Ибадәт чедири

БУ РӘСИМДИКИ қурулушниң немә екәнлигини биләмсиз? Бу Йәһваға ибадәт қилидиған алаһидә бир җай, йәни ибадәт чедири дәпму аталған. Исраил хәлқи Мисирдин чиқип бир жилдин кейин, бу қурулушни пүтәргән. Чедир ясаш кимниң ой-пикири, биләмсиз?

У Йәһваниң ой-пикири еди. Муса Синай теғиға чиққанда, Йәһва униңға чедирни қандақ ясаш тоғрисида сөзләп, чедирни шундақ ясаңларки, уни чугуш вә қайта қураштуруш асан болсун деди. Бундақ болғанда, парчә-парчә қилинип башқа җайға йөткәп, у җайда қайта қураштурғили болатти. Исраиллар шундақ қилип, чөл-баяванда бир җайдин йәнә бир җайға көчкәндә, у чедирни өзлири билән биргә елип жүрди.

Чедирниң аяқ тәрипидики кичик бөлүмчиниң ичигә қарисиңиз, сандуқни көрәләйсиз. Бу әһдә сандуғи дәп аталған. Сандуқниң икки бешиға алтундин ясалған икки периштә, йәни керуб орнитилған еди. Муса илгирики таш тахтиларни чеқивәткәч, Худа он пәриз, йәни қанунни икки таш тахтиға қайта язди. Бу тахтилар әһдә сандуғи ичигә селинип сақланди. Бир комзәк маннаму у сандуққа селинди. Ядиңизда барму, манна у қандақ нәрсә?

Пәрвәрдигар Йәһва Мусаниң акиси Һарунни баш роһаний болушқа таллиған еди. У кишиләрни Йәһваға ибадәт қилишқа йетәкләтти. Униң оғуллириму роһанийлар болди.

Әнди, чедирниң чоңирақ бөлүмчисигә қараң. Бу чоң бөлүмчә, кичик бөлүмчиниң икки һәссисигә тоғра келиду. Әву ис-түтәк чиқиватқан сандуқни көрдиңизму? У, роһанийлар исриқ дәп аталған хуш-пурақ нәрсини көйдүридиған исриқдан. У йәрдә йәнә йәттә чирақ орнитилған бир чирақдан бар. Бу бөлүмчидики үчинчи бир нәрсә үстәл болуп, үстидә 12 нан сақлинатти.

Ибадәт чедири һойлисида, чоң бир қача йәни дас болуп, сулиқ толтурулуп қоюлатти. Роһанийлар уни пут-қоллирини жуйғанда ишлитәтти. Йәнә чоң бир қурванлиқ суписиму бар болуп, Йәһваға аталған җан-җаниварлар өлтүрүлуп бу йәрдә көйдүрүләтти. Ибадәт чедири лагерьниң дәл оттурисиға тикләнгән болуп, исраиллар әтрапини чөрәдәп чедирлирини тикәтти.