Йоһан
13 Песах байримидин авал Әйса бу дуниядин Атисиниң йениға өтүш вақти-саати кәлгәнлигини билгән еди. У бу дуниядики өз адәмлирини сөйүп, уларни ахириғичә сөйди. 2 Кәчки тамақ вақтида Иблис Симунниң оғли Йәһуда Ишқарийотниң дилиға Әйсаға хиянәт қилиш нийитини салған еди. 3 Әйса Атиси һәммә нәрсини униң қолиға бәргинини вә у Худадин келип, Худаға қайтидиғанлиғини билгәчкә, 4 дәстихандин туруп, сиртқи кийимини йешип, лөңгини елип, белини бағлиди. 5 Андин дасқа су қуюп, шагиртлириниң путлирини жуюшқа башлиди вә белигә бағлиған лөңгә билән путлирини сүртти. 6 Новәт Симун Петрусқа кәлгәндә, у: «Һакимдарим, путумни сән жуйсаң болмас?»— деди. 7 Әйса униңға: «Немә қиливатқинимни һазир чүшәнмәйсән, лекин кейинирәк чүшинисән»,— деди. 8 Петрус етираз қилип: «Һәргиз мениң путлиримни жуймайсән!»— деди. Әйса: «Әгәр жуймисам, сениң мениң билән несивиң болмайду»,— деди. 9 Симун Петрус буниңға: «Ундақ болса, Һакимдарим, путлиримнила әмәс, қоллиримниму һәм бешимниму жуйғин!»— деди. 10 Әйса униңға: «Жуюнуп болғанға путлиридин башқа һеч йерини жуюшниң һаҗити йоқ, у пүтүнләй таза. Силәрму таза, лекин һәммиңлар әмәс»,— деди. 11 У өзигә сатқунлуқ қилидиған кишини биләтти, шуниң үчүн: «Һәммиңлар пак әмәс»,— деди.
12 Әйса уларниң путлирини жуюп болғандин кейин, сиртқи кийимини кийип, йәнә дәстиханға олтарди вә уларға мундақ деди: «Силәр немә қилғанлиғимни чүшәндиңларму? 13 Силәр мени “Устазим” вә “Һакимдарим” дәйсиләр, буни тоғра дәйсиләр, чүнки һәқиқәтән шундақ. 14 Демәк, әгәр мән Устазиңлар вә Һакимдариңлар путлириңларни жуйған болсам, силәрму бир-бириңларниң путлирини жуюшуңлар керәк. 15 Мән силәргә үлгә көрсәттим, силәрму шуни қилишиңлар лазим. 16 Силәргә һәқни ейтимәнки, қул ғоҗайинидин үстүн әмәс вә әлчиму өзини әвәткүчидин үстүн әмәс. 17 Буни билип, шуниңға әмәл қилсаңлар, бәхитликсиләр. 18 Мән буни барлиғиңлар һәққидә ейтмидим. Мән таллиғанлиримни билимән. Лекин Муқәддәс Язмилардики: “Ненимни йегән киши маңа тапинини көтәрди”, дегән җай мошундақ орунлиниши керәк. 19 Мән алдин-ала силәргә кәлгүсини ейтиватимән, бу вақиәләр әмәлгә ашқанда, келиши керәк болған киши мән екәнлигимгә ишинисиләр. 20 Силәргә бир нәрсә дәй: мән әвәткән һәрқандақ кишини қобул қилсаңлар, мени қобул қилған болисиләр. Мени қобул қилған киши болса, мени Әвәткүчини қобул қилған болиду».
21 Әйса бу сөзләрни ейтип болуп, һаяҗанлинип, мундақ гува қилди: «Силәргә һәқни ейтиватимәнки, араңларда бири маңа сатқунлуқ қилиду». 22 Шагиртлар у кимни нәзәрдә тутуватқанлиғини биләлмәй, бир-биригә чүшәнмәй қариди. 23 Шагиртлар арисида Әйса яхши көрүдиған бирси униң бағриға йеқин янпашланған еди. 24 Симун Петрус униңға: «Әйса ким һәққидә дәватиду?»— дәп ишарәт қилди. 25 Шунда у Әйсаниң мәйдисигә иңишип: «Һакимдарим, у ким?»— дәп сориди. 26 Әйса: «Бу парчә нанни қачиға чилап, кимгә бәрсәм, у шу» дәп, — нанни чилап, Симунниң оғли Йәһуда Ишқарийотқа сунди. 27 Йәһуда нанни елишиғила ичигә Шәйтан кирди. Әйса Йәһудиға: «Қилидиғиниңни чапсан қил»,— деди. 28 Дәстиханда олтарғанларниң һечқайсиси Әйсаниң униңға бу сөзләрни немә үчүн ейтқанлиғини чүшәнмиди. 29 Пул сандуқчиси Йәһудида болғанлиқтин, бәзиләр Әйса униңға: «Байрам үчүн бизгә керәк болудиған нәрсиләрни елип кәл», яки «Кәмбәғәлләргә бир нәрсә бәр», демәкчи болса керәк, дәп ойлашти. 30 У нанни елип, дәрру чиқип кәтти. Бу чағ түн еди.
31 Йәһуда кәткәндин кейин, Әйса мундақ деди: «Әнди инсан Оғли улуқлиниватиду һәм Пәрвәрдигарму униң арқилиқ улуқлиниду. 32 Худа Өзи уни улуқлайду вә У уни дәрру улуқлайду. 33 Балилирим, әнди мән силәр билән узақ болмаймән. Силәр мени издәйсиләр, бирақ мән йәһудийларға ейтқинимдәк, силәргиму ейтай: “Мән баридиған җайға силәр баралмайсиләр”. 34 Силәргә йеңи вәсийәт беримән: бир-бириңларға меһир-муһәббәтлик болуңлар. Силәрни мән сөйгинимдәк, силәрму бир-бириңларни дәл шундақ сөйүңлар. 35 Әгәр бир-бириңларға меһир-муһәббәтлик болсаңлар, силәрниң мениң шагиртлирим екәнлигиңларни һәммиси тонуйду».
36 Симун Петрус Әйсадин: «Һакимдарим, қәйәргә барисән?»— дәп сориди. Әйса җававән: «Мән баридиған җайға һазир баралмайсән, лекин кейинәрәк барисән»,— деди. 37 Петрус униңға: «Һакимдарим, немишкә кәйниңдин һазир баралмаймән? Мән һәтта сениң үчүн җенимни пида қилимән»,— деди. 38 Әйса: «Мән үчүн җениңни пида қиламсән? Саңа һәқни ейтай, ғораз қичқарғичә, сән мәндин үч қетим ваз кечисән»,— деди.