Тимотийға 1-хәт

2 Һәммидин авал, һәрқандақ инсанлар үчүн ялвурушларни, дуаларни, илтимасларни вә шүкүрләрни Тәңригә ейтишни җекиләймән. 2 Бизгә буниңдин кейинму хатирҗәм һәм теч һаятни Худаға болған пүтүнләй вапалиқта һәм җиддийлиқта өткүзүшимиз үчүн, падишалар вә барлиқ мәртивилик әмәлдарлар үчүн дуаларни қилиңлар. 3 Бу Қутқузғучимиз Худаниң алдида яхши һәм тоғра иштур. 4 У һәрқандақ адәмләрниң қутқузулушини вә һәқиқәтниң тоғра билимигә келишини халайду. 5 Бир Худа һәм Худаниң вә кишиләрниң арисида бирла васитичи бар, у — адәм Мәсиһ Әйса. 6 У өзини һәммиси үчүн мувапиқ төләмдәк бәрди вә бу тоғрисида өз вақтида гувалиқ берилиши лазим. 7 Мошу гувалиқ паалийити үчүн мән вәзичи һәм әлчи — растини ейтиватимән, алдимаймән — һәқиқәт һәм етиқатқа үгитишим үчүн башқа хәлиқләрниң устази болуп қоюлдум.

8 Шуңа һәрқандақ җайда әр кишиләр талаш-тартишсиз, ғәзәпсиз, вапалиқта қоллирини көтирип дуа қилишини халаймән. 9 Шуниңдәк, аялларниңму алаһидә өрүлгән чачлири вә алтун яки мәрвайит, яки тазимму қиммәт кийим-кечәкләр билән әмәс, бәлки өзлирини кичикпеиллиқ һәм әқилгә мувапиқ пакиз кийим билән зенәтлишини халаймән. 10 Пәрвәрдигарға вападармән, дегән аялларға охшаш — яхши ишлири билән ясансун.

11 Аял киши баш егиши билән үнсиз тәлим алсун. 12 Йә тәлим беришигә, йә әр кишиниң үстидин башқурушиға аял кишигә рухсәт бәрмәймән, әксичә, җим турсун. 13 Чүнки авал Адәм ата, андин кейин Һава ана яритилған еди. 14 Адәм ата әмәс, бәлки аял киши пүтүнләй ялғанчилиққа берилип, қилмиш қилди. 15 Амма аял киши үчүн бала туғуш һимайә болиду, әгәр пәқәт етиқатта, меһир-муһәббәттә вә сағлампикирлик муқәддәсликтә туруп қалса.