Ибранийларға

5 Инсанлардин елинған һәрқандақ башроһаний Худаға хизмәт қилишта инсанлар пайдисиға һәдийәләрни вә гуналар үчүн қурбанлиқларни әкелишкә тайинлиниду. 2 У өзиму аҗизлиқларға мәһкүм болғанлиқтин, хаталиқларни қилидиғанларниң һалиға йәткәч, мунасивәт қилиду, 3 шуңлашқа хәлиқниң гуналири үчүн қурбанлиқларни әкәлгәндәк, өзи үчүнму қурбанлиқ әкелишкә миннәтлик.

4 Адәм өзи өзлүгидин бу шәрәпни қобул қилалмайду, пәқәт Һарунға охшаш Худа тәрипидин чақирилмиғичә. 5 Шуниңдәк Мәсиһму башроһаний сүпитидә өзини улуқлимиди, бәлки униң тоғрисида: «Сән — Мениң оғлум, бүгүн Мән сениң Атаң болдум», Дегүчи тәрипидин улуқланди. 6 Башқа җайдиму У мундақ дәйду: «Сән — Мәлкисадиққа охшайдиған әбәдий роһанийдур».

7 Мәсиһ җисманий тени вақтида қаттиқ һөкүрәп жиғлап, уни өлүмдин Қутқузулиғучиға ялвуруш дуа-илтимаслирини йоллиди вә Пәрвәрдигардин әймәнгини үчүн, илтипат билән тиңшалди. 8 Гәрчә у Оғли болсиму, тартқан азаплири арқилиқ итаәтликкә үгәнди. 9 Мукәммәлликкә кәлтүрүлгәндин кейин, у өзигә итаәтлик болғанларниң барлиғиниң мәңгү қутқузулуши үчүн җавапкәр болди, 10 чүнки Худа уни Мәлкисадиққа охшайдиған башроһаний дәп бәлгүлиди.

11 У тоғрилиқ биз көп нәрсә ейтсақ болатти, лекин буни силәргә чүшәндүрүш тәс, чүнки қулиғиңлар еғирлишип кетипту. 12 Вақит бойичә қарисақ, силәр устаз болушуңлар керәк еди, амма силәргә йәнила Худаниң муқәддәс сөзлириниң асаслирини баштин үгитиш керәк һәм әнди силәргә қаттиқ тамақ әмәс, бәлки сүт һаҗәт. 13 Сүт билән тамақлинидиған һәрқандақ киши һәққанийлиқ сөзи билән тонуш әмәс, чүнки у бовақтур. 14 Қаттиқ тамақ болса, пишип-йетилгәнләр үчүн бәлгүләнгән, улар өз уқумини әмәл арқилиқ яхши билән яманни пәриқләндүрүшкә үгәткәнләрдур.