Сулайманниң ибадәтхана селиши

ХУДА Давут пәйғәмбәргә ибадәтхана қурулушиниң хәритисини бәргән еди. Давут өлүштин илгири у хәритини Сулайманға бәрди. Сулайман һөкүмранлиқ қилип төртинчи жили, ибадәтхана қурулушини башлиди. Йәттә йерим жил вақит өтүп, ибадәтхана қурулуши тамам болди. Шу қурулушқа нәччә он миңлиған адәмләр ишлигән вә бәкму нурғун пуллар кәткән еди. Чүнки, ибадәтхана қурулушиға көп алтун-күмүч ишлитилгән еди.

Худди ибадәт чедириға охшаш, ибадәтханиниң икки асасий бөлүмчиси йәни ханиси бар еди. Амма бу ханилар ибадәт чедириниң бөлүмчилиридин бир һәссә чоң еди. Сулайман әһдә сандуғини ибадәтханиниң ичкирики ханисигә қоюшни буйриди.

Ибадәтхана пүткәндин кейин, Сулайман чоң бир тәбрикләш мәрасими өткүзди. Худди сиз рәсимдин көрүп турғандәк, Сулайман пәйғәмбәр ибадәтхана алдида тизлинип, Йәһваға дуга қилип: “Шунчә кәң асман сени сиғдуралмас, ундақта бу ибадәтхана сени қандақ сиғдуралайду. Әй Худайим, хәлқиңниң қилған дугалириға қулақ салғайсән”, деди.

Сулайман пәйғәмбәрниң дугаси аяқлишиши билән, асмандин от чүшүп, тәғдим қилинған қурванлиқларға от тутушуп кәтти. Йәһваниң нури ибадәтханини қаплап йорутувәтти. Бу шуни көрситидуки, Йәһва қулақ селивататти. У бу ибадәтханидин вә Сулайманниң дугасидин бәкму хурсән болған еди. Һазир ибадәтхана илгирики ибадәт чедириниң орнини алди. Шуңа, кишиләр бу җайда Худаға ибадәт қилидиған болди.

Узун бир мәзгил, Сулайман падиша даналиқ билән һөкүмранлиқ қилип, барчә хәлиқ хошал-хорам турмуш кәчүрди. Амма, Сулайман башқа дөләтләрдин Йәһваға ибадәт қилмайдиған қизларни аяллиққа алди. Қараң, уларниң арисидики бириниң бутқа чоқунуватқанлиғини көрдиңизму? Кейин, шу аяллар Сулайман падишани өзлиригә қошулуп башқа илаһларға ибадәт қилишқа аздурди. Сулайман шундақ қилса, ақивитиниң қандақ болидиғанлиғини биләмсиз? У хәлиқләргә илгирикидәк меһир-шәпқәтлик болмиди. У рәһимсиз, залим падишаға өзгәрди. Шуниң билән, әнди хәлиқниң хошал-хорамлиғи йоқалди.

Йәһва Сулайманға қаттиқ аччиқланди. Шуңа, у Сулайман падишаға: “Мән падишалиқни сәндин тартип елип, башқа биригә беримән. Мән буни сән һаят вақтиңда қилмаймән. Бәлки, оғлуң һөкүмранлиқ қилған мәзгилдә қилимән. Бирақ, падишалиқниң һәммә хәлқини оғлуңниң қолидин тартип алмаймән”, деди. Ундақта, шу ишлар қандақ йүз бәрди. Биз бирликтә көрүп бақайли.