Коринтлиқларға 1-хәт
1 Худаниң ирадиси бойичә Әйса Мәсиһниң әлчиси болушқа чақирилған Паулдин вә бурадәримиз Состендин — 2 Рәббимизниң Коринттики җамаитигә, силәргә, Мәсиһ Әйсада муқәддәсләнгәнләргә. Муқәддәс болушқа чақирилғанларға, уларниң вә бизниң Һакимдаримиз Әйса Мәсиһниң исмиға барлиқ җайларда мураҗиәт қиливатқанларға.
3 Атимиз Худадин һәм Һакимдаримиз Әйса Мәсиһтин силәргә мол меһирлик вә хатирҗәмлик болғай.
4 Силәргә Әйса Мәсиһтә көрситилгән Худаниң инайитини әсләп, Униңға силәр үчүн һәрдайим шүкүр ейтимән: 5 Әйсада силәр һәммә җәһәттин толуқ көләмдә сөзләш қабилийитигә вә толуқ билимгә егә болуп бейидиңлар 6 һәм араңларда Мәсиһ тоғрилиқ гувалиқ мәккәм тәстиқләнди. 7 Шундақ қилип, силәр тақәтсизлик билән Һакимдаримиз Әйса Мәсиһниң рошән болушини күтүветип, һәрқандақ соғидин кам болмидиңлар. 8 Һакимдаримиз Әйса Мәсиһниң күнидә силәрниң һечнәрсидә әйипләнмәслигиңлар үчүн, Худа ахирғичә силәрни мустәһкәмләйду. 9 Худа садиқтур, силәр У тәрипидин Униң Оғли Һакимдаримиз Әйса Мәсиһ билән бирликтә болушқа чақирилдиңлар.
10 Силәргә, қериндашлар, Һакимдаримиз Әйса Мәсиһниң исми билән нәсиһәт қилимәнки, һәммиңлар бир-бириңлар билән уйғунлуқта сөзләңлар вә араңларда бөлгүнчилик болмисун, әксичә, һәммиңлар пикирләрдә һәм көзқарашларда бирләшкән болуңлар. 11 Чүнки Хлояниң өйидикилиридин маңа шу нәрсә мәлум болдики, араңларда, қериндашлирим, талаш-тартишлар бар екән. 12 Мениң демәкчи болғиним, силәр: «Мән — Паулниң шагирти», «Мән — Аполосниң», «Мән болсам — Кифаниң», «Мән — Мәсиһниң шагирти», дәветипсиләр. 13 Мәсиһ бөлүнүп кәттиму? Яки силәр үчүн Паул түврүктә өлтүрүлүптиму? Яки Паулниң намиға чөмдүрүлдиңларму? 14 Худаға шүкүр ейтимән, мән араңлардин Крисп билән Гаийдин башқа һечкимни чөмдүрмидим. 15 Шуңа һечким мениң намимға чөмдүрүлдүм, дәп ейталмайду. 16 Раст, мән йәнә Истипанниң өйидикилириниму чөмдүрдим. Башқиларниң бирәвини чөмдүргиним есимда йоқ. 17 Мәсиһ мени чөмдүрүш үчүн әмәс, бәлки хуш хәвәрни җакалаш үчүн әвәтти. Вә Мәсиһниң азап түврүги пайдисиз болуп қалмаслиғи үчүн, уни инсан сөзиниң даналиғи билән җакалимаслиқ лазимдур.
18 Һалак болуватқанлар үчүн азап түврүги тоғрилиқ хәвәр — ахмақлиқ, биз, қутқузулуватқанлар, үчүн — Худаниң қудрити. 19 Йезилғинидәк: «Данишмәнләрниң даналиғини йоқ қилимән вә әқиллиқләрниң әқлини рәт қилимән». 20 Данишмән қени? Тәврат устази қени? Бу дунияниң бәсләшкүчиси қени? Пәрвәрдигар бу дунияниң даналиғини ахмақлиқ қиливәтмидиму? 21 Дуния өз даналиғи билән Худани тоналмиғанда, Худаниң даналиғи бойичә вәз қилиниватқан хәвәрниң ахмақлиғи билән ишәнгүчиләрниң қутқузулушини У мақул көрди.
22 Йәһудийлар карамәтләрни тәләп қилиду, греклар болса даналиқни издәйду, 23 лекин биз түврүктә өлтүрүлгән Мәсиһни вәз қилимиз. Бу йәһудийлар үчүн путликашаңлиқ, башқа хәлиқләр үчүн — ахмақлиқ. 24 Амма чақирилғанлар үчүн, улар йәһудийлар яки греклар болушидин қәтъий нәзәр, Мәсиһ — Худаниң күч-қудрити вә даналиғидур! 25 Чүнки Худаниң ахмақ нәрсиси адәмләрниңкидин даналиғарақ һәм Худаниң аҗиз нәрсиси адәмләрниңкидин күчлүгирәк.
26 Силәр, чақирилған қериндашлар, ким екәнлигиңларни көрүватисиләр: инсан даналиридин азирақ, күчлүкләрдин азирақ, келип чиқиши бойичә ақсүйәкләрдин азирақ чақирилди. 27 Лекин Тәңри дунияниң даналирини шәрмәндә қилиш үчүн, ахмақларни таллавалди вә дунияниң күчлүклирини шәрмәндә қилиш үчүн, аҗизларни таллавалди 28 вә моҗут болғанни әһмийәтсиз қилиш үчүн, Худа бу дунияниң әрзимәслирини һәм көзгә илмайдиғанларни таллавалди, 29 чүнки Пәрвәрдигарниң алдида һечбир инсан махтанмаслиғи үчүндур. 30 Униңға түпәйли силәр Мәсиһ Әйса билән бирликтә болуватисиләр, у биз үчүн Худадин кәлгән даналиқ, һәққанийлиқ һәм муқәддәслик вә төләм арқилиқ һәм азатлиқ болди. 31 Йезилғини орунлиниши үчүн: «Пәхирлинидиған киши Йәһва билән пәхирләнсун».