Әфәсликләргә
2 Силәрни — авал өз қилмишлириңларда һәм гуналириңларда өлүк болғанларни — Худа тирилдүрди. 2 Гуналириңларда мошу дуния билән маслишип, һаваниң һакимийити билән буйруғучиниң, йәни беқинмаслиқниң пәрзәнтлиридә һәрикәт қиливатқан роһниң ирадиси бойичә, силәр өтмүштә улардәк жүргән едиңлар. 3 Раст, әшуларниң арисида яшап, һәммимиз бир вақитларда тенимизниң хаһишлириға бола иш қилған едуқ, бәдән һәвәслири һәм хияллиримиз җәлип қилған нәрсиләргә интилип, туғулушимиздин қалған барлиғидәк ғәзәпниң балилири едуқ. 4 Бирақ рәһимликкә толуп-ташқан Худа Өзиниң бизгә билдүргән улуқ меһир-муһәббити түпәйлидин, 5 гәрчә биз қилмишлиримизға бенаән өлүк болсақму, бизни Мәсиһ билән биллә тирилдүрди. Силәр Униң мол меһирлиги түпәйлидин қутқузулдуңлар. 6 Бизни У Әйса билән биллә тирилдүрди һәм Мәсиһ билән бирликтә асман чәклиридә олтарғузди. 7 Кәлгүсидә Мәсиһ Әйса билән бирликтә болғанларға — бизгә Униң һиммәтлик инайитиниң әҗайип байлиғи көрситилиши үчүн, Пәрвәрдигаримиз буни қилди.
8 Мошу мол меһирлик бойичә силәр етиқат арқилиқ қутқузулдуңлар һәм бу силәрниң утуғиңлар әмәс, бәлки Худаниң соғисидур. 9 Һечкимниң махтиниш сәвәви болмаслиғи үчүн, ишларға бола әмәс. 10 Биз — Униң әҗриниң мевиси вә Иҗаткар бизгә бәлгүлигән яхши ишларда меңишимиз үчүн, Мәсиһ Әйсада яритилғанмиз.
11 Шуңа әстә тутуңларки, авал силәр туғулушиңлардин башқа хәлиқләрниң кишилири болғандиңлар, тәндә қол билән ясалған хәтниликләр силәрни хәтнисизликләр дәп ататти. 12 Шу заманда силәр Мәсиһсиз, Исраил җәмийитидин чәтләндүрүлгән, вәдиниң келишимлиригә ят болуп, үмүтсиз һәм ушбу дунияда Худасиз едиңлар. 13 Әнди болса, Мәсиһ Әйса билән бирликтә екәнсиләр. Бир вақитта Худадин жирақ болуп, әнди Мәсиһниң қени түпәйли Униңға йеқин болдуңлар. 14 Мәсиһ — бизниң инақлиғимиз, у икки қисимдин пүтүн бирликни тәшкил қилди һәм йәһудийларға қоршав болған оттуридики тамни бузувәтти. 15 Течлиқни орнитип, өзи билән бирликтә икки хәлиқтин бир йеңи хәлиқни яритишқа, у өз тени билән дүшмәнликни, тохтамлардин ибарәт болған әмирләр Қанунини аяқлаштурди. 16 Азап түвригиниң васитисида иккисини бир тәндә Худа билән пүтүнләй яраштуруш үчүн, у өзиниң өлүми билән дүшмәнликни йоқатти. 17 У келип, течлиқниң хуш хәвирини силәргә, Яратқучидин жирақтикиләргә һәм Униңға йеқиндикиләргә җакалиди. 18 Униң арқилиқ бизниңму һәм уларниңму муқәддәс роһ вақалитидә Атимизға дуада йеқинлишиш имканийитимиз бар.
19 Шуңа әнди силәр ят һәм мусапир әмәссиләр, әксичә, муқәддәсләрниң пухрадашлири вә Тәңри аилисиниң әзалири. 20 Силәр әлчиләр вә пәйғәмбәрләр һулида қурулдуңлар, асастики булуңташ — Мәсиһ Әйса өзидур. 21 Униң билән бирликтә пүткүл бена уйғун һалда қошулғач риваҗлинип, Йәһва үчүн һәрәм болуватмақта. 22 Силәрдинму, Әйса билән бирликтә болғанлардин, макан-җай селиниватиду, униңда Худа муқәддәс роһи билән яшайду.