Улар һәқиқәткә көз йәткүзүшүмни халиған еди

ӨТМҮШТИКИ ҺАЯТИМ:

Мән Доминикан Җумһурийитиниң Санто-Доминго шәһиридә туғулдум. Аилидә төрт балиниң ичидә әң кәнҗиси едим. Ата-анам билимлик адәмләрдин болғачқа, бизгиму җәмийәттә иҗабий тәсир қилидиған яхши вә растчил кишиләрниң арисида өсүп-йетилишимизни халиған еди. Мән дунияға көз ечиштин төрт жил илгири ата-анам Мормон дегән чиркоға мәнсүп болған миссионерларни учраштупту. Уларниң пакиз кийингәнлиги вә өзлирини әдәплик тутқанлиғи ата-анамға чоңқур тәсир қилипту. Көп өтмәй, ата-анам Мормон чиркосиға қошулушни қарар қилипту. Бизниң аилимиз жутимизда биринчи болуп бу динни қобул қилипту.

Вақит өткәнсири бу чиркониң иш-паалийәтлиригә қатнишиштин көпирәк хошаллиқни тепишқа вә мормонларниң турмуш кәчүрүш вә әдәп-әхлақ тәрәплиригә алаһидә көңүл бөлүшини һөрмәт қилишқа башлидим. Өз динимдин пәхирләнгәчкә, мән миссионер болушқа мәхсәт қойдум.

Мән он сәккиз яшқа толғанда, университетта оқуш мәхситидә аилимиз билән Америкиға көчүп кәттуқ. Тәхминән бир жил өткәндин кейин Йәһва гувачилири болған кичик апам билән униң ери биз яшиған Флорида штатиға бизгә меһманға келип қалди. Улар бизни өзлири билән биллә конгрессқа беришқа тәклип қилди. Конгресста мени һәйран қалдурған бир йери, йенимда олтарғанлар Муқәддәс китапни ечип, программини диққәт билән тиңшап, аңлиғанлирини қисқичә йезип олтарди. Мәнму уларға қарап, қәләм вә қәғәз сорап йезишқа башлидим.

Конгресстин кейин кичик апам билән кичик дадам маңа: «Әгәр сән миссионер болушни халисаң, биз саңа Муқәддәс китапниң асасий тәлимлири билән тонушушқа ярдәм берәләймиз»,— деди. Уларниң бу тәкливи маңа йеқип қалди. Сәвәви мән Мормон китавиға қариғанда, Муқәддәс китапни зади билмәттим.

МУҚӘДДӘС КИТАП ҺАЯТИМНИ ҚАНДАҚ ӨЗГӘРТТИ:

Кичик апам вә кичик дадам билән Муқәддәс китап тоғрисида телефон арқилиқ сөзләшкәндә, улар мени дайим өз көзқаришимни Муқәддәс китап тәлимлири билән селиштурушқа дәвәт қилатти. Улар өзүмниң һәқиқәткә көз йәткүзүшүмни халиған еди.

Мән мормонларниң үгитидиғанлири Муқәддәс китапқа мас келәмду яки кәлмәмду дәп ойлимай, уларниң ейтқанлирини қарғуларчә қобул қилған едим. Кичик апам маңа Йәһва гувачилириниң 1995-жили, 8-ноябрь ейиниң «Ойғиниш!» журналидики мормонлар тоғрисида бирнәччә мақалини әвәтти. Уларни оқуп, мормонларниң тәлиматлири һәққидә көп нәрсиләрни билмигәнлигимгә һәйран қалдим. Шу мақалидики йезилғанларниң раст-ялғанлиғини тәкшүрүш үчүн мән мормонларниң торбетигә кирдим. Униңдин башқа, Юта штатидики мормонларниң музейини зиярәт қилғинимда, мақалидә йезилғанлириниң һәммиси раст екәнлигигә йәнә бир қетим көз йәткүздүм.

