Мәтта
3 Шу күнләрдә Йәһия Чөмдүргүчи келип, Йәһудийә чөлидә вәз қилишқа башлап, 2 мундақ деди: «Товва қилиңлар, чүнки асман Падишалиғи йеқинлашти». 3 Йәшая пәйғәмбәр арқилиқ: «Қулақ селиңлар! Кимду-бирси чөл-баяванда: “Йәһваниң йолини тәйярлаңлар! Униң үчүн йоллириниңларни түз қилиңлар”,— дәп вақиримақта», дегән сөзләр у һәққидә ейтилған еди. 4 Йәһия төгә жуңидин кийим кийгән һәм белидә терә бәлбеғи болуп, униң озуғи чекәткиләр вә явайи һәсәл еди. 5 Әшу вақитта Йерусалимдин, барлиқ Йәһудийәдин һәм Йордан дәрияси әтрапидин униңға адәмләр кәлди. 6 Улар өз гуналирини очуқ иқрар қилип, Йордан дәриясида у уларни чөмдүрди.
7 Чөмдүрүш җайиға көплигән пәрисийләр* һәм садуқийлар* келиватқинини көргән Йәһия уларға: «Һәй, иланниң нәсли, ким силәрни йеқинлишиватқан ғәзәптин қечишқа үгәтти? 8 Товвилириңларға лайиқ ишларни қилиңлар 9 вә өзәңларға: “Бизниң атимиз — Ибраһим”, дегүчи болмаңлар. Силәргә ейтимәнки, Худа мону ташлардин Ибраһимға әвлат яритип берәләйду. 10 Һәтта палтиму дәрәқләрниң йилтизида ятмақта. Яхши мевиләрни бәрмәйдиған һәрқандақ дәрәқ чепилип, отқа ташлиниду. 11 Мән силәрни суда чөмдүримән, чүнки силәр товва қиливатисиләр, бирақ мениң кәйнимдин келиватқан мениңдин күчлүктур һәм мән униң сәндилини йешип қоюшқиму лайиқ әмәсмән. У силәрни муқәддәс роһта һәм отта чөмдүриду. 12 Униң қолида соруш үчүн гүҗәк бар. У өз хаминини тазилап, өз буғдийини амбарларға жиғиду, саманни болса, өчмәйдиған отта көйдүрүветиду»,— деди.
13 Ушбу күнләрдә Әйса Җәлилийәдин чөмдүрүш рәсимидин өтүш үчүн, Йордан дәриясиға Йәһияниң йениға кәлди. 14 Лекин Йәһия унимай, униңға: «Сән мени чөмдүрүшиң лазим едиғу, сән болсаң, немишкә маңа кәлдиң?»— деди. 15 Әйса униңға җававән: «Мени тохтатма, чүнки мошундақла қилип, Худаниң һәққаний әмрини әмәлгә ашуримиз»,— деди. Шуниң билән Йәһия уни тохтатмиди. 16 Әйса чөмдүрүлгәндин кейин дәрһал судин чиқти. Шу мәзгилдә асман ечилип, Әйсаға кәптәр қияпитидә чүшүп келиватқан Пәрвәрдигарниң роһини Йәһия көрди. 17 Һәм асмандин бир аваз: «Бу Мән мақуллайдиған Мениң сөйүмлүк Оғлум»,— деди.