Зәкәрия
8 Йәһва Сәрдар йәнә маңа сөз қилди: 2 «Әскәрләр Башчиси Йәһва мундақ дәйду: “Мән Сионни қизғинлиқ билән қоғдаймән, Мән уни қәһрий қизғинлиқта һимайә қилимән! Мениң қизғиңлиғим улуқ болуп, қәһрим таза көйиду”».
3 «Йәһва Худа мундақ дәйду: “Мән Сионға қайтип келимән вә Йерусалимниң ичидә яшаймән. Йерусалимни һәқиқәтниң шәһири дәп атайду вә Йәһва Сәрдарниң теғи муқәддәс тағ болиду”».
4 «Йәһва Сәрдар мундақ дәйду: “Йерусалимниң кочилирида һәм мәйданлирида йешиниң көплигидин һаса таяққа таянған қери бовай һәм момайлар яңливаштин олтиридиған болиду. 5 Шәһәр кочилири яңливаштин ойнаватқан кичик балиларға толиду”».
6 «Йәһва Сәрдар мундақ дәйду: “Һәтта ушбу хәлиқниң қалғанлириниң көзидә бу мүмкин әмәстәк билинсиму, бу Мән үчүн мүмкин әмәсму?”— дәйду қошунлар Худайи Йәһва».
7 Йәһва Сәрдар мундақ дәйду: “Мана, Мән хәлқимни шәрқий һәм ғәрбий йәрләрдин қутқузимән. 8 Мән уларни Йерусалимға әкелимән, улар шу җайда истиқамәт қилиду. Улар Мениң хәлқим болиду, һә, Мән уларниң һәққаний һәм садиқ Худаси болумән”».
9 Йәһва Сәрдар мундақ дәйду: “Тәқабил болуңлар, қоллириңлар күчәйсун. Ким бүгүн мәзкүр сөзләрни аңлиған болсаңлар, дәл мошундақ сөзләр Йәһва Сәрдарниң өйиниң һулини қурғанда вә ибадәтханини селиш башланғанда ейтилған еди. 10 Чүнки бу вақитқичә кишиләр вә өй мелиниң меһнити үчүн һәқ төләнмигәнди. Дүшмәнләрниң қаршилиғидин бехәтәрлик болмиғанди, чүнки Мән кишиләрниң бир-бирси билән күришишигә йол қойғандим”.
11 “Һазир болса, Мән авалқи күнләрдәк хәлқимниң қалдуғиға муамилә қилмаймән,— дәйду Йәһва Сәрдар.— 12 Әнди хатирҗәмлик уруғи терилиду, үзүм ғоли йемишини әкелиду, йәр өз һосулини бериду вә асманлар — шәбнәмни. Мән буниң барлиғини хәлқимдин аман қалғанларға мирасқа беримән. 13 Йәһудийлар вә исраиллиқлар! Силәр хәлиқләр арисида ләнәттә қалғандиңлар, амма Мән силәрни қутқузимән һәм силәр бәрикәткә айлинисиләр. Қорқмаңлар вә қоллириңларни чүширивәтмәңлар!
14 Йәһва Сәрдар мундақ дәйду: “Мән силәрниң атилириңлар Мени рәнҗиткәндә силәргә апәт кәлтүрүшни дайим хатирәмдә тутқандим һәм униңдин ваз кәчмидим,— дәйду Йәһва Сәрдар,— 15 шундақла әнди Мән Йерусалимға һәм Йәһуда өйигә яхшилиқ қилишни ойюмда мәккәм тутимән. Шуңлашқа қорқмаңлар!”
16 “Мана немини силәр қилишиңлар лазим: бир-бириңларға пәқәт растлиқни ейтиңлар, шәһәр дәрвазилирида һәқиқәт бойичә течлиққа апиридиған адил қарарларни чиқириңлар. 17 Бир-бириңларға қарши нийәтләрни ойлимаңлар, сахта қәсәмләрни бәрмәңлар, чүнки буниң барлиғини Мән өч көримән”,— дәйду Йәһва».
18 Йәһва Сәрдар йәнә маңа мураҗиәт қилди: 19 «Йәһва Сәрдар мундақ дәйду: “Төртинчи, бәшинчи, йәттинчи һәм онинчи айлардики роза күнлири Йәһуда өйи үчүн байрам күнлири болиду. Улар хошаллиқ һәм шатлиқниң йоруқ мәйрәмлиригә айнилиду, лекин пәқәт һәқиқәт билән течлиқни яхши көрүңлар”.
20 Сәрдар Йәһва мундақ дәйду: “Алдиңларда шундақ вақит болидуки, мошу йәргә нурғунлиған шәһәрләрдин хәлиқләр һәм турғунлар келиду. 21 Бир шәһәрниң турғунлири башқа шәһәрниң турғунлириға берип, мундақ дәйду: “Келиңлар, чапсанирақ берип, Йәһваниң йүзи алдида дуа қилип, илтипатини ялвурайли. Қошунлар Худайи Йәһвани издәйли! Бизму шундақла маңдуқ”. 22 Шуниң билән көплигән хәлиқләр һәм бүйүк қәбилиләр Йерусалимға Йәһва Сәрдарни издәшкә һәм Йәһвани илтипат һәққидә ялвуруп-сорашқа келиду”.
23 Йәһва Сәрдар мундақ дәйду: “Әшу күнләрдә барлиқ хәлиқләрдин һәрхил тилларда сөзлишидиған он киши йәһудийниң кийиминиң пешини тутувелип, мундақ дәйду: “Биз силәр билән баримиз, чүнки биз Худаниң силәр билән екәнлиғини аңлидуқ”».