Бабилондики төрт оғул бала

ПАДИША Нәбуқәднәсәр барлиқ әң яхши тәрбийә алған исраилларни Бабилонға елип кәткән еди. Кейин, падиша уларниң арисидин әң келишкән, әқиллиқ яш өсмүрләрни таллиди. Сиз көрүп турған булар, шуларниң арисидики төрти. Бири Даниял, қалған үчини бабилонлиқлар Шадрак, Мишак вә Әбәднего, дәп аташқан еди.

Нәбуқәднәсәр бу яшларни өз ордисида хизмәткә селиш үчүн тәрбийилимәкчи болди. Үч жил тәрбийилигәндин кейин, у өзигә ярдәмлишип қийин мәсилиләрни һәл қилидиған әқиллиқ кишиләрни таллимақчи еди. Падиша бу балиларниң тәрбийилиниватқан вақитта, күчлүк вә сағлам болушини халатти. Шуңа, падиша хизмәтчилиригә, мениң аиләмдикиләр бәһримән болидиған мол назу-немәтләр вә шараплардин, бу балиларниму бәһримән қилиңлар, дәп буйруқ қилди.

У яш Даниялға қараң. Униң Нәбуқәднәсәрниң баш чакири Ашпиназға немә дәватқанлиғини биләмсиз? Даниял униңға падишаниң дәстихинидики есил таамларни йемәйдиғанлиғини ейтиватиду. Амма, Ашпиназ бәк әнсириди. Шуңа, у: “Силәрниң немә йәп, немә ичишиңларни падиша қарар қилған. Әгәр силәр башқа яшлардәк сағлам болмисаңлар, падиша мени өлтүриду”, деди.

Шуниң билән, Даниял Ашпиназ бәлгүлигән хәвәр алғучиниң қешиға барди. Чүнки, у Даниял вә униң достлиридин хәвәр елишқа мәсъул қилинған еди. Даниял униңға: “Бизни 10 күн синап беқиң. Бизгә йейишкә көктатларни, ичишкә су бериң. Андин кейин, падишаниң есил таамлирини йегән башқа яшлар билән бизни селиштуруп, кимниң тени сағламирақ екән қарап беқиң”, деди.

Хәвәр алғучи шундақ қилишқа мақул болди. Он күн өткәндин кейин, Даниял вә униң үч дости башқа барлиқ яшларға қариғанда сағламирақ көрүнәтти. Шуңа, хәвәр алғучи уларға падиша тәминлигән тамақларни бәрмәй, әксичә уларниң давамлиқ көктатларни йейишигә рухсәт қилди.

Үчинчи жилниң ахириға кәлгәндә, барлиқ яшлар Нәбуқәднәсәрниң алдиға елип келинди. Падиша барлиқ яшлар билән параңлишип көргәндин кейин, Даниял вә униң достлириниң әң әқиллиқ екәнлигини байқиди. Шуңа, падиша уларни ордида елип қелип, өзигә ярдәмчи қилди. Падиша һәр қетим Даниял, Шадрак, Мишак вә Әбәднеголардин соалларни сориған яки қийин мәсилиләрни һәл қилишини тәләп қилғанда, уларниң билидиғанлири падишаниң қол астидики роһанийлар вә данишмәнләрдин 10 һәссә көп еди.