Вәһий
20 Униңдин кейин мән асмандин қолида һаңниң ачқучи вә йоған зәнҗир бар бир пәриштиниң чүшүватқанлиғини көрдүм. 2 У әҗдиһани, йәни Иблис вә Шәйтан болғучи қедимий иланни тутуп, уни 1000 жилға кишәнлиди. 3 Хәлиқләрни әнди йолдин аздурмаслиғи үчүн, у әҗдиһани һаңға ташлап, уни қамап, һаңниң үстигә мөһүр басти. 1000 жил өткәндин кейин у қисқа вақитқа азатлиниши керәк.
4 Андин тәхтләрни вә уларда олтарғанларни көрдүм. Уларға сотлаш һоқуқи берилгән еди. Әйса вә Худа тоғрисида вәз қилип, шуниң үчүн палта билән чепилғанларниң җанлирини көрдүм. Улар жиртқуч һайванға вә униң тәсвиригә ибадәт қилмай вә пешаниси билән қолиға бәлгү қобул қилмиғанлар еди. Улар тирилип, Мәсиһ билән 1000 жил падишалиқ қилди. 5 Бу — биринчи тирилиш. (Өлгәнләрниң қалғанлири 1000 жил түгимигичә тирилмиди.) 6 Биринчи тирилиштә иштрак қилғанлар бәхитлик һәм муқәддәстур. Иккинчи өлүм уларға һөкүмранлиқ қилалмайду, әксичә улар Худаниң вә Мәсиһниң роһанийлири болуп, Мәсиһ билән 1000 жил һөкүмранлиқ қилиду.
7 1000 жил түгигәндин кейин Шәйтан зиндандин азат қилиниду. 8 У йәрниң төрт булуңидики хәлиқләрни, Гог билән Магогни аздуруп, уларни бирликтә урушқа жиғиду. У хәлиқләрниң сани деңиз қумидәк. 9 Улар пүткүл йәр йүзигә йейилип, муқәддәсләрниң қараргаһини вә әзиз шәһәрни қоршиди. Амма асмандин от чүшүп, уларни йоқатти. 10 Хәлиқләрни йолдин чиқарған Иблис болса, жиртқуч һайван билән сахта пәйғәмбәр көйүватқан от-гуңгутлуқ көлгә ташланди. Улар у йәрдә әбәттин-әбәт кечә-күндүз азап чекиду.
11 Мән йоған ақ тәхтни вә униңда Олтарғучини көрдүм. Униң үзидин йәр билән асман қачти, лекин уларға һечбир җай тепилмиди. 12 Шундақла мән тәхт алдида турған улуқ вә әрзимәс өлүкләрни көрдүм. Түртәкләр ечилди, һаят түртиги дегән йәнә бир түртәкму ечилди. Өлгәнләр түртәкләрдә йезилғанлар бойичә, қилған ишлириға яриша, сотланди. 13 Деңиз өзидики өлгәнләрни вә өлүм һәм қәбир өзидики өлүкләрни қайтурди. Һәрбир киши ишлириға нисбәтән сотланған еди. 14 Өлүм вә қәбир от көлигә ташланди. От көли иккинчи өлүмни билдүриду. 15 Исми һаят түртигигә йезилмиған һәрқандақ кишиму от көлигә ташланди.