Ибранийларға
6 Шуңлашқа, Мәсиһ һәққидики башланғуч тәлимләрни кәйнимиздә қоюп, пишип-йетилишкә алдирайли, йәни қайтидин асас салмайли: өлүк ишларға товва қилиш вә Худаға етиқат бағлаш, 2 чөмдүрүшләр вә бирәвгә қол қоюшлар, өлгәнләрниң тирилиши вә мәңгү сот һәққидә тәлимләргә. 3 Худа йол бәрсә, пишип-йетилимиз.
4 Бир қетим һәқиқәт билән йорутулуп, асман һәдийәсиниң тәмини тетип, муқәддәс роһни вә 5 Рәббимизниң алийҗанап сөзини алғанларни һәм кәлгүси дунияниң күчлирини сәзгәнләрни, 6 амма чекингәнләрни болса, яңливаштин товва қилишқа әкелиш мүмкин әмәс, чүнки улар қайтидин Худаниң Оғлини түврүк өлүмигә тартип, уни аммивий шәрмәндиликкә қоймақта. 7 Худди шундақ, йәрму униңға көп қетим яққан ямғурни сиңирип, андин униңға ишлигәнләргә ярамлиқ өсүмлүкләрни өстүрсә, шуниң үчүн Худадин бәрикәт алиду. 8 Бирақ әгәр у тикәнләр вә қамқақ өстүргән болса, рәт қилинип, ләнәткә учрайду вә униң ахири — көйдүрүлүш.
9 Әзиз қериндашлар, биз гәрчә шундақ десәкму, яхшилиққа вә қутқузулушқа апиридиған йолда екәнлигиңларға ишинимиз. 10 Униң исмиға көрситилгән меһир-муһәббитиңларни һәм муқәддәсләргә хизмәт қилип вә һазирму давамлаштуруватқан әмгигиңларни унтуп қалғидәк, Худа һәққанийсиз әмәстур. 11 Лекин, биз шуни халаймизки, араңлардики һәрбириңлар мошундақ тиришчанлиқни көрситип, ахириғичә толуқ вә мәккәм үмүткә егә болуңлар. 12 Силәр һорунлишип кәтмәй, бәлки етиқати һәм чидамлиғи билән вәдиләргә мирасхор болғанларға тәқлит қилиңлар.
13 Худа Ибраһимға вәдә бәргәндә, Өзидин үстүн туридиған һечким болмиғачқа, Өзи билән қәсәм қилип, 14 мундақ деди: «Мән сени чоқум бәрикәтләймән һәм әвладиңни көп қилимән». 15 Ибраһим чидамлиқ көрсәткәндин кейинла мошу вәдигә еришти. 16 Адәмләр өзидин артуқ бирси билән қәсәм қилиду вә уларниң қәсими һәрқандақ талаш-тартишни қануний капаләт ретидә аяқлаштуриду. 17 Шуниңдәкла Худаму Өзиниң нийитиниң өзгәрмәслигини вәдиниң мирасхорлириға техиму көпирәк өлчәмдә көрситиш үчүн, ишқа қәсәм билән киришти. 18 Әсли ялған ейтмайдиған Худаниң бәргән икки өзгәрмәс нәрсиләр түпәйлидин, биз, башпаниға қечип киргәнләр, үмүтни тутушқа қаттиқ дәвәтимиз болуши лазим. 19 Бу үмүтимиз җан үчүн ләңгәрдәк ишәшлик һәм чиң вә бизни пәрдиниң кәйнигә әкириду. 20 Биз үчүн шу җайға авал Башламчимиз Әйса киргән еди, у Мәлкисадиққа охшайдиған башроһаний болди. У биз үчүн ечип, йол тәйярлиди.