Йәһва дуалиримға җавап берәмду?

1, 2. Немә үчүн Йәһва Худа бизниң дуалиримизға җавап бәрмәйду дәп ойлишимиз мүмкин?

«ЙӘҺВА сән үчүн тәсәлли болғай, У жүригиңниң хаһишлирини һәм орунлап бәргәй» (Зәб. 37:4). Бу кишигә һузур беғишлайдиған вәдә-һә? Биз дуада Худадин сориған нәрсиләрниң һәммисигә җавап алимиз дәп үмүт қилишимиз керәкму? Бу соал немә үчүн муһим? Бирнәччә мисалларни көрүп бақайли. Той қилмиған бир қериндаш Падишалиқ вәз ейтқучилири үчүн мәктәптә оқуш тоғрилиқ дуа қилиду. Амма бирнәччә жил өтүп кәткән болсиму, у техиғичә мәктәпкә тәклип қилинмайду. Бир яш бурадәр җамаәттә көпирәк хизмәт қилиш үчүн ағриғидин сақийип кетишни Йәһвадин дуада сорайду. Амма униң саламәтлиги яхши тәрәпкә өзгәрмәйду. Ата-ана балисиниң һәқиқәттә қелиши үчүн дуа қилиду. Бирақ балиси Йәһва Худаға хизмәт қилишни тохтитиду.

² Бәлким, сизму Йәһваға мәлум бир иш үчүн дуа қилисиз, бирақ дуайиңиз җавапсиз қалмақта. Буниңдин Йәһва башқиларниң дуасиға җавап берип, сизниң дуайиңизға җавап бәрмәйду дәп хуласә чиқиришиңиз мүмкин. Джанисb исимлиқ бир қериндаш дәл шундақ һис-туйғуда болған. У йолдиши билән Бәйтәлдә хизмәт қилиш арзу-истиги тоғрилиқ Йәһваға дуа қилған. У мундақ дәйду: «Мән пат йеқинда Бәйтәлдә хизмәт қилидиғанлиғимизға ишәнгән едим». Амма айлар өтти, жиллар өтти, улар Бәйтәлгә тәклип қилинмиди. Джанис мундақ дәйду: «Көңлүм йерим болуп гаңгирап қалдим. Мән Йәһвани үмүтсизләндүридиған бирәр иш қилип қойдумму дәп ойлидим. Бәйтәлдә хизмәт қилиш тоғрилиқ ениқ дуа қилдим. Немә үчүн У мениң дуайимға җавап бәрмиди?»

3. Бу мақалидә немиләрни көрүп чиқимиз?

³ Бәзи вақитларда Йәһва бизниң дуалиримизни аңламду дәп әнсиришимиз мүмкин. Һәтта бәзи қедимий садиқ хизмәтчиләрму шундақ ойлиған (Аюп 30:20; Зәб. 22:2; Һаб. 1:2). Йәһваниң дуалириңизға җавап беридиғанлиғиға сизни немә қайил қилалайду? (Зәб. 65:2) Мошу соалға җавап бериш үчүн төвәндики бирнәччә соалларни муһакимә қилип чиқимиз. 1) Биз Йәһвадин немиләрни күтсәк болиду? 2) Йәһва биздин немини күтиду? 3) Немә үчүн сориған нәрсилиримизни өзгәртишимиз керәк болуши мүмкин?

БИЗ ЙӘҺВАДИН НЕМИЛӘРНИ КҮТСӘК БОЛИДУ?

4. Йәрәмия 29:12-айәткә асасән, Йәһва немә қилишқа вәдә бериду?

⁴ Йәһва Худа дуалиримизға қулақ салидиғанлиғини вәдә қилған (Йәрәмия 29:12ни оқуң). Худа Өзиниң садақәтмән хизмәтчилирини яхши көриду вә уларниң дуалириға һәргизму бепәрвалиқ қилмайду (Зәб. 10:17; 37:28). Бирақ бу һәргизму барлиқ арзу-тиләклиримизни әмәлгә ашуридиғанлиғини билдүрмәйду. Биз сориған бәзи нәрсиләрниң җававиға еришиштин бурун, йеңи дунияниң келишини күтүшимизгә тоғра келиду.

5. Йәһва Худа бизниң дуалиримизни аңлиғанда немиләргә диққәт ағдуриду? Чүшәндүрүп бериң.

⁵ Йәһва арзу-тиләклиримизниң Униң ирадиси билән қандақ бағлиниши барлиғиға көңүл бөлиду (Йәшая 55:8, 9). Худаниң һөкүмранлиғи астида адәмләрниң йәрдә бәхитлик яшиши Униң ирадисиниң бир қисми. Амма Шәйтан инсанлар өз-өзини башқурса, яхширақ болиду дәп ейтқан (Ярит. 3:1—5). Иблисниң ялғанчи екәнлигини испатлаш үчүн Йәһва инсанниң инсан үстидин һөкүмранлиқ қилишиға йол қойған. Бирақ инсанларниң һөкүмранлиғи нурғун қийинчилиқларни кәлтүрүп чиқарған (Вәз 8:9). Йәһва Худа қийинчилиқлиримизниң һәммисини дәл һазир немә үчүн йоқ қилмайдиғанлиғини чүшинимиз. Әгәр У шундақ қилса, бәзиләр инсанларниң һөкүмранлиғи яхширақ вә инсанийәт қийинчилиқлирини өзи һәл қилалайду дәп йәкүн чиқириши мүмкин.

