Әлчиләр
28 Қутқузулғинимиздин кейин аралниң нами Мальта екәнлигини билдуқ. 2 Йәрлик турғунлар бизгә әҗайип меһриванлиқ көрсәтти. Ямғур йеғип соғ болғанлиқтин, улар гүлхан йеқип, барлиғимизни күтүвалди. 3 Паул бир қучақ шахни жиғип, гүлханға ташлиғанда, отниң иссиғидин қачқан зәһәрлик сур илан, униң қолиға есилди. 4 Қолидики зәһәрлик иланни көрүп, аралниң турғунлири өзара: «Бу адәм нәқ қатил екәндә! Гәрчә у деңиздин аман чиқсиму, адиллиқ уни тирик қалдурмайдекән»,— деди. 5 Амма Паул зәһәрлик иланни отқа силкиветип, һечқандақ зиян тартмиди. 6 Улар қолида ишшиқ пәйда болуп, һарарити көтирилип, яки туюқсиз у жиқилип, өлүшини күтти. Хелә вақит күтүп, амма униң билән һечбир яман нәрсә болмиғинини көрүп, улар униң тоғрисида пикрини өзгәртип, уни худа дейишкә башлиди.
7 Шу җайдин жирақ әмәс йәрдә Публий исимлиқ бир адәмниң зиминлири болған һәм у шу аралниң башчиси еди. У бизни хурсәнлик билән қарши елип, үч күн мәртләрчә меһмандостлуқ көрсәтти. 8 Шу вақитта Публийниң атисиниң һарарити көтирилип, ичи өтүш кесәлдин азаплинип ятатти. Паул йениға кирип, дуа қилип, қоллирини униңға қоюп, сақайтти. 9 Бу вақиә йүз бәргәндин кейин, аралдики ағриқларға муптила болған кишиләр униңға келип, сақийишти. 10 Улар бизни көплигән соғилар билән һөрмәтлишип, биз у йәрдин йолға чиққанда, барлиқ керәклик нәрсиләр билән тәминлиди.
11 Үч айдин кейин биз Искәндәрияниң кемисигә олтардуқ, у қишни аралда өткүзгән еди вә униң тумшуғида «Зевсниң оғуллири» дегән зенити бар болғанди. 12 Сиракузидики кемәҗайға кирип, үч күнни шу йәрдә өткүздуқ. 13 У җайдин йөнилишни өзгәртип, Регийға кәлдуқ. Бир күндин кейин җәнубий шамал чиқти һәм иккинчи күни Путейолиға йетип кәлдуқ. 14 Бу йәрдә биз қериндашларни таптуқ вә улар биздин йәттә күн қелишимизни өтүнди. Шундақ қилип, андин биз Римға йеқинлаштуқ. 15 У йәрдики қериндашлар биз тоғрилиқ йеңилиқни аңлап, қарши елиш үчүн, Аппий базириғичә һәм Үч меһманханиғичә кәпту. Уларни көрүп, Паул Худаға шүкүр ейтти һәм илһамланди. 16 Ахири Римға кәлгинимиздә, Паулға алайтән, әскәрниң қоғдиши астида, яшашқа рухсәт қилинди.
17 Үч күндин кейин Паул еврейларниң арисидики тәсирлик адәмләрни өзигә чақирди. Улар жиғилғанда, у уларға мураҗиәт қилип: «Бурадәрләр, гәрчә мән йә хәлқимизгә қарши, йә әҗдатлиримизниң адәтлиригә қарши һечнәрсә қилмисамму, вәтәндашлар мени мәһбустәк Йерусалимдин римлиқларниң қолиға тапшурди. 18 Сораққа тартип, улар мени азат қилишни халиди, чүнки мениңда өлүмгә лайиқ һечнәрсә тепилмиди. 19 Амма йәһудийлар азатлинишимға қарши болғанлиқтин, мән қәйсәргә мураҗиәт қилишқа мәҗбур болдум, амма-лекин өз хәлқимни бирәр нәрсидә әйипләш үчүн әмәстур. 20 Шуңлашқа мән силәр билән көрүшүшкә һәм сөзлишишкә илтимас қилдим, чүнки Исраилниң үмүти үчүн мән мошу зәнҗирләрдә болмақта»,— деди. 21 Улар җававән униңға: «Биз Йәһудийәдин сән тоғрисида хәтләрни алмидуқ һәм кәлгән бурадәрләрниң бирсиму сән тоғрисида һечбир яманлиқни ейтмиди. 22 Лекин биз ойлаймизки, сән өзәңдин көзқарашлириң һәққидә аңлишимиз орунлуқ, чүнки биз һәқиқәтән шуни билимизки, барлиқ җайларда мошу мәзһәпкә қарши чиқиватиду»,— дейишти.
23 Андин күнни бәлгүләп, униң өйигә техиму көп кишиләр келишти. Паул әтигәндин кәч киргичә уларға ишниң маһийитини чүшәндүрүп, Худа Падишалиғи һәққидә асаслиқ гува бәргәч, Муса қанунидин һәм Пәйғәмбәрләр китаплиридин Әйса тоғрилиқ ишәшлик дәлилләрни кәлтүрди. 24 Бирлири ейтилғанларға ишәнди, башқилири ишәнмиди. 25 Улар бир-бири билән келишәлмиди, шуңлашқа тарқашқа башлиди. Шунда Паул:
«Муқәддәс роһ атилириңларға Йәшая пәйғәмбәр арқилиқ дурус ейтиптекән: 26 “Берип, мону хәлиқкә ейтқин: “Қулақ селип, тиңшайсиләр, лекин чүшинәлмәйсиләр һәм синчилап қарайсиләр, бирақ көрәлмәйсиләр. 27 Чүнки бу хәлиқниң жүриги қопаллишип кәтти, улар қулақлири билән тиңшайду, лекин инкас қайтурмайду. Көзлири билән көрмәслиги үчүн уларни қаттиқ жумувалди. Шуниңдәкла қулақлири билән аңлимаслиғи һәм жүриги билән чүшәнмәслиги үчүн вә Маңа қайтип кәлмәслиги һәм Мән уларни сақайтмаслиғим үчүндур”. 28 Демәкчи, силәргә мәлум болсунки, Худаниң қутқузулуши һәққидики хәвәр башқа хәлиқләргә әвәтилди һәм улар чоқум қулақ салиду»,— деди. 29 *——
30 Шундақ қилип, Паул иҗаригә алған өйдә толуқ икки жил яшап, униңға кәлгән барлиғини шат-хорам қобул қилди. 31 У Худа Падишалиғини җасурларчә вәз қилип, Һакимдаримиз Әйса Мәсиһ тоғрисида сөзни бүйүк әркинлиқ билән үгәтти вә тосқунлуқларни учратмиди.