Периштә Җәбраилниң Мәрийәмгә көрүнүши

БУ ЧИРАЙЛИҚ қиз Мәрийәм. У бир Исраил әвлади болуп, Насирә дегән шәһәрдә яшатти. Йәһва Худа униң наһайити яхшилиғини биләтти. Шуңа, у өз периштәси Җәбраилни Мәрийәмгә хәвәр йәткүзүшкә әвәтти. Җәбраилниң Мәрийәмгә немә дегәнлигини биләмсиз? Биз бирликтә көрүп бақайли.

Периштә Җәбраил Мәрийәмгә: “Салам саңа, әй меһир-шәпқәткә муйәссәр болған қиз. Пәрвәрдигар Йәһва саңа ярдур!”, деди. Мәрийәм илгири Җәбраилни көрүп бақмиған еди. У қорқуп кәтти, чүнки бу сөзләрниң мәнасини чүшәнмигән еди. Амма, Җәбраил уни хатирҗәм қилди.

У: “Әй Мәрийәм, қорқмиғин. Сән Йәһваниң меһир-шәпқитигә ериштиң. Буниң үчүн, у саңа әҗайип бир мөҗүзилик ишни қилмақчи. Һамилдар болуп бир оғул туғисән, униң исмини Әйса қойғин”, деди.

Периштә Җәбраил давамлиқ чүшәндүрүп: “Бу бала Улуқ болиду. Йәһва уни әҗдади Давут падишаға охшаш Падиша қилиду. Бирақ, Әйса мәңгү падиша болуп, униң Падишалиғи һәргиз ахирлашмайду”, деди.

Мәрийәм: “Бу қандақму мүмкин болсун? Мән той қилмиған, һәтта бир әр билән биргә болмиған турсам? Бала туғуш қандақ мүмкин болсун?”, дәп сориди.

Периштә Җәбраил: “Худаниң күч-қудрити саңа сайә болуп чүшиду, шуңа у муқәддәс бала болиду”, дәп җавап бәрди. Андин кейин, у Мәрийәмгә: “Туққиниң Елизабетни әсләп көр. Кишиләр уни қерип кәтти, бала туғалмайду, дәтти. Бирақ, һазир униң бир оғул туғушиға аз вақит қалди. Қарап баққинә, Худа қилалмайдиған һеч қандақ иш йоқ!”, деди.

Мәрийәм дәрһал: “Мән Йәһваниң бир хизмәткари! Сизниң дегиниңиздәк болсун”, деди. Шуниң билән, у периштә кетип қалди.

Мәрийәм алдираш Елизабетни йоқлап барди. Елизабет Мәрийәмниң авазини аңлиғанда, Елизабетниң қосиғидики бовақ хошаллиғидин сәкрәп кәтти. Елизабет Худаниң муқәддәс роһиға чөмүп, Мәрийәмгә: “Аяллар ичидә әң бәхитлик аялсән”, деди. Мәрийәм Елизабет билән үч ай биллә турғандин кейин, Насирә шәһиридики өйигә қайтип кәтти.

Мәрийәм Йүсүп исимлиқ бир киши билән той қилишқа келишкән еди. Бирақ, Йүсүп Мәрийәмниң һамилдар болғанлиғини билип, Мәрийәм билән той қилмаслиғим керәк, дәп ойлиди. Шуниң билән, Худаниң бир периштәси келип, униңға: “Мәрийәмни аяллиққа елиштин қорқма, у оғулни Худа бәргән”, деди. Шуңа, Мәрийәм билән Йүсүп той қилди. Улар Әйсаниң туғулушини күтти.