Римлиқларға
2 Шуңлашқа ким болушуңдин қәтъий нәзәр, һәй, инсан, әгәр сән башқа бирсиниң үстидин һөкүм қилидиған болсаң, саңа ақлиниш йоқ. Чүнки башқиниң үстидин һөкүм қилсаң, өзәңни һөкүмгә тартиватисән, чүнки сән өзәңму әшундақла ишларни қиливатисән. 2 Бизгә мәлумки, Худаниң һәқиқәткә уйғун соти ундақ ишларни қилғанларға қаритилғандур.
3 Бирақ, һәй инсан, шундақ ишларни қилғанлар үстидин һөкүм чиқирип һәм шуларға охшаш иш қилип, қандақларчә өзәң Тәңриниң һөкүмидин қачалаймән, дәп ойлайсән? 4 Яки Пәрвәрдигарниң меһриванлиғиниң байлиғини, чидамлиғини һәм мол сәвир-тақитини тәңситмәмсән? Йә Худаниң меһриванлиғи сени товва қилишқа башлайдиғанлиғини билмәмсән? 5 Амма җаһиллиғиңдин вә таш жүрәклигиңдин Униң адил соти аян болудиған ғәзәплик күнигә сән өз бешиңға чүшидиған ғәзәпни топлаватисән. 6 Худа һәркимгә униң ишлириға яриша һөкүм қилиду: 7 яхши ишта тәқабиллиқ билән шан-шәрәп, һөрмәт-еһтирам вә чиримаслиқни издигәнләргә мәңгү һаят әта қилиду, 8 лекин талаш-тартишқа амрақ һәм һәқиқәткә беқинмай, әксичә, һәққанийәтсизликкә беқинғанлар ғәзәп-қәһәргә учрайду. 9 Яманлиқ қилғучи һәрқандақ адәмниң җениға: алди билән йәһудийға, андин грекқа дәрт һәм азап-оқубәт келиду. 10 Яхшилиқ қилидиған һәрқандақ адәмгә: алди билән йәһудийға, андин грекқа шәрәп, һөрмәт вә течлиқ һәдийә қилиниду, 11 сәвәви, Худа үзгә қаримайду.
12 Демәк, Тәврат қануни астида болмай, гуна қилғанлар Қанунсиз һалак болиду. Тәврат қануниниң астида гуна қилғанлар болса, Қанун бойичә сораққа тартилиду. 13 Чүнки Қанунни аңлиғанлар Худаниң алдида һәққаний әмәс, бәлки Қанунға әмәл қилғучилар һәққаний, дәп елан қилиниду. 14 Һәрдайим Қануни йоқ башқа хәлиқләрниң кишилири тәбиий һалда бу Қанунға мувапиқ ишларни қилса, улар, гәрчә Қанунсиз болсиму, өзлири өзлиригә Қанундур. 15 Улар шуни көрситиватидуки, Қанунниң маһийити уларниң қәлблиридә йезилған, шуниңдәк уларниң вижданиму улар билән биллә гувалиқ бериватиду һәм өз ойлирида улар өзлирини яки әйипләйду, яки ақлайду. 16 Бу иш Худа Әйса Мәсиһ арқилиқ, мән җакалаватқан хуш хәвәргә бенаән, инсанларниң мәхпий әмәллирини һәм ой-пикирлирини сотлайдиған күни йүз бериду.
17 Өзәңни йәһудий дәп санап, Тәврат қануниға тайинип һәм Худаниң хәлқигә мәнсүп, дәп мәғрурлинисән. 18 Униң ирадисини билсәң һәм Қанун асасида тәрбийиләнгәнликтин, жуқури әһмийәтлик нәрсиләрни чүшинисән. 19 Шуниңға ишинисәнки, сән — қарғуларниң йетәклигүчиси, қараңғулуқта болғанларға йоруқлуқсән, 20 наданларниң түзигүчиси, гөдәкләргә тәлим бәргүчи һәм Тәврат қанунидики билим вә һәқиқәтниң асаслириға егә болғучиларниң устази. 21 У чағда қандақларчә сән башқиларни үгитип, өзәңни үгәтмәйсән? «Оғрилиқ қилма», дәп вәз қилип, өзәң оғрилиқ қилисән? 22 «Нека вапалиғини бузма» дәп, өзәң нека вапалиғини бузисән? Бутлардин нәпрәтлинип, өзәң бутханиларни оғрилайсән? 23 Қанун билән махтинип, өзәң шу Қанунға хилаплиқ қилип, Худаға дағ кәлтүрисән? 24 Муқәддәс Язмиларда йезилғинидәк: «Силәр үчүн башқа хәлиқләрниң арисида Рәббимизниң исми күпүрлүккә учримақта».
25 Тәврат қануниға әмәл қилсаң, хәтнә қилинғиниң пайда әкелиду, лекин Қанунға хилаплиқ қилсаң, сениң хәтнәң хәтнисизлик болиду. 26 Шуңлашқа хәтнисиз адәм Қанунниң адил тәләплиригә әмәл қилса, униң хәтнисизлиги хәтнилик болуп һесапланмамду? 27 Туғулушидин хәтнисиз, амма Қанунни орунлаватқан киши сени — йезилған Қануни һәм хәтнилиги барни, амма униңға хилаплиқ қиливатқанни әйипләйду. 28 Чүнки көрүниши йәһудий болсиму, уни йәһудий дегили болмайду вә сиртқи җисманий тәндики хәтниниму һәқиқий хәтнә дегили болмайду. 29 Бирақ ичидә йәһудий болған — шу һәқиқий йәһудий һәм йезилған Қанун топлими билән әмәс, бәлки роһ билән қәлбдә қилинған хәтнә — шу хәтнидур. Мундақ кишини махташ инсанлардин әмәс, бәлки Рәббимиздин болиду.