Коринтлиқларға 1-хәт
10 Силәрни, қериндашлар, бизниң атилиримизниң һәммиси булут астида болуп, барлиғи деңиздин өткәнлиги һәққидә хәвәрсиз қалдурушни халимаймән. 2 Улар барлиғи булут һәм деңиз арқилиқ Муса пәйғәмбәргә чөмдүрүлгән еди 3 вә һәммиси охшаш роһий ғизани йәп, 4 охшаш роһий ичимликни ичкән. Улар кәйнидә маңған роһий қиядин ичкән һәм бу қия таш Мәсиһниң рәмзи еди. 5 Шундақтиму, уларниң көпинчисигә Пәрвәрдигар разилиғини билдүрмиди вә улар чөлдә һалак болди.
6 Улардәк яманлиқни халимаслиғимиз үчүн, бу бизгә мисал болуп қалди. 7 Уларниң бирмунчилириға охшаш бутпәрәсләр болмаңлар, йезилғинидәк: «Хәлиқ йәп-ичишкә олтарди, андин тамашә қилишқа турди». 8 Уларниң бәзилиридәк зинахорлуққа берилмәңлар, улар зина қилип, бир күндә 23 000 киши өлтүрүлди. 9 Уларниң бирмунчилиридәк Йәһвани синимайли, улар шундақ қилип, иланлардин һалак болди. 10 Бәзилиридәк налә қилмаңлар, улар һалак қилғучи тәрипидин йоқ қилинди. 11 Буниң һәммиси улар билән йүз бәрди һәм дунияниң ахири кәлгән вақитта яшаватқан биз үчүн әскәртмә мисаллардәк йезилған еди.
12 Шуңлашқа, ким туримән дәп ойлиса, жиқилип кетиштин байқисун. 13 Силәр дучар болуватқан аздурулушлар барчә адәмләр үчүн адәттики нәрсиләр. Лекин Худа садиқтур вә У силәрниң күчүңлардин артуқ аздурулушиңларға йол қоймайду, бәлки синақ вақтида көтирәлишиңлар үчүн чиқиш йолини бериду.
14 Шуңа, әзизлирим, бутпәрәсликтин қечиңлар. 15 Сағлампикирлик адәмләр билән сөзләшкәндәк муңдишиватимән, немә тоғрилиқ ейтиватқинимни — өзәңлар ойлаңлар. 16 Биз шүкүр ейтидиған бәрикәтләнгән қача Мәсиһниң қениға ортақлиқни билдүрмәмду? Һәм биз уштуватқан нан Мәсиһниң тениға ортақлиқни билдүрмәмду? 17 Нан бир болғачқа, гәрчә биз нурғун болсақму,— биз бир тән, чүнки һәммимиз бир нандин йәймиз.
18 Җисманий Исраилға қарап беқиңлар: қурбанлиқларни йегәнләр қурбангаһ арқилиқ Худа билән несипдаш әмәсму? 19 Әнди немә дәй? Бутқа аталған қурбанлиқ яки бут өзи бирәр әһмийәткә егиму? 20 Яқ, бирақ тәкитләймәнки, башқа хәлиқләр әкәлгән қурбанлиқлар Худаға әмәс, җинларға әкелиниду. Мән силәрниң җинлар билән несипдаш болушиңларни халимаймән. 21 Силәр Йәһваниң қачисидин һәм җинларниң қачисидин ичәлмәйсиләр, «Йәһваниң дәстихинидин» һәм җинларниң дәстихинидин йәләлмәйсиләр. 22 Йә «Йәһваниң қизғинишини қозғаймизму?» Биз Униңдин күчлүкму?
23 Һәммә нәрсә рухсәтлик, амма барлиғи пайдилиқ әмәс. Һәммә нәрсә қануний, бирақ барлиғи мустәһкәмлимәйду. 24 Һәрким өзиниң пайдисини әмәс, башқисиниң пайдисини издисун.
25 Гөш базирида сетиливатқан һәммә нәрсини сүрүштүрмәй, хатирҗәм виждан билән йәңлар, 26 чүнки «йәр-зимин һәм уни толтуридиған һәммә нәрсә Йәһваға мәнсүптур». 27 Әгәр етиқати йоқлардин бирси силәрни меһманға чақирса һәм силәрниң барғиңлар кәлсә, алдиңларға қоюлған һәммә йемәкликни сүрүштүрмәй, пак виждан билән йәңлар. 28 Бирақ, әгәр бирси силәргә: «Бу бутқа қурбанлиқ қилинған гөш» десә, у чағда хәвәрлигүчи һәм виждан үчүн йемәңлар. 29 Мән «виждан» дәп, силәрниңкини әмәс, бәлки һелиқи кишиниң вижданини ейтиватимән. Немә үчүн мениң әркинлигимни башқа бирсиниң виждани һөкүм қилишиға йол қоюшум керәк? 30 Әгәр мән Худаға шүкүр ейтип йесәм, башқилири буниң үчүн һөкүм қилса, унда мән дурус иш қиливатимәнму?
31 Шуңа йесәңларму яки ичсәңларму, яки башқа бир нәрсә қилсаңларму, һәммә нәрсини Яратқучиниң шәрипигә қилиңлар. 32 Мәйли йәһудийлар, мәйли греклар, мәйли Худаниң җамаити үчүн путликашаң таш болмаңлар. 33 Мәндәк һәммисигә барчә нәрсидә йеқиш үчүн, өзәмгә пайда издәш әмәс, бәлки нурғунлириниң қутқузулуши үчүн иш қилғинимдәк, силәрму шундақ қилиңлар.