду вә шу шаһниң һакимийити тартилинип, униң билән мәңгүгә иш пүтиду.
27 Падишалиқ, һакимийәт вә асман астидики барлиқ шаһлиқларниң бүйүклиги Әң Алий Һөкүмранниң муқәддәсләрдин тәркип тапқан хәлқигә берилиду. Уларниң Падишалиғи — әбәдий Падишалиқтур вә барлиқ һөкүмәтләр уларға хизмәт қилип, беқиниду”.
28 Мана, мошуниң билән баянат түгиди. Гәрчә мени, Даниялни, ойлирим қаттиқ әнсирәткән болсиму һәм мән татирип кәтсәмму, лекин бу сөзләрниң барлиғини мән қәлбимдә сақлидим».