Колосилиқларға
1 Худаниң ирадиси бойичә Мәсиһ Әйсаниң әлчиси Паулдин вә бурадәримиз Тимотийдин — 2 Колосидики Мәсиһкә мәнсүп болған муқәддәс вә садиқ қериндашларға салам.
Атимиз Худадин силәргә зор меһир вә хатирҗәмлик болғай.
3 Силәр үчүн дуа қилғанда Һакимдаримиз Әйса Мәсиһниң Атиси — Рәббимизгә һәрқачан миннәтдармиз. 4 Силәрниң барлиқ муқәддәсләргә һис қиливатқан меһир-муһәббитиңлар һәм Мәсиһ Әйсадики етиқатиңлар тоғрилиқ аңлиғанлиқтин, 5 силәр үчүн асманда сақлиниватқан үмүт түпәйлидин шүкүр ейтимиз. Силәр илгири бу үмүт тоғрисида хуш хәвәрни — һәқиқәт сөзлирини 6 аңлиған күндин вә Худаниң мол меһирлигини һәқиқәттә тоғра билгәндин башлап, у пүткүл җаһанға тарилип, силәргиму йәтти вә мевә әкәлди. 7 Буниңға силәр биздәк қул әзиз Епафрастин үгәндиңлар, у силәр үчүн Мәсиһниң садиқ хизмәтчиси. 8 У бизгә силәрниң роһта көрситиватқан меһир-муһәббитиңлар тоғрилиқ ейтип бәрди.
9 Мана мошу сәвәптин бизму аңлиған күндин башлап, силәр һәққидә дуа қилишни һәм силәрниң Худа ирадисиниң тоғра билимигә пүткүл даналиқта һәм роһий чүшиништә толушиңларни тохтимай өтүнүватимиз. 10 Шу чағда Йәһваға лайиқ иш тутуп, барлиқ яхши ишта мевә әкәлгәч һәм Худани тоғра билип өскәч, Униңға һәммә нәрсидә яқисиләр. 11 Ахириғичә туруп қелишиңлар һәм хурсәнлик билән узақ сәвирчан болушиңлар үчүн, У шәрәплик қудритигә мувапиқ мустәһкәмлинишиңларни бәрсун. 12 Муқәддәсләрниң мирасиға иштрак қилишқа силәрни йоруқлуқта ярамлиқ қилған Атимизға рәхмәт ейтиңлар.
13 У бизни қараңғулуқниң һакимийитидин қутқузуп, сөйгән Оғлиниң Падишалиғиға йөткиди. 14 Униң төлими арқилиқ биздә азатлиқ вә гуналарниң кәчүрүми бар. 15 У — көрүнмәс Худаниң әксидур, пүткүл мәвҗудатларниң тунҗиси. 16 Униң васитиси билән асмандики вә йәрдики, көрүнидиған һәм көрүнмәс һәммәйлән яритилди: тәхтләр, һөкүмранлиқлар, һөкүмәтләр һәм һакимийәтләр. Буниң һәммиси униң арқилиқ һәм униң үчүн яритилғандур. 17 У һәммидин авал болған, қалған һәммә нәрсә униң арқилиқ вуҗутқа кәлди. 18 Һәм у тәнниң, йәни җамаәтниң беши. У — башлиништур, барлиқ нәрсидә дәсләпки болуш үчүн, өлгәнләрдин тирилгән тунҗа. 19 Униңда барлиқ толуқлуқ болуши үчүн, Худа мошундақ қилди. 20 Униң арқилиқ Өзи билән қалған һәммә нәрсини яраштуруш үчүн, йәрдики вә асмандикини Мәсиһниң азап түврүктә төкүлгән қени васитисида инақлиққа әкәлди.
21 Һә, силәр, әқлиңлар зулум ишларға қаритилғанлиқтин, бир вақитта ят болғандиңлар һәм дүшмәнләр едиңлар. 22 Әнди болса Өзиниң алдида силәр муқәддәс, пак вә әйипсиз турушиңлар үчүн, Мәсиһниң өлүми арқилиқ униң җисманий тени васитисида силәрни яраштурди. 23 Әлвәттә, силәр етиқатта қелип, униң асасида мәккәм вә тәврәнмәй турушиңлар вә силәрни асман астидики пүткүл мәвҗудатқа вәз қилинған һәм силәр аңлиған хуш хәвәр үмүтидин чәткә елип кәтмәслиги шәрт. Мән Паул мошу хуш хәвәрниң хизмәтчиси болдум.
24 Әнди силәр үчүн тартқан азаплиримда шатлинимән вә ойлаймәнки, Мәсиһниң тени, йәни җамаәт үчүн у тартқан барлиқ азаплирини толуқ мөлчәрдә мән техи өз тенимда тартмидим. 25 Мән Худаниң башқурғучиси вәзипилиригә мувапиқ мошу җамаәтниң хизмәтчиси болдум, улар маңа силәрниң пайдаңлар үчүн Рәббниң сөзини толуғи билән җакалашқа жүкләнди. 26 Бу сөз өткән дуния түзүмлиридә һәм авалқи әвлатлар үчүн йошурунған муқәддәс сирдур. Әнди болса у Худаниң муқәддәслиригә ашкариланди. 27 Худа уларға бу муқәддәс сирниң бүйүк байлиғи немидин ибарәт екәнлигини башқа хәлиқләр арисида рошән қилишни халиди. Бу — силәр билән бирликтики Мәсиһ, униң шөһритигә иштрак қилиш үмүтидур. 28 Һәрбир адәмни Мәсиһ билән бирликтә етиқати толуқлуққа йәткән һалда тәғдим қилиш үчүн, вәз ейтип һәм даналиқ билән тәлим берип, биз у тоғрилиқ хәвәрни җакалаймиз. 29 Мошу мәхсәт үчүн мән мениңда намайән болуватқан Худаниң қудритигә тайинип, зор тиришчанлиқ билән әмгәк қиливатимән.