Мән Мормон китави билән Муқәддәс китап бир-биригә уйғун дәп ойлаттим. Лекин Муқәддәс китапни әстаидил тәтқиқ қилишни башлиғанда, униң үгитидиғанлириниң мормон тәлиматлиридин тамамән пәриқлинидиғанлиғини байқидим. Мәсилән, Муқәддәс китапта Әзәкиял 18:4-айәттә җанниң өлидиғанлиғи йезилған. Мормон китавидики бир айәттә болса: «Җан һечқачан өлмәйду»,— дейилгән.

Тәлимлириниң бир-биригә зит келишидин ташқири, мормонларниң үгәткән милләтчилик тәшвиқати мени ғәм-тәшвишкә салди. Мәсилән, мормонлар Ерәм беғи Джексон өлкисидә (АҚШ Миссури штатида) болған дәп ишиниду. Уларниң чиркосидики хизмәтчилири «Худа Падишалиғи башқурғанда Америка байриғи әркинлик вә тәң һоқуқлуқ байриғи илинип турған түвригидә көтирилип йәлпүлдәп туриду»,— дәп тәстиқләйду.

Мән туғулуп өскән дөләткә вә башқа дөләтләргә немә болар екән дәп ойлинаттим. Бир күни ахшими, миссионер болушни үгәткән бир яш мормон жигити маңа телефон қилди. Мени ойландуридиған соаллар һәққидә униң билән очуқ сөһбәтләштим. Мән униңдин: «Әгәрдә сениң дөлитиң башқа дөләт билән соқушса, сән шу дөләттики етиқатдашлириңға қарши җәң қиламсән?»— дәп соридим. Униң «әлвәттә, җәң қилимән» дегән сөзигә мән һаң-таң болдум. Мән мормонларниң тәлимлирини техиму чоңқур қезишқа башлидим һәм чирко рәһбәрлири билән сөзләштим. «Буниң һәммиси йошурун сир, сүзүлүп атқан таңға охшаш, бу сир бир күни ечилип қалар»,— дәп җавап берәтти улар.

Уларниң бәргән җаваплиридин көңлүм йерим болуп, немә үчүн миссионер болғум кәлгәнлиги үстидин чоңқур ойлинишқа башлидим. Әмәлийәттә, мениң миссионер болғум кәлгининиң бир сәвәви — адәмләргә ярдәм бериш. Йәнә бир сәвәви, кишиләрниң маңа һөрмәт-еһтирам көрситишини яхши көрәттим. Лекин әслидә мән Худа һәққидә һечнәрсә билмәптимән. Гәрчә Муқәддәс китапни бир нәччә қетим оқуп көргән болсамму, әсли мән униң қәдир-қиммитини чүшәнмәптимән. Худаниң йәр йүзи вә инсанийәткә тегишлик нийити тоғрисида һеч хәвирим йоқ еди.

ҺАЯТИМ ҚАНДАҚ ӨЗГӘРДИ:

Йәһва гувачилири билән Муқәддәс китапни үгиниш җәриянида, мән Худаниң исми тоғрилиқ, адәм өлгәндә немә болидиғанлиғи, Әйсаниң Худаниң ирадисини орунлашта қандақ роли барлиғини биливалдим. Ахири мән бу әҗайип китап билән тонуштум! Бу китаптин билгәнлиримни башқилар билән бөлүшүштин интайин хошал болдум. Мән һемишәм Худаниң бар екәнлигигә ишинәттим, лекин һазир мән Униң билән әң йеқин достум сүпитидә дуада сөзлишәләймән. 2004-жили, 12-июль ейида һаятимни Худаға беғишлап, Йәһва гувачиси болдум. Алтә ай өткәндин кейин толуқ вақитлиқ хизмәтни башлидим.

Мән Бруклиндики (Нью Йорк) Йәһва гувачилириниң дуния йүзлүк баш идарисидә бәш жил хизмәт қилишқа муйәссәр болдум. Дуния йүзидики миллионлиған кишиләрниң һаятини өзгәртәләйдиған Муқәддәс китап вә униңға асасланған китап-журналларни нәширдин бесилип чиқирилишиға өз төһпәмни қошқанлиғимдин хурсәнмән. Һелиму башқиларға Худа һәққидә билишкә ярдәм берип келиватимән.