Аддий өткүзүлгән Хатириләш кечисидин Падишайимиз һәққидә немини билимиз?

1, 2. а) Әйса Хатириләш кечисини немишкә аддий өткүзгән? ә) Әйсаниң қайси пәзиләтлирини көрүп чиқимиз?

ХАТИРИЛӘШ КЕЧИСИ қандақ өткүзүлидиғанлиғини ейтип берәләмсиз? Шүбһисизки, һәммимиз униң қандақ өтидиғанлиғини ейтип берәләймиз, сәвәви бу мәйрәм аддий өткүзүлиду. Шундақ болсиму, бу учришишниң әһмийити зор. «Хатириләш кечиси шунчилик муһим болса, немә үчүн у шунчә аддий өткүзүлиду?»— дәп соришиңиз мүмкин.

² Әйса йәрдә болғанда, муһим һәқиқәтләрни аддий, ениқ вә чүшинишкә оңай қилип үгәткән (Мәт. 7:28, 29). Шуниңға охшаш өзиниң өлүминиму аддий усулда хатирилишимизb керәклигини ейтқан. Келиңлар, Әйса Хатириләш кечиси тоғрилиқ немә ейтқанлиғини вә немә қилғанлиғини тәпсилий көрүп чиқайли. Биз Әйсаниң қанчилик кәмтәр, батур вә меһир-муһәббәтлик екәнлигини вә уни қандақ яхширақ үлгә қилалайдиғанлиғимизни үгинимиз.

ӘЙСАНИҢ КӘМТӘРЛИГИ

3. Мәтта 26:26—28дә ейтилғандәк, Әйса Хатириләш кечисини қандақ аддий өткүзгән? Петир нан билән шарап немини билдүриду?

³ Әйса Хатириләш кечисини орунлаштурғанда, 11 садиқ әлчиси қешида болған. У Өтүп кетиш һейттин ешип қалған ғизани пайдилинип, Хатириләш кечисини аддий өткүзгән еди (Мәтта 26:26—28ни оқуң). Әйса пәқәт дәстихандики петир нан билән шарапни пайдиланди. Әйса әлчилиригә петир нан билән шарап улар үчүн қурбанлиққа бәрмәкчи болған мукәммәл тенини вә қенини билдүридиғанлиғини ейтти. Әлчиләр бу муһим вақиәниң шунчилик аддий өткәнлигигә һәйран қалмиған охшайду. Немә үчүн?

4. Әйса Мартаға бәргән мәслиһитини өзи қандақ қолланди?

⁴ Келиңлар, буниңдин бирнәччә ай авал йүз бәргән вақиәгә диққәт қилайли. Бу Әйсаниң вәз хизмитиниң үчинчи жили болуп, у йеқин достлири Лазар, Марта вә Мәрийәмниң өйидә меһман болған. Уларниң өйидә Әйса муһим нәрсиләрни ейтип бәргән. Марта һөрмәтлик меһманни күтимән дәп, мол дәстихан тәйярлаш билән аварә болди. Әйса буни байқап, Мартаға мулайимлиқ билән нәсиһәт берип, мол дәстихан йейишниң болушниң һаҗити йоқ екәнлигини чүшинишкә ярдәм бәрди (Луқа 10:40—42). Кейинирәк, өлүмигә бирнәччә саат қалғанда, Әйса бу мәслиһәтни өзи қоллинип, Хатириләш кечисини аддий өткүзгән. Буниңдин Әйса һәққидә немини билишкә болиду?

5. Хатириләш кечисини аддий өткүзгәнлигидин Әйса һәққидә немини билимиз? Филипиликләргә 2:5—8дики айәтләр буни қандақ испатлайду?

⁵ Әйсаниң кәмтәрлиги гәп-сөзлири вә иш-һәрикәтлиридин көрүнгән. Шуниң үчүн, йәрдики һаятиниң ахирқи кечиси униң тәңдашсиз кәмтәрлик көрсәткәнлиги һәйран қаларлиқ әмәс (Мәт. 11:29). Әйса инсанийәт тарихида әң улуқ қурбанлиқни бәрмәкчи болғанлиғини вә кейин Йәһва уни тирилдүрүп, асманда падиша қилидиғанлиғини яхши билгән. Шундақ болсиму, у өлүмини мурәккәп яки тәнтәнилик усулда әскә елип, башқиларниң өзигә орунсиз етибар қилишини халимиған. Әксинчә, Әйса шагиртлириға униң өлүмини жилиға бир қетим аддий усулда хатириләшни ейтти (Йоһ. 13:15; Кор. 1-х. 11:23—25). Хатириләш кечисини аддий өткүзгәнлиги Әйсаниң тәкәббур болмиғанлиғини көрситиду. Асмандики Падишайимиз кәмтәр екәнлигигә биз интайин хошал! (Филипиликләргә 2:5—8ни оқуң).

