Коринтлиқларға 1-хәт
2 Қериндашлар, мән силәргә кәлгәндә, өз гепим яки даналиғим билән силәргә тәсират қилиш үчүн кәлмидим, бәлки Худаниң муқәддәс сирини җакалаш үчүн кәлдим. 2 Мән араңларда түврүктә өлтүрүлгән Әйса Мәсиһтин башқа һечнәрсини билмәсликни қарар қилдим. 3 Һәм мән силәргә аҗиз түрүмдә, қорқунучта вә қаттиқ әндишидә кәлдим. 4 Мениң гепим вә вәзәм — инсан даналиғиниң ишәшлик сөзлири әмәс, бәлки роһниң һәм күчниң аяни еди, 5 чүнки силәрниң етиқатиңлар инсанларниң данишмәнлигидә әмәс, әксичә, Худаниң күч-қудритидә асаслиниши үчүндур.
6 Даналиқни биз йетип-пишкәнләр арисида ейтимиз, бирақ бу дунияниң яки униң һөкүмдарлириниң даналиғини әмәс, чүнки улар заваллиққа учрайду, 7 бәлки Худаниң муқәддәс сирида йошурунған даналиғини. Бизниң шөһритимиз үчүн Худа дуния түзүмлиридин авал ушбу даналиққа мувапиқ иш тутти. 8 Бу даналиқни мошу дунияниң һечбир һөкүмрани билип-тонумиди, чүнки улар уни билгән болса, шан-шәрәпкә лайиқ Һакимдаримизни түврүктә өлтүрмигән болатти. 9 Йезилғинидәк: «Худа Өзини сөйгәнләргә тәйярлап қойғинини көзму көрмигән, қулақму аңлимиған вә инсанниң ойиға у һечбир кәлмигән». 10 Бизгә болса Худа буни Өз роһи арқилиқ ечип бәрди, чүнки муқәддәс роһ һәммә нәрсини, һәтта Худаниң даналиғиниң чоңқурлуқлирини тәһлил қилиду.
11 Инсанда болған роһтин башқа униңда болған ойларни ким биләләйду? Шуниңға охшаш, Худаниң ичидикини Худаниң роһидин башқа һечким билмәйду. 12 Биз болсақ дунияниң роһини әмәс, бәлки Егимиз бизгә һәдийә қиливатқан барлиқ нәрсини билиш үчүн, Худадин роһ алдуқ. 13 Мошу тоғрисида биз ейтиватимиз, инсаний даналиқ үгитидиған сөзләр билән әмәс, бәлки роһ үгитидиған сөзләр билән. Шундақ қилип, биз роһий мәсилиләрни роһий сөзләргә қошуп, чүшәндүримиз.
14 Лекин җисманий адәм Худа роһидин болған нәрсини қобул қилмайду, чүнки бу униң үчүн ахмақлиқтәк билиниду һәм буни у чүшинишкә қабил әмәс, чүнки буни роһий турғудин баһалаш керәк. 15 Роһий адәм болса, һәммә нәрсигә баһа берәләйду, лекин униң тоғрисида һечким һөкүм қилалмайду. 16 «Йәһваға көрсәтмә бериш үчүн, Униң әқлини ким тонуп-билипту?» Амма биз Мәсиһниң әқлигә егә.