Әлчиләр
8 Савл болса бу өлтүрүшни мақул көргән еди.
Шу күни Йерусалимда җамаәткә қарши қаттиқ тәқипләр башланди, әлчиләрдин башқа һәммиси Йәһудийә вә Самарийәгә тарқилип кәтти. 2 Лекин Худадин қорқудиған кишиләр Истипанни дәпин қилип, қаттиқ жиға-зерә көтүрүшти. 3 Шу вақитта Савл җамаәткә вәһшиләрчә зулум көрсәтти. Өйләргә бесип кирип, әр вә аялларни сөрәп чиқип, зинданға ташлиди.
4 Тарқилип кәткән шагиртлар барған җайлирида хуш хәвәрни җакалиди. 5 Шундақ қилип, Филип Самарийә шәһиригә барди вә у йәрдикиләргә Мәсиһ тоғрилиқ вәз ейтишни башлиди. 6 Көплигән адәмләр бирдәк Филипниң ейтқанлирини қобул қилип, карамәтлирини көргәч, қулақ салди. 7 У йәрдә җин чаплашқан инсанлар нурғун болуп, җинлар қаттиқ авазлар билән җақирап улардин чиқишатти. Шундақла нурғун паләч вә токулар сақийишти. 8 Шуниң билән, шәһәрдә әҗайип шат-хорамлиқ йүз бәрди.
9 Шу шәһәрдә Шимон исимлиқ бир киши бар еди, авал у сехиргәрлик билән шуғуллинип, Самарийә хәлқини һаң-таң қалдуруп, өзини улуқ дәп ататти. 10 Әрзимәсләрдин улуқларғичә һәммиси уни тиңшап: «Бу киши — Худаниң бүйүк қудрити»,— дейишәтти. 11 Уни тиңшиғанлиғиниң сәвәви, у җодигәрлиги билән уларни узақ вақит һәйран қалдурған еди. 12 Бирақ Худа Падишалиғи вә Әйса Мәсиһниң исми һәққидә хуш хәвәрни ейтиватқан Филипқа ишәнгән чағда, әрләрму вә аялларму чөмдүрүштин өтти. 13 Шимонму ишинип, чөмдүрүлди. Филиптин нери кәтмәй, униң қудрәтлик ишлирини вә карамәтлирини көрүп, әқли лал болди.
14 Йерусалимдики әлчиләр самарийәликләрниң Худа сөзини қобул қилғанлиғини аңлап, уларға Петрус билән Йоһанни әвәтти. 15 Улар берип, самарийәликләр муқәддәс роһ елиши үчүн дуа қилди, 16 чүнки улар Һакимдар Әйсаниң исмиға чөмдүрүлгән болсиму, муқәддәс роһ техи һечкимгә чүшмигән еди. 17 Шу чағда Петрус һәм Йоһан уларға қоллирини қойиведи, улар муқәддәс роһни алди.
18 Шимон әлчиләрниң қоллири арқилиқ бериливатқан роһни көрүп, уларға пул сунуп: 19 «Маңиму шундақ һакимийәт бериңлара, мәнму қолумни қойған киши муқәддәс роһни алсун»,— деди. 20 Амма Петрус униңға: «Күмүчиң өзәң билән һалак болсун, чүнки сән Худаниң соғисини пулға сетивелишни ойлаштурдиң! 21 Худаниң алдида жүригиңдики нийәт күпүрлүк болғанлиқтин, бу ишта сениң несивиңму һәм үлүшиңму йоқ. 22 Шу сәвәптин бу яманлиғиңға товва қилип, әгәр мүмкин болса, жүригиңниң бузуқ нийити кәчүрүлүши үчүн Йәһваға ялвур! 23 Чүнки қәлбиң оғилиқ сәпраға һәм һәққанийсизлиққа толғинини көрүп туримән»,— деди. 24 Шимон җававән: «Ейтқанлириңларниң һечқайсиси бешимға кәлмисун дәп, мениң үчүн Йәһваға дуа қилиңлара»,— дәп сориди.
25 Йәһваниң сөзини хәвәрләп, асаслиқ гува бәргәндин кейин улар Йерусалимға қайтип, йолда хуш хәвәрни самарийәликләрниң нурғун йезилирида җакалиди.
26 Филипқа болса Йәһваниң пәриштиси мундақ деди: «Орнуңдин қозғал вә Йерусалимдин Газиға чүшүватқан җәнуптики йолға қарап маң». У чөлдики йол еди. 27 Филип шундақ қилди. Йолда ефиоплиқ падиша аялниң пүткүл ғәзнисигә қарайдиған, жуқури дәриҗини егиләйдиған бир әмәлдарни учраштурди. У Йерусалимға ибадәт қилиш үчүн келәтти, 28 әнди болса вәтинигә қайтиветип, төмүр һарвусида олтирип, Йәшая пәйғәмбәрниң бәшаритини үнлүк оқувататти. 29 Роһ Филипқа: «Әшу һарвуға йетишивелип, униңға һәмра бол»,— деди. 30 Филип жүгәрди. Йениға йәткәндә униң Йәшая пәйғәмбәрниң бәшаритини оқуватқинини аңлап: «Оқуғанлириңизни чүшиниватамсиз?»— дәп сориди. 31 У болса: «Әгәр маңа бирси чүшәндүрүп бәрмисә, қандақму чүшинәләймән»,— дәп җавап қайтурди. Һәм Филипниң йениға чиқип олтиришни тәклип қилди. 32 Оқулуватқан Муқәддәс Язминиң җайи мундақ еди: «Уни қойдәк боғузлашқа елип маңди һәм қоза қирқиғучиниң алдида үн-түн чиқармай ятқандәк, уму еғизини ачмиди. 33 У пәсәйтилип, адил соттин мәһрум қилинди. Униң келип чиқиши һәққидә ким чүшәндүрүп бериду? Чүнки униң җени йәрдин елинмақта».
34 Әмәлдар Филиптин: «Илтимас, ейтип бериңа: пәйғәмбәр ким һәққидә ейтиватиду? Өзи яки башқиси тоғрисидиму?»— дәп сориди. 35 Филип еғизини ечип, Муқәддәс Язминиң мошу җайидин тартип, Әйса тоғрисида хуш хәвәрни ейтишқа башлиди. 36 Улар йолини давамлаштуруп, суниң йениға кәлди вә әмәлдар униңға: «Мана су, мениң чөмдүрүлүшимгә немә тосқунлуқ қилалайду?»— деди. 37 *—— 38 У һарвуни тохтитишни буйриди, Филип билән әмәлдар иккиси суға чүшүп, Филип уни чөмдүрди. 39 Улар судин чиққанда, Йәһваниң роһи дәрру Филипни елип кәтти вә әмәлдар уни башқа көрмиди, лекин у хурсәнлик билән йолини давамлаштурди. 40 Филип болса Ашдодқа кәлтүрүлинип, әшу җайларда жүргәч, Қәйсәрийәгә йетип барғичә барлиқ шәһәрләрдә хуш хәвәрни тарқатти.