6. Синақларға дуч кәлгәндә, Әйсаға охшаш кәмтәр болуш үчүн немә қилалаймиз?

⁶ Әйсаға охшаш кәмтәр болуш үчүн немә қилалаймиз? Буниң бир усули — башқиларниң мәнпәитини ойлаш (Флп. 2:3, 4). Әйсаниң өлүми алдидики кәчкә йәнә бир қетим диққәт қилайли. Әйса пат арида азаплиқ өлүм билән өлидиғанлиғини билсиму, кәйнидә қайғуруп, жиғлап қалидиған садиқ әлчилиридин ғәм қилған. Шуңа шу кечиси у уларниң йенида болуп, нәсиһәтләрни бәргән вә илһамландурған (Йоһ. 14:25—31). У башқиларниң мәнпәитини өзиниңкидин үстүн қойған. Кәмтәрликниң немә дегән әҗайип үлгиси!

ӘЙСАНИҢ БАТУРЛУҒИ

7. Хатириләш мәрасимини орунлаштурғандин кейин, Әйса қандақ алаһидә батурлуғини көрсәткән?

⁷ Әйса Хатириләш мәрасимини орунлаштурғандин кейин, алаһидә батурлуқ көрсәткән. Қандақларчә? У Атисиниң өзи үчүн қилған ирадисини әмәлгә ашурушқа тәйяр болған. Буниң үчүн Әйса күпүрлүк қилғучи дәп әйиплинип, җазаға тартилидиғанлиғини билсиму, у сөзидин қайтмиди (Мәт. 26:65, 66; Луқа 22:41, 42). Әйса өлгичә садақәтмәнлиги сақлап, Йәһваниң исмиға шан-шәрәп кәлтүрди, Униң алий һөкүмранлиқ һоқуқини қоллап-қувәтлиди вә товва қилған инсанларға мәңгү яшашқа йол ечип бәрди. Шуниң билән, Әйса шагиртлирини келәчәктики синақларға тәйярлиди.

8. а) Әйса садиқ әлчилиригә немә ейтти? ә) Әйса өлгәндин кейин шагиртлири қандақ қилип батурлуқ көрсәтти?

⁸ Әйса өзи дуч келидиған ишлар үчүн ғәм-әндишә қилишниң орниға, өз ғемини чәткә қайрип қоюп, садиқ әлчилириниң еһтияҗлириға көңүл бөлгән. Йәһуда кәткәндин кейин орунлаштурулған кәчлик дәстихан Әйсаниң келәчәктики майланған әгәшкүчилиригә униң төкүлгән қени вә йеңи келишим уларға қандақ пайда елип келишини әслитип туруши керәк еди (Кор. 1-х. 10:16, 17). Әгәшкүчилириниң садиқ болуп қелишиға вә өзи билән асманда болушиға ярдәм бериш үчүн, Әйса уларға өзиниң вә Атисиниң тәләплирини ейтқан (Йоһ. 15:12—15). Улар келәчәктә зиянкәшликкә учрайдиғанлиғи тоғрисидиму агаһландурған. Кейин шагиртлирини: «Җасур болуңлар!»— дәп униңдин үлгә елишқа чақирди (Йоһ. 16:1—4а, 33). Көп жиллар өтсиму, Әйсаниң шагиртлири униңға охшаш өз җенини айимай хизмәт қилип, батурлуқ көрсәткән. Һәтта еғир қийинчилиқларни баштин кәчүрсиму, улар бир-биригә яр-йөләк болған (Ибр. 10:33, 34).

9. Әйсаниң батурлуғидин қандақ үлгә алалаймиз?

