Мәтта
28 Шәнбидин кейин, һәптиниң дәсләпки күниниң таң атқинида, Мәрийәм Мәҗдала вә башқа Мәрийәм қәбирни көрүшкә кәлди.
2 Бирдәмдила күчлүк йәр тәврәш йүз бәрди, чүнки Йәһваниң пәриштиси асмандин чүшүп, қәбирниң тешини нери домулитип, шуниң үстидә олтиратти. 3 Қияпити униң чақмаққа охшатти, кийими болса, қардәк ақ еди. 4 Қорққинидин униң алдида күзәтчиләр титрәп, өлүкләрдәкла болуп қалди.
5 Пәриштә аялларға: «Қорқмаңлар. Мән билимән, силәр түврүктә өлтүрүлгән Әйсани издәватисиләр. 6 У бу йәрдә йоқ. Ейтқинидәк, у тирилди. Келип, у ятқан җайға қарап беқиңлар. 7 Һәм чапсанирақ берип, униң өлүмдин тирилгини тоғрилиқ шагиртлириға ейтиңлар, шундақла уларға: “У силәрни Җәлилийәдә күтиду. Шу йәрдә уни көрисиләр”, дәңлар. Мошуни мән силәргә ейтишим керәк еди»,— деди.
8 Аяллар алдириған һалда қәбирдин чиқип, қорқуш һәм зор хошаллиқ илкидә буниң һәммиси тоғрилиқ униң шагиртлириға ейтип беришкә жүгриди. 9 Йолда уларни Әйса учритип, саламлашти. Улар йеқинлишип, тизланғач униң аяқлирини тутувалди. 10 Әйса шу чағда уларға: «Қорқмаңлар! Берип, қериндашлиримға Җәлилийәгә беришини ейтиңлар. Шу йәрдә улар мени көриду»,— деди.
11 Улар йолда болғанда, күзәтчиләрниң бәзилири шәһәргә келип, чоң роһанийларға йүз бәргән барлиқ нәрсә тоғрилиқ ейтип бәрди. 12 Улар болса ақсақаллар билән биллә җәм болуп, мәслиһәтлишип, әскәрләргә нурғун күмүч тәңгиләрни бәрди 13 һәм уларға җекилиди: «Мундақ дәңлар: “Униң шагиртлири түндә келип, биз ухлаватқан мәзгилдә уни оғрилап кетипту”. 14 Әгәр мошу һәққидә һакимға мәлум болса, биз уни ишәндүрүп, силәрни җазадин қутулдуримиз». 15 Әскәрләр күмүч тәңгиләрни елип, шулар үгәткәндәк қилди. Шуниң билән, мошу ялған сөзләр еврейлар арисида пүткүл җайларда мошу кәмгичә тарқилип кәлмәктә.
16 Он бир шагирт Әйса әвәткән Җәлилийәдики бир таққа барди. 17 Уни көрүп, гәрчә бирмунчилири Әйсаму, дәп гуманланған болсиму, униңға тазим қилди. 18 Әйса уларға йеқинлишип, мундақ деди: «Маңа асман һәм йәрдики пүткүл һакимийәт берилди. 19 Шу сәвәптин берип, барлиқ хәлиқләрдин Атам, Униң Оғли һәм муқәддәс роһниң намиға чөмдүрүп, шагиртларни тәйярлаңлар, 20 һәм мән силәргә буйриған барлиқ нәрсиләргә әмәл қилишини уларға үгитиңлар. Шуниң билән мошу дуния қурулуми аяқлашқичә, барлиқ күнләрдә мән силәр билән болумән».