Титқа
1 Худа таллиғанларниң етиқатиға һәм һәқиқәтниң тоғра билимигә мувапиқ Рәббимизгә болған вападарлиққа бағлиқ Худаниң қули вә Әйса Мәсиһниң әлчиси — мәнки Паулдин салам. 2 Қедимий заманлардин авал вәдә қилинған һәм ялған ейталмайдиған Худаниң бәргән мәңгү һаят үмүти ушбуларға асасланған. 3 Пәрвәрдигар вақит кәлгәндә Өз сөзини вәзидә рошән қилди һәм уни Қутқузғучимиз Худа әмри бойичә маңа тапшурди. 4 Мениң билән умумий етиқатта турған һәқиқий оғлум Тит, саңа Атимиз Худадин вә Ниҗаткаримиз Әйса Мәсиһтин течлиқ вә мол меһирлик болсун.
5 Камчилиқларни түзитиш вә мән көрсәткәндәк, шәһәрләрдә ақсақалларни тайинлаш үчүн, мән сени Критта қалдурдум. 6 Ким нуқсансиз, бир аяли бар, балилири етиқатчи болуп, әхлақсизлиқта вә итаәтсизликтә әйипләнмигән болса, шундақ кишини ақсақаллиққа тайинлашқа болиду. 7 Ақсақал Худаниң башқурғучисидәк нуқсансиз, өзбешимлик әмәс, терикмәйдиған, һарақчи, зораван һәм һарам пулға амрақ әмәс болуши лазим. 8 Әксичә, меһмандост, яхшилиқни сөйүдиған, сағлампикирлик, һәққаний, вападар, өзини туталайдиған киши болсун. 9 Ақсақал шундақла тәлим бәргәндә, қаршилиқ көрсәткәнләрниң хаталиқлирини паш қилишқа қабил болсун. У Худаниң садиқ сөзини мәккәм тутуп, ишәндүрүшни билиши лазим.
10 Баш әгмәйдиған, қуруқ сөзләйдиған һәм башқиларни езиқтурудиғанлар көп. Улар болупму хәтнә қилишни яқлайдиғанлар. 11 Мундақларниң еғизини йепиш керәк, сәвәви, улар тегишлик нәрсини үгәтмәй, наһәқсиз пайда тепиш үчүн, пүтүнләй аилиләрниң етиқатини бузуватмақта. 12 Шуларниң бирси, уларниң пәйғәмбири, мундақ ейтқан: «Критлиқлар — җөндәлмәйдиған ялғанчилар, хәтәрлик һайванлар, бекарчи ачкөзләр».
13 Бу гувалиқ һәқтур. Мошу сәвәптин, уларниң етиқатта сағлам болуши үчүн, уларни қәтъий паш қил 14 һәм һәқиқәттин үз өргән йәһудийларниң чөчәклиригә вә инсанларниң әмирлиригә диққәт қилмисун. 15 Пак адәмләр үчүн һәммә нәрсә пактур. Напаклар һәм етиқати йоқлар үчүн һечнәрсә пак әмәс, чүнки уларниң һәм әқли, һәм виждани булғанған. 16 Улар һәммисиниң алдида Худани билимиз, дәп җакалайду, амма ишлирида Униңдин үз өриду, сәвәви, улар жиркиничлик, итаәтсиз вә һечқандақ яхши ишқа ярамсиздур.