17-ДӘРИС
Әйса Мәсиһ қандақ адәм болған?
Һәзрити Әйсаниң гөзәл пәзиләтлик адәм болғанлиғини үгинәләймиз. Әшу пәзиләтләр бизни униңға вә Атисиға йеқинлишишқа җәлип қилиду. Әйса Мәсиһниң қандақ есил пәзиләтлири болған? Биз уни қандақ үлгә қилалаймиз?
1. Һәзрити Әйса қайси тәрәпләрдин Атисиға охшайду?
Әйса Мәсиһ асманда Атиси билән миллиардлиған жиллар биллә болған. У асмандики меһир-муһәббәтлик Атисини көрүп, Униңдин үгәнгән. Шуңа униң ой-пикри, һис-туйғулири вә иш қилиш усули Атисиға бәк охшиған (Йоһан 5:19ни оқуң). Әмәлийәттә, Әйса өз Атисиниң пәзиләтлирини мукәммәл әкс әттүргән. Шуңа у мундақ дегән: «Мени көргән киши Атамниму көргән болиду» (Йоһан 14:9). Һәзрити Әйсаниң пәзиләтлири һәққидә үгәнгәндә, Яратқучи Йәһвани техиму яхширақ тоналайсиз. Мәсилән, Әйса Мәсиһниң кишиләргә қилған ғәмхорлуғидин Йәһва Худаниң сизгиму қанчилик ғәмхорлуқ қилидиғанлиғини көрәләйсиз.
2. Әйса пәйғәмбәр Йәһва Худани сөйгәнлигини қандақ көрсәткән?
Һәзрити Әйса: «Дуния мән Атамни сөйидиғанлиғимни билсун дәп Атам маңа әмир қилғинидәк, иш қилимән»,— дегән (Йоһан 14:31). У йәр йүзидә болғанда, һәтта қийин болсиму, өз Атисиға итаәтчан болуш арқилиқ Униңға болған чоңқур сөйгүсини көрсәткән. Әйса Мәсиһ йәнә башқиларға Атиси һәққидә ейтишни вә уларниң Униң билән достлуқ орнитишиға ярдәм беришни яхши көргән (Йоһан 14:23).
3. Әйса Мәсиһ барлиқ инсанларни сөйидиғанлиғини қандақ көрсәткән?
Муқәддәс китапта Әйсаниң дуниядики инсанларни сөйгәнлиги ейтилған (Пәнд-нәсиһәтләр 8:31). У өзиниң сөйгү-муһәббитини кишиләрни дайим илһамландуруш вә уларға ярдәм бериш арқилиқ көрсәткән. Әйса Мәсиһниң көрсәткән мөҗүзилиридин адәмләр униң пәқәт күч-қудритинила әмәс, адәмләргә көңүл бөлидиғанлиғиниму көргән (Марк 1:40—42). У һечкимни камситмиған, һәммисигә достанә муамилә қилған. Сөзлиригә қулақ салған кишиләргә у тәсәлли берип, барлиқ сәмимий адәмләргә үмүт әта қилған. У барлиқ инсанларни сөйгән. Улар үчүн азап-оқубәт чекип, һәтта һаятини пида қилған. Бирақ у, болупму өз тәлимлиригә қулақ салғанларни интайин яхши көргән (Йоһан 15:13, 14ни оқуң).
ЧОҢҚУРИРАҚ ҚЕЗИҢ
Әйса Мәсиһниң пәзиләтлири һәққидә көпирәк биливелиң. У өз сөйгү-муһәббитини вә сехийлиғини қандақ көрсәткәнлиги тоғрисида көрүп беқиң.
4. Әйса Мәсиһ өз Атисини чин қәлбидин сөйиду
Әйса пәйғәмбәрниң қалдурған үлгисидин Худаға болған чоңқур сөйгүмизни қандақ көрситәләйдиғанлиғимизни үгинәләймиз. Луқа 6:12, Йоһан 15:10 вә 17:26ни оқуң. Һәрбир айәтни оқуғандин кейин төвәндики соалға җавап бериң:
Әйса Мәсиһни үлгә қилип, Йәһва Худани сөйидиғанлиғимизни қандақ көрситәләймиз?
