Филимунға

1 Әйса Мәсиһ үчүн мәһбус болған мән Паулдин вә бурадәримиз Тимотийдин — әзиз һәмкаримиз Филимунға, 2 сиңлимиз Аппияға, шундақла сәпдишимиз Архипқа һәм сениң өйүңдики җамаәткә салам.

3 Атимиз Худадин вә Һакимдаримиз Әйса Мәсиһтин силәргә мол меһирлик вә течлиқ-аманлиқ болсун.

4 Өз дуалиримда сени әсләп, һәрқачан Рәббимгә миннәтдарлиғимни билдүримән. 5 Һакимдар Әйсаға көрсәткән етиқатиңни вә һәммә муқәддәсләргә болған меһир-муһәббитиңни аңлап, 6 биз өзүмиз ортақлашқан етиқатимиз түпәйли Мәсиһкә бағлиқ көплигән яхшилиқларға егә болғинимизни сезип, чүшинишиң һәққидә дуа қилимән. 7 Сениң меһир-муһәббитиң маңа көп хошаллиқ вә тәсәлли бәрди, чүнки сән арқилиқ, бурадәрим, муқәддәсләрниң назук һиссиятлири тәскин* тапти.

8 Гәрчә Мәсиһ билән бирликтә униң әлчисидәк чоң сөз әркинлигигә егә болған болсамму, сениң қилишиңға тегиш ишни саңа буйрушниң орниға, 9 меһир-муһәббәт асасида, һазир техи Әйса Мәсиһ үчүн мәһбус болуватқан, яшанған киши — мән Паул илтимас қиливатимән. 10 Зиндандики кишәнләнгән вақтимда мән атиси болған оғлум Онисим тоғрилиқ саңа өтүнимән. 11 У бурун саңа пайдисиз болған еди, амма һазир у саңиму вә маңиму пайдилиқтур. 12 Һә, уни, қәлбимдә униңға иллиқ сезимлирим бар болғанни, саңа қайтуриватимән.

13 Мән хуш хәвәр үчүн зинданда ятқинимда, уни өзәм үчүн сениң орнуңда тутушни вә у маңа хизмәт қилишини халаттим. 14 Амма сениң разилиғиңсиз һечнемә қилғум йоқ, сәвәви сениң яхши ишиң мәҗбурий әмәс, бәлки өз ихтияриң бойичә болуши үчүндур. 15 Бәлким, униң аз вақитқа кетип қалғини, сениң уни дайимлиқ қобул қилишиң үчүн болуп, 16 әнди қул сүпитидә әмәс, бәлки қулдинму артуқ — қиммәтлик бурадәрдәк қобул қилишиң үчүндур. У мениң үчүн бәк әзиз, һә, сениң үчүн қулуңдәк һәм Һакимдардики қериндаштәк нәқәдәр у қәдирликтур! 17 Шуңа, әгәр сән мени достуң дәп һесаплисаң, мени қандақ хурсәнлик билән қарши алғиниңдәк, униму шундақ қарши алғин. 18 Әгәр у сениң алдиңда бирәр әйип өткүзгән болса яки саңа бирәр нәрсидә қәриз болса, уни маңа артқин. 19 Мән, Паул, өз қолум билән йезиватимән: мән барини төләветимән. Сән һәммидин башқа, өзәң билән маңа қәриздар екәнлигиңни ейтмисамму, билисән. 20 Шуңа, бурадәрим, Һакимдар үчүн маңа мошу яхшилиқни қилғина. Мәсиһниң шагиртидәк, қәлбимни исситқина.

21 Сениң разилиғиңға үмүтлинип, мениң ейтқинимдинму көпирәк қилидиғиниңни билип, саңа йезиватимән. 22 Шуниң билән биллә маңа туридиған җай тәйярлап қойғин, чүнки силәрниң дуалириңларға бенаән, силәр үчүн азатлиққа чиқишни үмүт қиливатимән.

23 Мән билән Әйса Мәсиһ үчүн зинданға соланған Епафрас, 24 шундақла хизмәтдашлирим Марк, Аристарх, Димас, Луқа саңа салам йоллаватиду.

25 Һакимдар Әйса Мәсиһниң мол меһри силәр көрситиватқан роһ билән болсун.