⁹ Бүгүнки күндә бизму Әйсаниң батурлуғидин үлгә алимиз. Мәсилән, етиқади үчүн зиянкәшликкә дуч кәлгән қериндашларға ярдәм бериш үчүн батурлуқ керәк. Бәзидә қериндашлар адаләтсизлик билән түрмигә ташлиниши мүмкин. Шу чағда қолумиздин кәлгининиң һәммисини қилип, улар үчүн дуа қилайли. Һәтта, уларни һөкүмәт вә сотниң алдида қоғдашқа тәйяр болушимиз керәк (Флп. 1:14; Ибр. 13:19). Батурлуқ көрситишниң йәнә бир йоли — һәқиқәт тоғрисида жүрәклик һалда сөзләш (Әлч. 14:3). Әйсаға охшаш бизму адәмләрниң қаршилиғиға қаримастин, Падишалиқ һәққидики хәвәрни давамлиқ вәз қилишқа бәл бағлидуқ. Лекин биз бәзи вақитларда қорқушимиз мүмкин. Шу чағда немә қилсақ болиду?

10. Хатириләш кечисиниң алдидики һәптиләрдә немә қилишимиз лазим вә немә үчүн?

¹⁰ Әйсаниң төләм қурбанлиғи бизгә үмүт бәрди. Бу үмүт тоғрисида ойлаш батур болушимизға ярдәм бериду (Йоһ. 3:16; Әфәс. 1:7). Хатириләш мәрасиминиң алдидики һәптиләрдә төләм қурбанлиғиға болған миннәтдарлиғимизни риваҗландуруш пурситимиз болиду. Хатириләш кечисиниң алдида оқулидиған Муқәддәс китап айәтлирини оқуп, Әйсаниң өлүми алдидики вақиәләр һәққидә чоңқур ойлиниң. Шу чағда Һакимдаримизниң кәчки зияпитигә кәлгәндә, шарап билән петир нанниң символлуқ мәнасини вә шу тәңдашсиз қурбанлиқниң әһмийитини чоңқурирақ чүшинимиз. Йәһва Худа вә Әйса биз үчүн немә қилғанлиғини қәдирлисәк вә бизгә һәм йеқинлиримизға қандақ пайда әкәлгәнлигини чүшәнсәк, үмүтимиз техиму күчийиду. Бу бизни ахирғичә җасарәтлик болушқа дәвәт қилиду (Ибр. 12:3).

11, 12. Җуқурида биз немини билдуқ?

¹¹ Җуқурида биз Һакимдаримизниң кәчки зияпити бебаһа төләм қурбанлиғини әслитипла қоймай, Әйсаниң әҗайип кәмтәрлигини вә батурлуғини көрситидиғанлиғини билдуқ. Әйса һазир асманда биз үчүн ялвуруп сорайдиған Баш роһаний сүпитидә мошу есил пәзиләтләрни көрситиватқанлиғи үчүн бәк миннәтдармиз (Ибр. 7:24, 25). Сәмимий миннәтдарлиғимизни билдүрүш үчүн Әйса буйриғандәк униң өлүмини һәр жили хатирилишимиз керәк (Луқа 22:19, 20). Биз Хатириләш мәрасимини 14-нисан күни өткүзимиз. Бу күн — жилниң әң муһим күни.

¹² Хатириләш кечисиниң аддийлиғи Әйсаниң йәнә бир пәзилитини көрситиду. Йәрдә яшиғанда Әйса бу пәзилити билән һәммигә мәлум болған. Бу қандақ пәзиләт?

ӘЙСАНИҢ МЕҺИР-МУҺӘББИТИ

13. Йоһан 15:9 вә Йоһанниң 1-хети 4:8—10да Йәһваниң вә Әйсаниң меһир-муһәббити қандақ тәсвирләнгән? Уларниң меһир-муһәббитидин кимләр пайда алиду?

¹³ Әйса һәммә иш-һәрикәтлири билән Йәһваниң меһир-муһәббитини мукәммәл һалда әкс әттүргән (Йоһан 15:9; Йоһанниң 1-хети 4:8—10ни оқуң). Әң муһими, Әйса биз үчүн һаятини қурбан қилишини чин жүрәктин халиған. Мәйли биз майланған яки «башқа қойлардин» болайли, Йәһва билән Әйса бизгә төләм қурбанлиғи арқилиқ көрсәткән меһир-муһәббитидин пайда алимиз. (Йоһ. 10:16; Йоһ. 1-х. 2:2). Хатириләш кечисиниң символлири тоғрисида ойлап көрәйли. Булар Әйсаниң шагиртлирини яхши көридиғанлиғини вә уларға ғәмхорлуқ қилидиғанлиғини көрситиду. Қандақ қилип?

14. Әйса шагиртлирини яхши көргәнлигини қандақ көрсәткән?

