Тимотийға 1-хәт
6 Қуллуқ боюнтуруғи астида болуватқанлар Худаниң исми һәм тәлимати һақарәтләнмәслиги үчүн, ғоҗайинлирини шәрәпкә лайиқ дәп санисун. 2 Ғоҗайинлири етиқатдаш болғанлар, уларни қериндашлар дәп, етиварсизлиқ көрсәтмисун. Әксичә, уларға техиму көпирәк тәйярлиқ билән хизмәт қилсун, чүнки уларниң вижданлиқ хизмитидин пайда еливатқанлар — етиқатдашлар һәм қәдирданлардур.
Мошуниңға үгитип, дәвәт қил. 3 Әгәр бирси башқа нәрсигә үгитип, Һакимдаримиз Әйса Мәсиһтин һәм Худаға болған вапалиққа мувапиқ тәлиматтин кәлгән сағлам сөзләр билән келишмисә, 4 у чағда шу киши тәкәббурлишип, һечнемә чүшәнмәйдиған, лекин сөзләр үчүн болған маҗраларға һәм талишишларға петип қалғандур. Бу болса көрәлмәсликкә, талаш-тартишларға, һақарәтлик гәпләргә, вәһши гуманларға, қуруқ җедәлләргә елип келиду. 5 Уларни нийити бузулған һәм һәқиқәттин мәһрум болған кишиләр пәйда қилиду. Улар Худаға болған вападарлиқ — бу пайда көрүшниң имканийити, дәп ойлайду. 6 Әлвәттә, Худаға болған вападарлиқ һәм өзиниңки бар нәрсиси билән қанаәтлиниш — бу көп нәрсигә егә болушниң имканийитидур! 7 Чүнки биз дунияға һечнемә елип кәлмидуқ, шуниңдәкла униңдин һечнемини елип кетәлмәймиз. 8 Шуңа, йемәк-ичмәк, кийим-кечәк һәм маканимиз болса, шуларға рази болайли.
9 Бай болушни нийәт қилғанлар болса, аздурулушқа, қапқанға вә көплигән әқилсиз һәм ховуплуқ арзу-һәвәсләргә чүшүп кетиду. Улар кишиләрни вәйранчилиққа һәм һалакқа әкелиду. 10 Сәвәви, барлиқ яманлиқниң йилтизи — пулпәрәсликтур, бәзилири мошуниңға берилип, етиқаттин чәтнәп, өзлирини нурғун дәрт-азапларға салди.
11 Сән, Худаниң адими, буниңдин қачқин, әксичә, һәққанийлиққа, Худаға болған вапалиққа, етиқатқа, меһир-муһәббәткә, тәқабиллиққа һәм мулайимлиққа интилғин. 12 Етиқатниң шавкәтлик күришини жүргүзүп, мәңгү һаятни чиң тут. Сән әшу мәңгү һаятқа чақирилдиң һәм униң һәққидә көплигән гувачилар алдида әҗайип вә очуқ җакалидиң.
13 Һәммәйләнниң һаятлиғини сақлаватқан Худаниң вә гувачи сүпитидә Понтий Пилатниң алдида әҗайип сөзлигән Мәсиһ Әйсаниң алдида саңа буйримәнки, 14 Һакимдаримиз Әйса Мәсиһниң ашкарә болушиғичә дағсиз һәм нуқсансиз болуп, мошу вәсийәткә әмәл қилғин. 15 Бу ашкарилиниш бәлгүләнгән вақитта йүз бериду, йәни бәхитлик вә ялғуз Ғоҗайин, падишаларниң Падишаси һәм һакимларниң Һакимдари өз күчини намайән қилиду. 16 У бирдинбир өлмәсликкә егә болған, йеқинлишишқа мүмкин болмас нурда яшайдиған, инсанларниң һечқайсиси көрмигән вә көрәлмәйдиған шәхстур. Униңға шан-шәрәп вә әбәдий қудрәт болғай! Амин.
17 Мошу заманниң байлириға әскәрткин: мәғрурланмай вә йоқап кетидиған байлиққа таянмай, бәлки бизгә һәммини раһәтлинишкә мол бериватқан Худаға таянсун. 18 Улар яхшилиқ қилип, хәйрихаһлиқ ишлар билән бейип, мәрт болуп, бөлүшүшкә тәйярлиқ көрсәтсун. 19 Мошундақ қилип, һәқиқий һаятлиқни мәккәм тутуш үчүн, келәчәккә яхши асас болудиған — сақлинип қалидиған ғәзнини жиғсун.
20 Һәй, Тимотий, саңа берилгән аманәтни сақла. Муқәддәсликни вә Худани булғайдиған қуруқ параңлардин һәм билим аталмиш, амма һәқиқәтқә қариму-қарши туридиған тәлимләрдин нери бол. 21 Бәзиләр мошундақ сахта билим билән көрәңләп, етиқаттин чәтниди.
Мол меһирлик силәргә яр болсун!