Петрусниң 1-хети
3 Худди шуниңдәк, силәр, аяллар, әрлириңларға беқиниңлар. Худа сөзигә қулақ салмайдиған әрләр сөзлириңлар арқилиқ әмәс, бәлки яхши ишлириңлардин тәсирлинип, Худаға қаритилған болсун, 2 йәни улар пак жүрүш-турушиңларни вә чоңқур һөрмәт қилишиңларни байқисун. 3 Силәрни сиртқи бир нәрсә: алаһидә өрүлгән чачлар, алтун зебу-зенәтләр вә есил кийимләр әмәс, 4 әксичә, қәлбиңларда йошурулған — Худаниң нәзәридә интайин баһалиқ болуп һесапланидиған еғир-бесиқлиқ һәм юмшақ муамилә безисун. 5 Өтмүштә Яратқучиға үмүт бағлап яшиған муқәддәс аяллар әрлиригә беқинип, өзлирини дәл мошундақ зенәтлигән. 6 Мәсилән, Сарә Ибраһим пәйғәмбәрни ғоҗайиним дәп атап, униңға бойсунған. Әгәр силәр яхшилиқ қилип, қорқунуч әкелидиған һечнәрсигә бой бәрмисәңлар, силәрму униң қизлири болисиләр.
7 Силәрму, әрләр, буниңдин бу ян аяллириңларға алған тәлиматиңларға яриша еһтирам билдүрүп, назугирақ вә аҗиз қачилардәк уларға авайлап муамилә қилиңлар. Чүнки силәр улар билән биллә лайиқ болмиған һаят соғисиға мирасхор болуватисиләр. Шу чағда силәрниң дуалириңларға тосалғулуқлар болмайду.
8 Хулләс, һәммиңлар бирпикирлик, һисдашлиқ, чоңқур һәмдәртлик вә мөмүн, қериндашларчә бир-бириңларни сөйүдиған болуңлар. 9 Яманлиққа яманлиқ, һақарәткә һақарәт билән җавап қайтурмай, әксичә, яхшилиқ тиләңлар, чүнки силәр мошуниңға чақирилдиңлар һәм шу чағда бәрикәткә еришисиләр.
10 «Ким һаяттин хурсәнлик тепип, бәхитлик күнләрни көрүшни халиса, тилини яманлиқтин вә еғизини ялған гәпләрдин тартсун. 11 Явузлуқтин қечип, яхшилиқ қилсун, течлиқни издәп, униңға интилсун. 12 Чүнки Йәһваниң көзлири һәққаний кишиләргә қаритилған, қулақлири уларниң илтиҗалирини аңлайду, амма яманлиқ қилғучилардин Йәһва үз өриду».
13 Әгәр яхши ишларни қилишқа қизғин болсаңлар, силәргә кимму зиян қилалисун? 14 Һәтта һәққанийлиқ үчүн азап чәксәңларму, бәхитликсиләр. Улар қорқудиған нәрсиләрдин қорқмаңлар һәм тәшвишләнмәңлар. 15 Мәсиһни Һакимдариңлар сүпитидә қәлбиңларда муқәддәс тутуңлар. Үмүтиңларни яқлап, униң һәққидә сориған һәрбир адәмгә асаслиқ җавап беришкә дайим тәйяр болуңлар. Пәқәт буни мулайимлиқ вә чоңқур һөрмәт билән чүшәндүрүңлар.
16 Мәсиһниң избасарлири ретидә силәргә қарши туруп әйиплигәнләр — мәйли немидила әйиплимисун — өзлири уятқа қалсун, чүнки силәр вижданиңларни пак сақлап, өзәңларни мунасип туттуңлар. 17 Әгәр Худаниң ирадиси шундақ болса, яманлиқ қилип азап чәккәндин көрә, яхшилиқ қилип азап тартқинимиз әвзәл. 18 Чүнки һәққаний инсан Мәсиһ һәққанийсиз кишиләрни Худаға елип келиш үчүн, бир қетим вә мәңгүгә өзини пида қилди. У инсан сүпитидә өлтүрүлүп, роһ сүпитидә тирилди. 19 Андин у берип, зиндандики роһларға хәвәрни елан қилди. 20 Улар — Нуһ пәйғәмбәрниң дәвридә итаәтсизлик қилған роһлардур. Шу чағда Худа кемә қурулушини сәвир-тақәт билән күткән вә униңда аз кишиләр, җәми сәккиз җан Топан судин аман қалған еди.
21 Шуниңға охшаш, һазир суға чөмдүрүш (бу — тәнниң киридин тазилиниш әмәс, бәлки Худадин пак виждан сораштур) силәрни Әйса Мәсиһниң тирилиши арқилиқ қутқузиду. 22 Асманға көтирилгәндин кейин Мәсиһ Пәрвәрдигарниң оң тәрипидә олтарди вә Худа униңға пәриштиләрни, һакимийәтләрни һәм күчләрни бойсундуруп бәрди.