¹⁴ Әйса шагиртлириға униң өлүмини аддий усулда хатириләшни буйруш арқилиқ уларға меһир-муһәббәт көрсәткән. Улар Хатириләш кечисини һәр жили, һәрқандақ вәзийәтләрдә, һәтта түрмидә олтарғандиму өткүзүши керәк еди (Вәһ. 2:10). Бу шагиртлириниң қолидин кәлдиму? Әлвәттә!

15, 16. Бәзи қериндашлар Һакимдаримизниң кәчки зияпитини қийин вәзиәйтләрдә қандақ өткүзгән?

¹⁵ Мошу күнгичә Әйсаниң өлүмини әсләш үчүн һәқиқий мәсиһийләр көп күч чиқармақта. Улар һәтта қийин вәзийәтләрдиму Һакимдаримизниң кәчки зияпитини өткүзүш тәртивигә риайә қилишқа тиришқан. Буниң бир мисалини көрәйли. Хитайда бир кишилик камерада олтарған Харольд Кинг бурадәргә бу кәчни өткүзүш үчүн тапқурлуқ керәк болған. У һечкимгә билиндүрмәй қолида бар нәрсиләрдин символларни тәйярлиди. Шундақла у Хатириләш кечиси қайси күнгә мас келидиғанлиғини һесаплап чиқиришқа тиришқан. Шу күн кәлгәндә Харольд бурадәр камерида ялғуз өзи нахша ейтип, дуа қилип, Язмиларға асасланған нутуқ ейтти.

¹⁶ Башқа мисални көрүп чиқайли. Иккинчи дуния урушида мәһбуслар лагериға қамалған бир топ қериндашлиримиз Һакимдаримизниң кәчки зияпитини өткүзүш үчүн һаятини тәвәккәл қилған. Амма бу мәрасим бәк аддий болғанлиқтин, улар уни йошурун өткүзәлигән. Улар мундақ дәп язди: «Биз ақ рәхт йейилған орундуқни қоршап турдуқ. Униң үстидә символлар турди. Бизни көрүп қалмисун дәп чирақ яндурмай, шамни яндурдуқ. ... Атимизниң муқәддәс исмини ақлаш үчүн җан пида қилишқа тәйярмиз дегән вәдимизни йәнә бир қетим ейттуқ». Етиқатниң немә дегән әҗайип үлгиси! Әйса Хатириләш кечисини өткүзүшни қийин вәзийәттиму асан қилиш арқилиқ бизгә зор меһир-муһәббәт көрсәткән!

17. Өзүмизгә қандақ соалларни қойсақ болиду?

¹⁷ Хатириләш кечисигә аз қалғанда, төвәндики соаллар тоғрилиқ ойлап көрсәк болиду: «Әйсаниң меһир-муһәббитини қандақ үлгә қилсам болиду? Өзүмниң әмәс, қериндашларниң мәнпәитини көпирәк ойлаймәнму? Уларға көп тәләп қоюмәнму яки уларниң имканийити чәклик екәнлигини чүшинимәнму?» Һәрқачан Әйсадин үлгә елип, башқиларға «һәмдәртлик» яки һисдашлиқ көрситәйли (Пет. 1-х. 3:8).

ӘЙСАНИҢ КӘМТӘРЛИГИ, БАТУРЛУҒИ ВӘ МЕҺИР-МУҺӘББИТИНИ ҮЛГӘ ҚИЛИҢ

18, 19. а) Биз немини әскә алидиғанлиғимиз сөзсиз? ә) Сиз немә қилишқа бәл бағлидиңиз?

¹⁸ Биз Хатириләш кечисини мәңгү өткүзмәймиз. Бүйүк апәт вақтида Әйса «келип», «таллиғанлирини» асманға жиғиду. Шу вақиттин башлап Хатириләш кечисини өткүзмәйдиған болимиз (Кор. 1-х. 11:26; Мәт. 24:31).

¹⁹ Бирақ Хатириләш кечиси давамлиқ өткүзүлмисиму, Йәһваниң хәлқи бу аддий мәрасимни кәмтәрлик, батурлуқ вә меһир-муһәббәтниң тарихтики әң зор үлгиси сүпитидә әскә алидиғанлиғи сөзсиз. Улар йеңи дунияда бу мәрасим тоғрилиқ билмигәнләргә ейтип берип, уларни мустәһкәмләйду. Бу мәрасимдин пайда елишни халисақ, һазирниң өзидә Әйсаниң кәмтәрлиги, батурлуғи вә меһир-муһәббитини үлгә қилишимиз керәк. Шундақ қилсақла Йәһва бизни мукапатлайду (Пет. 2-х. 1:10, 11).