2-САВАҚ
Рәбәкәниң Йәһва Худани хошал қилғуси кәлди
Рәбәкә Йәһвани яхши көридиған аял еди. Униң йолдишиниң исми Исһақ болған. Исһақму Йәһвани яхши көргән еди. Улар қандақ тонушқан? Рәбәкә Йәһвани хошал қилишни халиғанлиғини қандақ көрсәткән? Келиң, җававини биллә тапайли.
Исһақниң ата-аниси Ибраһим вә Сарә болған. Улар Харанда яшиған еди. У йәрдикиләр Йәһва Худаға ибадәт қилмиған. Лекин Ибраһим оғлиниң Йәһваға ибадәт қилидиған аялға өйлинишини халиған. Шуниң үчүн у чакарини, бәлким Әлиазарни, Исһаққа аял тепиш үчүн Харанға әвәткән. У шәһәрдә Ибраһимниң туққанлири туратти.
Рәбәкә төгиләрни суғириш үчүн тиришчанлиқ билән әмгәк қилди
Әлиазар Ибраһимниң башқа хизмәтчилири билән йолға чиқти. Бу узақ йол болған. Улар он төгигә тамақ вә соғиларни артип маңди. Әлиазар Исһаққа аялни қандақ таллатти? Әлиазар билән башқа хизмәтчиләр Харан шәһиригә келип, бир қудуқниң қешида тохтиди. Әлиазар көп өтмәй қизлар суға келидиғанлиғини билгән. У Йәһва Худаға дуа қилип: «Мән қизларниң биридин су сорап, у һәм маңа, һәм төгилиримгә су бәрсә, Сән таллиған қиз шу екәнлигини билимән»,— деди.
Шу чағда, қудуқниң қешиға Рәбәкә келипту. Муқәддәс китапта у наһайити гөзәл болған дәп йезилған. Әлиазар униңдин бир жутум су сориғанда у: «Ичкәйла, ғоҗам, мән төгилириңизниму суғирип берәй»,— дәп җавап бәрди. Уссап кәткән төгиләр көп су ичиду. Шуниң үчүн Рәбәкә қудуққа қайта-қайта жүгрәп, уларға су тошиди. Қанчилик еғир иш десиңизчу-һә! Рәсимдин Рәбәкә төгиләрни тинмай суғириватқанлиғини көрүватамсиз? ~ Әлиазар Йәһва Худа униң дуасиға қандақ җавап бәргәнлигигә һәйран қалди.
Әлиазар Рәбәкәға нурғун чирайлиқ соғиларни бәрди. Рәбәкә уни вә униң билән кәлгәнләрни дадисиниң өйигә чақирди. Әлиазар Ибраһим уни немә үчүн әвәткәнлигини вә Йәһва Худа дуасиға қандақ җавап бәргәнлигини ейтип бәрди. Рәбәкәниң аилиси униң Исһақ билән той қилишиға бәк хошал болди.
Рәбәкә Әлиазар билән Хананға берип, Исһаққа турмушқа чиқти
Қандақ ойлайсиз, Рәбәкә Исһақ билән той қилишни халидиму? ~ Рәбәкә Әлиазарни Йәһва Худа әвәткәнлигини билгән. Шуңа, өйдикилири униңдин: «Исһаққа турмушқа чиқиш үчүн Хананға беришни халамсиз?»— дәп сориғанда, у җававән: «Халаймән»,— деди. У дәрру Әлиазар билән кәтти. Улар Хананға кәлгәндә Рәбәкә Исһаққа турмушқа чиқти.
Рәбәкә Йәһва Худа униңдин күткән нәрсини қилғини үчүн, Худа уни бәрикәтлиди. Көп жиллардин кейин туғулған Әйса Мәсиһ Исһақ билән Рәбәкәниң әвлади болди. Әгәр сиз Рәбәкәға охшаш Йәһва Худани хошал қилсиңиз, У сизниму бәрикәтләйду.