Пәнд-нәсиһәтләр
4 Балилирим, атаңларниң тәрбийисини елиңлар
Вә парасәтликкә еришиш
Үчүн диққәтлик болуңлар.
2 Чүнки мән пайдилиқ мәслиһәтләрни
Тәғдим қилимән, тәлимимни ташлимаңлар.
3 Мән өзәм атамниң яхши оғли едим
Вә анамниң сөйүмлүк пәрзәндимән.
4 Атам мени үгитип, мундақ ейтқан:
«Мениң сөзлиримни қаттиқ тутқин,
Вәсийәтлиримни орунлап, яша.
5 Даналиққа егә болуп, зерәкликни тап.
Мән ейтқан сөзлиримни унтума
Һәм улардин чәтнимә.
6 Даналиқни қалдурмисаң, у сениң
Һимайәң болиду. Уни яхши көрсәң,
Теч-аманлиқта истиқамәт қилисән.
7 Әң асаси — данишмәнлик, у һәммидин
Муһимдур, шуңа барлиқ мал-мүлкүң
Билән әқил-һошни тепишқа сәрип қил.
8 Уни һәммидин егиз қой һәм у сени көтириду.
Уни мәккәм қучақлисаң,
У сени шәрәпләп, абройға бөләйду.
9 У бешиңға яхшилиқ таҗисини кийгүзүп,
Әҗайип бир илтипат бериду».
10 Оғлум, маңа қулақ селип, нәсиһитимни
Алғин, шунда һаят күнлириң көпийиду.
11 Даналиқниң йолини саңа көрситәй,
Һәм дурус йолда жүргүзәй.
12 Сән маңғанда, қәдимиңгә һечнәрсә кашила қилмас,
Жүгрисәң, путлашмайсән.
13 Нәсиһәтни мәккәм тутуп, сақлиғин,
Чүнки у сениң һаятиңдур.
14 Қанунсизлар йолиға қәдәм ташлима
Вә зулумлар йоли билән маңма.
15 Униңдин қач, нери өтүп кәткин.
16 Чүнки улар яманлиқ қилмиса, ухлимас
Вә бирини жиқитмиса, уйқиси кәлмәс.
17 Улар гуна ненини йәп, рәнҗитиш
Шаравини тохтимай ичиватиду.
18 Һәққанийлар йоли нурлуқ қуяштәк,
У күнниң чүш мәзгилигә кәлгичә,
Ярқин вә парлақ йоруйду.
19 Рәзилләрниң йоли болса, қараңғулуқта,
Немигә путлишидиғинини билмәйду.
20 Оғлум, сөзлиримгә етивар бәргин,
Нәқиллиримгә қулақ салғин.
21 Улар көзлириңдин нери кәтмисун,
Уларни жүригиңниң қетида сақла,
22 Чүнки уларни тапқанлар һаятниң өзини
Вә пүтүн бәдини үчүн давани алғанлар.
23 Һәммидин авал жүригиңни сақла, чүнки
Униңдин һаятлиқ мәнбәлири чиқмақта.
24 Еғиз алдамчилиғини рәт қилғин вә
Тилниң садиқсизлиғини өзәңдин қоғла.
25 Көзлириң дайим уттур қарисун,
Кирпиклириң уларни алдиға қаратсун.
26 Аяқлириң маңидиған йолни түзә
Вә барчә йоллириң чиң болсун.
27 Йә оңға, йә солға бурулма вә
Путуңни зорлуқтин тартқин.