Әйса Мәсиһ өз Атисини чин қәлбидин сөйгән вә Униңға дуа арқилиқ сөзлигән
5. Һәзрити Әйса кишиләрниң муһтаҗлиқлириға көңүл бөлгән
Әйса Мәсиһ пәқәт өзигила көңүл бөлмәй, дайим башқиларни ойлиған. Һәтта һерип-чарчап кәткәндә, у вақти вә күчини чиқирип, башқиларға ярдәм бәргән. Марк 6:30—44ни оқуң, кейин төвәндики соалларға җавап бериң:
Мошу айәтләрдә Әйса Мәсиһниң башқиларға қандақ көңүл бөлгәнлигини көрәләймиз? (31, 34, 41 вә 42-айәтләрни көрүң.)
Һәзрити Әйса немә үчүн башқиларға ярдәм бәргән? (34-айәтни көрүң.)
Әйса Мәсиһ Яратқучи Йәһваниң пәзиләтлирини әкс әттүргән. Буниңдин Йәһва һәққидә немини үгинәләймиз?
Әйса Мәсиһ адәмләргә ғәмхорлуқ қилған. Биз уни қандақ үлгә қилалаймиз?
6. Һәзрити Әйса сехий киши болған
Әйса пәйғәмбәрниң көп мал-мүлки болмиған. Бирақ у йәнила сехий болған вә бизниму сехий болушқа үндигән. Әлчиләр 20:35ни оқуң, кейин төвәндики соалға җавап бериң:
Әйса Мәсиһниң сөзлиригә асасланғанда, бизни немә хошаллиққа ериштүриду?
ВИДЕОНИ көрүп, кейин төвәндики соал үстидә ойлиниң.
Мал-мүлкимиз көп болмисиму, сехийлиқни қандақ көрситәләймиз?
Сиз биләмсиз?
Муқәддәс китап бизни Әйса Мәсиһниң исми арқилиқ Яратқучи Йәһваға дуа қилишни үгитиду (Йоһан 16:23, 24ни оқуң). Биз бундақ дуа қилиш арқилиқ Мәсиһ Әйсаға болған миннәтдарлиғимизни көрситимиз. Сәвәви у бизниң Йәһва Худа билән дост болушимизға ярдәм бәргән.
БӘЗИЛӘР МУНДАҚ ДӘЙДУ: «Чекиватқан азап-оқубәтлиримиз билән Худаниң кари йоқ. У бизни синаватиду».
Һәзрити Әйса өз Атисиниң пәзиләтлирини әкс әттүргән. Буниңдин униң иш-һәрикәтлири Йәһва Худаниң азап-оқубәтлиримизгә көңүл бөлидиғанлиғини қандақ көрситиду?
ХУЛАСӘ
Әйса Мәсиһ Яратқучиси Йәһва Худани вә инсанларни сөйиду. У Атисини үлгә қилған, шуңа биз Әйса тоғрилиқ көпирәк үгәнгәнсири, Тәңри Йәһвани техиму яхши тоналаймиз.
Тәкрарлаш
Биз Әйса Мәсиһни үлгә қилип, Йәһва Худаға болған чоңқур сөйгүмизни қандақ көрситәләймиз?
Биз һәзрити Әйсани үлгә қилип, башқа инсанларға болған сөйгүмизни қандақ көрситәләймиз?
Әйса Мәсиһниң пәзиләтлиридин қайсисини әң яқтурдиңиз?
ИЗДИНИП КӨРҮҢ
Сиз Әйса Мәсиһтин немини үгинәләйсиз?
«Әйсани үлгә қилиң» («Әйса пәйғәмбәр — йол, һәқиқәт вә һаят», 317-бәт)
Әйса Мәсиһниң исми арқилиқ дуа қилиш немә үчүн муһим екәнлигини биливелиң.
«Немә үчүн Әйсаниң исми арқилиқ дуа қилимиз?» («Күзитиш мунари» 2008-жил, 1-февраль)
Әйса пәйғәмбәрниң ташқи көрүнүши һәққидә Муқәддәс китап немә дәйду?
«Әйса пәйғәмбәрниң ташқи көрүнүши қандақ болған?» (Торбәттики мақалә)
Һәзрити Әйсаниң аялларға қилған муамилисидин немини үгинәләймиз?
«Худаниң нәзәридә аяллар иззәт-һөрмәткә сазавәр» («Күзитиш мунари» 2012-жил, 1-сентябрь)