Йерусалим шәһириниң сепил тамлири

БУ ЙӘРДӘ қилиниватқан қурулушқа қараң. Исраиллар алдираш Йерусалимниң сепил тамлирини ясаватиду. 152 жил бурун, падиша Нәбуқәднәсәр Йерусалимни вәйран қилған вақитта, у шәһәр тамлирини өрүп, дәрвазилирини көйдүрүвәткән еди. Бирақ, Бабилондин тунҗа болуп өз жутиға қайтип кәлгән исраиллар, шәһәрниң сепил тамлирини техи ясимиған еди.

Сизчә, хәлиқ нәччә он жил сепил теми йоқ шәһәрдә яшиса қандақ һиссиятта болиду? Улар бехәтәр һис қилмайду, шундаққу!? Уларниң дүшмәнлири шәһәргә асанла кирип, уларға һуҗум қилалайду. Бирақ, мана әнди Нәһәмия, дегән бу киши хәлиқниң сепил тамлирини ясишиға ярдәм бериватиду. Биләмсиз Нәһәмия ким?

Нәһәмия болса, Мордикай билән Әстир яшиған Шошан (Суза), дегән шәһәрдин кәлгән исраил киши еди. Нәһәмия падишаниң ордисида хизмәт қилатти. Шуңа, у бәлким Мордикай билән ханим Әстирниң яхши достидур. Бирақ, Муқәддәс Китапта Нәһәмия Әстирниң ери падиша Аһашвирушқа хизмәт қилған, дәп хатириләнгән әмәс. У кейинки падиша Артаһшашта үчүн хизмәт қилған еди.

Есиңиздә барму, Артаһшашта яхши падиша, у Әзраниң Йерусалимға қайтип, Йәһваниң ибадәтханисини түзәп оңшиши үчүн, униңға көп пул бәргән. Бирақ, Әзра пәйғәмбәр шәһәрниң өрүлүп чүшкән тамлирини ясимиған еди. Ундақта, Нәһәмияниң бу ишни қандақ қилғанлиғини көрүп бақайли.

Ибадәтханини түзәп оңшаш үчүн Артаһшаштиниң Әзраға пулларни бәргини, 13 жилниң алдидики иш еди. Мана һазир Нәһәмия падиша Артаһшаштиниң баш шарап қуйғучиси болди. Бу, Нәһәмия падишаға шарап қуюп әкелиду, бирәр кишиниң падишани зәһәрләп өлтүрүшиниң алдини алиду, дегәнликтур. У бәкму муһим хизмәт еди.

Бир күни, Нәһәмияниң қериндиши Һанани билән башқа бир қанчә киши, Нәһәмия билән көрүшкили исраилларниң жутидин кәлгән еди. Улар Нәһәмияға исраил хәлқи дуч келиватқан қийинчилиқларни вә Йерусалимниң тамлириниң бурунқидәкла өрүлүп чүшкән һаләттә туруватқанлиғини ейтип бәрди. Буни аңлап, Нәһәмияниң көңли бәкму азапланди вә Пәрвәрдигар Йәһваға у иш тоғрисида дуга қилди.

Падиша бир күни, Нәһәмияниң көңли йерим екәнлигини байқиди. Шуңа, у: “Немә үчүн шунчә ғәмкин көрүнисән?”, дәп сориди. Нәһәмия униңға сәвәвини чүшәндүрүп, Йерусалимниң начар әһвалда туруватқанлиғини вә шәһәр тамлириниң ясалмай ташливетилгәнлигини ейтти. Падиша: “Ундақта, қандақ қилмақчи сән?”, дәп сориди.

Нәһәмия җавап берип: “Мениң Йерусалим тамлирини қайта ясаш үчүн беришимға рухсәт қилсиңиз”, деди. Артаһшашта падиша наһайити ақ көңүл киши еди. У Нәһәмияниң беришиға рухсәт қилипла қалмай, униң қурулушқа ишлитидиған яғачларға еришиши үчүнму ярдәм бәрди. Нәһәмия пәйғәмбәр Йерусалимға йетип келип, узун өтмәй өзиниң қилмақчи болған ишини хәлиққә ейтти. Улар Нәһәмияниң пикиригә қошулди, һәм: “Қурулуш ишини башлайли”, дейишти.

Исраилларниң дүшмәнлири шәһәр сепил тамлириниң аста-аста егизләватқанлиғини көрүп, улар: “Биз берип уларни өлтүрүп, қиливатқан ишини тохтитайли”, дейишти. Нәһәмия пәйғәмбәр бу хәвәрни аңлап, қурулуш қиливатқан ишчиларға қилич вә нәйзиләрни тарқитип бәрди. Андин у: “Силәр дүшмәнләрдин қорқмаңлар. Өз қериндашлириңлар, оғул-қизлириңлар, аяллириңлар билән өй-җайлириңлар үчүн соқушуңлар”, деди.

Хәлиқ һәммиси наһайити җасарәтлик еди. Улар кечә-күндүз җәң қураллирини йенида елип жүрүп, қурулуш ишини давамлаштурди. Шуңа, пәқәт 52 күн ичидә сепил тамлирини ясап болди. Һазир хәлиқ шәһәр ичидә өзини бехәтәр һис қилалайдиған болди. Нәһәмия пәйғәмбәр билән Әзра пәйғәмбәр хәлиққә Худаниң қанунини үгәтти вә хәлиқ бәк хошал болушти.

Бирақ, исраилларниң әһвали, улар Бабилонға әсирликкә елип кетилиштин илгирикигә охшиматти. Йәни, хәлиқ Персия падишасиниң һөкүмранлиғи астида болуп, улар униңға хизмәт қилиши керәк еди. Бирақ, Йәһва Худа йеңи бир падиша әвәтидиғанлиғини вәдә қилған еди. У падиша хәлиқ үчүн тиничлиқ елип келәтти. Шу падиша ким? У қандақ қилип йәр йүзигә тиничлиқ елип келиду? Тәхминән 450 жилдин кейин, кишиләр бу иш һәққидә бәзи нәрсиләрни ениғирақ чүшәнди. Бу чағда, наһайити муһим бир бовақ дунияға кәлгән еди. Амма, у башқа бир һекайә.