Римлиқларға
7 Қериндашлар, (мән Тәврат қанунини билгәнләргә дәватимән) Қанунниң инсан пәқәт һаят вақтидила үстидин һөкүмранлиқ қилидиғинини билмәмсиләр? 2 Мәсилән, некадики аял ери һаят болған вақтида қанун бойичә еригә бағлиниду. Лекин ери өлүп кәтсә, у ериниң қанунидин азат қилиниду. 3 Шуниң үчүн, әгәр у ери һаят вақтида башқа әрниң аяли болса, зинахор дәп атилиду. Амма ери өлүп кәтсә, у ериниң қанунидин әркин болиду һәм башқа әргә тәгсә, нека вапалиғини бузмайду.
4 Худди шуниңдәк, қериндашлирим, силәрму башқисиға — өлүмдин тирилгән Әйсаға мәнсүп болуш һәм Худаға ярамлиқ мевиләрни әкелишкә Мәсиһниң қурбанлиғи арқилиқ Тәврат кануни үчүн өлдиңлар. 5 Биз тәнниң илкидә яшиғинимизда, Қанун ойғитидиған әзалиримиздики шәһваний һәвәслиримиз өлүмгә елип баридиған мевини әкеләтти. 6 Лекин, бизни мәккәм тутуп турған кона Қанунға қул болмаслиғимиз үчүн, бәлки йеңи мәнада — роһ бойичә қул болуш үчүн, әнди биз Қанундин әркин болдуқ.
7 Ундақта, немә дәймиз? Тәврат қануни — гунаму? Һәргиз, яқ! Қанун болмиған болса, мән гунаниң немә екәнлигини билмәттим. Мәсилән, Қанун «башқисиниңкини халима» демигән болса, башқисиниңкини халаш гуна екәнлигини билмәттим. 8 Лекин гуна әмир арқилиқ дәвәт қилинип, мениңда һәрхил һәвәсләрни қозғиди, чүнки Қанунсиз гуна өлүк еди. 9 Әсли Тәврат қанунисиз бир чағларда мән тирик едим. Амма вәсийәт пәйда болғанда, гуна тирилди, мән болсам өлдүм. 10 Шуниң билән, һаятқа башлайдиған әмир өлүмгә әкелидиғинини көрдүм. 11 Гуна вәсийәт арқилиқ қутрап, мени өзигә мәптун қилип, һалакәткә елип кәлди. 12 Шуңа Қанун муқәддәс һәм вәсийәтму муқәддәс, һәққаний вә меһривандур.
13 Ундақта, яхши нәрсә мени өлтүрдиму? Һәргиз! Гуна у яхши нәрсә арқилиқ маңа өлүм әкелиши униң тәбиитини ечип бәрди. Вәсийәт арқилиқ гуна нәқәдәр һалакәтлик екәнлиги паш қилинди. 14 Тәврат қануниниң роһий екәнлигини билимиз, һә, мән гунаға сетиветилгән инсандур. 15 Немә қиливатқинимни билмәймән. Халиғинимни қилмаймән, өч көргинимни болса, шуни қилимән. 16 Әгәр халимиғинимни қилсам, Қанунниң яхши екәнлигини иқрар қилимән. 17 Ундақта бу яманлиқни мән қилмаймән, бәлки ичимдә моҗут болған гуна қиливатиду. 18 Ичимдә, йәни мениң тенимдә, яхшилиқ моҗут әмәслигини билимән, чүнки яхши нийитим бар болсиму, уни қилалмаймән. 19 Өзәм халиған яхшилиқни қилмай, әксичә халимиған яманлиқни қайта-қайта қилимән. 20 Әгәр халимиған нәрсини қилсам, буни қиливатқан мән әмәс, бәлки ичимдә яшаватқан гунадур.
21 Демәк, мениң мисалимда мундақ бир қанунни байқаймән: тоғра нәрсини қилмақчи болғинимда, мениңда яманлиқ ашкарилиниду. 22 Ички адимим бойичә Худа қанунидин бәһирлинимән, 23 бирақ әзалиримда әқлимниң қануниға қарши чиқидиған башқа қанунни көримән. Бу қанун мени әзалиримда моҗут болған гуна қануниниң мәһбуси қилиду. 24 Немә дегән бәхитсиз адәммән! Ким мени мошу өлүватқан тәндин қутулдуриду? 25 Һакимдаримиз Әйса Мәсиһ арқилиқ Худаға миң бир шүкүр! Раст, әқлим билән мән Худа қануниниң қули, лекин теним билән гуна қануниниң қулимән.