Ибранийларға
4 Шунда, Униң арамиға кириш вәдиси техи күчидә болғанлиқтин, араңларда кимду-бирсиниң лайиқсиз болуп қелишидин пәхәс болайли. 2 Бизгиму улардәкла хуш хәвәр җакаланди, лекин аңланған сөз уларға пайда елип кәлмиди, чүнки уларда итаәт қилған адәмләрниңкидәк етиқат болмиди. 3 Биз, етиқат билдүргәнләр, мошу арамға кириватимиз. Худа итаәтсизләр һәққидә ейтқинидәк: «Шуңа Мән ғәзивимдә: “Улар Мениң арамимға кирмәйду”,— дедим», гәрчә Униң ишлири дуния яритилған дәвирдә аяқлашқан еди. 4 Язмиларниң бир җайида йәттинчи күни тоғрисида У мундақ деди: «Худа йәттинчи күни барлиқ ишлиридин арам алди», 5 шундақла: «Улар Мениң арамимға кирмәйду».
6 Хуш хәвәр җакаланған дәсләпкилири итаәтсизлигидин униңға кирәлмигәнлигидин, ейтмақчи, бәзилири техи арамиға кириши мүмкин. 7 Мана, немишкә Худа Давутниң зәбур-нахшисида шунчә узақ вақит өткәндин кейин «бүгүн» дәветип, йәнә бәлгүлүк бир күнни орунлаштурди. Жуқурида ейтилғинидәк: «Бүгүн, әгәр Униң авазини аңлаватсаңлар, жүрәклириңларни таш қилмаңлар». 8 Әгәр Йәшуа Нун уларни арам җайға әкәлгән болса, Худа кейинәрәк башқа күн тоғрилиқ демигән болатти. 9 Шуңлашқа Пәрвәрдигарниң хәлқи үчүн техи шәнбилик арам қеливатиду. 10 Худаниң арамлиғиға киргән киши, Худа Өз ишлиридин арам еливатқандәк, уму өз ишлиридин арам тапиду.
11 Шуңа, мошу арам җайиға кириш үчүн, әшу итаәтсизлик үлгисигә әгишип, бирси жиқилмаслиғи үчүн, барлиқ имканийәттин пайдилинип тиришайли. 12 Худаниң сөзи тирик һәм һәрикәтлик, у һәрқандақ қошбислиқ қиличтинму иштиктур. У шунчилик чоңқур киридуки, җан билән роһни, өгиләр билән иликни айрип, ой-пикирләр билән жүрәкниң нийәтлирини ениқлайду. 13 Худа көрәлмәйдиған яратма йоқ, амма биз һесават Бәргүчиниң көзидә һәммә нәрсидәк ялиңач һәм очуқтур.
14 Хулләс, асманға чиққан улуқ башроһанийимиз — Худаниң Оғли Әйса бар екән, униңға болған етиқатимизни һармай-талмай елан қилайли. 15 Сәвәви, биздә аҗизлиқлиримизға һисдашлиқ қилалмайдиған әмәс, бәлки бизгә охшаш һәммә нәрсидә синилип, лекин гунасиз қалған башроһанийимиз бар. 16 Шуңа өз вақтида ярдәм елиш үчүн, мол меһирликкә еришишкә һәм рәһимликни тепишқа сөз әркинлиги билән Худаниң инайәт тәхтисигә йеқинлишайли.