Вәһий
6 Андин Қоза йәттә мөһүрниң бирини бузғинини көрдүм вә төрт тирик мәхлуқниң бири гүлдүрлигән аваз билән: «Маң!»— дегинини аңлидим. 2 Кейин ақ атни көрдүм, чавандазниң қолида оқ-я болған вә униңға таҗ берилгән. У ғалибийәт қазиниватқан һәм пүтүнләй ғалибә қазиниш үчүн йолға атланди.
3 У иккинчи мөһүрни бузғанда, иккинчи тирик мәхлуқниң: «Маң!»— дегинини аңлидим. 4 Башқа, чоғдәк қизил ат чиқти вә униңда олтарған чавандазға инсанларниң бир-бирини өлтүрүши үчүн, зиминдин течлиқни елиш һоқуқи берилди. Һәм униңға йоған қилич тапшурулди.
5 Андин у үчинчи мөһүрни бузғанда, үчинчи тирик мәхлуқниң: «Маң!»— дегинини аңлидим. Шу чағда қара атни көрдүм. Чавандазниң қолида тараза болған. 6 Төрт тирик мәхлуқниң арисидин чиқиватқандәк, мундақ авазни аңлидим: «Бир килодәк буғдай бир динарға вә үч килодәк арпа бир динарға тохтайду. Зәйтун мейиға вә үзүм шаравиға зиян кәлтүрмә».
7 У төртинчи мөһүрни бузғанда, төртинчи тирик мәхлуқниң: «Маң!»— дегинини аңлидим. 8 Андин татираң түрдә атни көрдүм. Униңда олтарған чавандазниң исми — Өлүм вә униң арқисидин қәбир әгәшкән еди. Уларға зиминниң төртинчи қисмини қилич, ачарчилиқ, һалакәтлик ваба вә һайванлар билән өлтүрүшкә һоқуқ берилди.
9 Андин у бәшинчи мөһүрни бузғанда, қурбангаһ түвидә Худа сөзигә әмәл қилип вә гувалиқ ишини жүргүзгини үчүн өлтүрүлгәнләрниң җанлирини көрдүм. 10 Улар қаттиқ аваз билән: «Әң Алий Һөкүмранимиз, муқәддәс вә һәқиқий, қачанғичә Сән күтисән? Қачан бизниң қенимиз үчүн зиминда яшаватқанлардин өч алисән вә уларни сотлайсән?»— дәп вақирашти. 11 Уларниң һәрқайсиға узун ақ кийим берилди вә уларға һәмкардаш-қериндашлириниң улар өлтүрүлгәндәк өлтүрүлүп, сани толуқ болмиғичә, йәнә бираз вақит күтүши ейтилди.
12 У алтинчи мөһүрни бузғинини көрдүм вә шу чағда бүйүк йәр тәврәш йүз бәрди. Қуяш қап-қара жуңлуқ мишкаптәк вә ай қандәк болуп кәтти. 13 Юлтузлар болса әнҗирниң хам мевилири қаттиқ борандин төкүлүп кәткәндәк, йәргә чүшүп кәтти. 14 Асман түртәктәк орилип, ғайип болди. Һәммә тағлар вә араллар өз орунлиридин қозғилип кәтти. 15 Зимин падишалири, төрилири, сәрдарлири һәм байлар, күчлүкләр вә барлиқ қуллар, әркинләр өңкүрләрдә вә тағларниң қиялирида йошурунди. 16 Улар тағлар билән қияташларға: «Бизни қоғдаңлар вә тәхттә Олтарғучиниң көзидин һәм Қозиниң ғәзивидин йошурувелиңлар! 17 Чүнки Уларниң ғәзивиниң бүйүк күни кәлди вә ким униңдин өтәләйду?!»— дәтти.