6. Немә үчүн Йәһва дайим сөйгү-муһәббәт вә адаләтлик билән һәрикәт қилидиғанлиғиға ишинишимиз керәк?

⁶ Йәһва охшаш арзу-тиләкләргә һәр түрлүк йоллар билән җавап қайтуруши мүмкин. Мәсилән, Хизқия падиша еғир кесәл билән ағриғанда, Йәһваға дуа қилип, кесилидин сақийишини өтүнгән. Йәһва Худа униң дуасиға җавап берип, уни сақайтқан (Пад. 2-яз. 20:1—6). Әлчи Паул Йәһвадин «тенидики тикәнни» еливетишни өтүнгән. Бәлким, бу җисманий җәһәттики бир кесәл болған. Лекин Йәһва Худа уни сақайтмиди (Кор. 2-х. 12:7—9). Әлчи Яқуп билән Петрусниң мисалини көрүп бақайли. Һирод падиша уларниң иккилисини өлтүрүшни халиған. Җамаәттикиләр иккилиси үчүнму дуа қилған. Лекин Яқуп өлтүрүлгән, Петрус болса, мөҗүзилик йол билән қутқузулған (Әлч. 12:1—11). Биз бәлким «Йәһва немишкә Петрусни қутқузди, лекин Яқупни қутқузмиған?» дәп ойлишимиз мүмкин. Муқәддәс китапта бу тоғрилиқ һечнемә дейилмигәнc. Бирақ биз Йәһва Худаниң барчә «йоллири адаләтликтур» екәнлигигә ишәнчлик болалаймиз (Қ. шәр. 32:4). Биз билимизки, Йәһва Худа Петрусниму, Яқупниму яхши көргән (Вәһ. 21:14). Бәзи вақитларда Йәһва биз ойлиғандәк җавап бәрмәслиги мүмкин. Бирақ мәйли қандақ җавап бәрсиму, биз униңға һечқачан гуман кәлтүрмәймиз. Чүнки Йәһваниң дуалиримизға һәрдайим меһир-муһәббәт вә меһрибанлиқ билән җавап беридиғанлиғиға ишәнчимиз камил (Аюп 33:13).

7. Биз немидин сақлинишимиз керәк вә немә үчүн?

⁷ Биз өз вәзийитимизни башқиларниң вәзийити билән селиштуруштин сақлинишқа тиришимиз. Мәсилән, биз Йәһвадин ениқ бир нәрсә соришимиз мүмкин, бирақ өтүнүшимиз орунланмаслиғи мүмкин. Кейин башқа бириниңму охшаш нәрсини Худадин сориғанлиғини вә Йәһваниң униңға җавап бәргәнлигини билимиз. Мәсилән, Анна исимлиқ бир қериндишимизниң баштин кәчүргәнлирини көрүп бақайли. У йолдиши Мэтьюниң рак кесилидин сақийип кетишини тилигән. Шуниң билән бир вақитта икки яшанған етиқатчи қериндашниңму рак кесилигә қарши күришиватқанлиғини билгән. Анна йолдиши Мэтью вә шу икки қериндаш үчүн дуа қилған. Шу икки қериндаш рак кесилидин сақийип кәткән, амма Мэтью сақаймай өлүп кәткән. Дәсләптә Анна шу икки қериндашниң яхши болуп қалғанлиғини ойлиғанда, Йәһва уларға ярдәм бәргән дәп қариған. Шундақ болса, Йәһва немә үчүн йолдиши үчүн қилған дуасиға җавап бәрмиди? Әлвәттә, шу икки қериндашниң қандақ сақийип кәткәнлигини билмәймиз. Бирақ биз чоқум билимизки, Йәһва бизниң барлиқ азап-оқубәтлиримизни мәңгүгә йоқ қилиду вә өлүп кәткән достлирини тирилдүрүшни төрт көзи билән күтиду (Аюп 14:15).

8. а) Йәшая 43:2дики айәткә асасән, Йәһва Худа бизни қандақ қоллап-қувәтләйду? ә) Синақларға дуч кәлгәндә, дуа бизгә қандақ ярдәм берәләйду? («Дуа еғир күнләрдә бәрдашлиқ беришимизгә ярдәм қилиду» намлиқ видеони көрүң.)

⁸ Йәһва бизни һәрдайим қоллап-қувәтләйду. У көйүмчан Атимиз болғачқа, азап-оқубәт чекишимизни халимайду (Йәшая 63:9). Шундақтиму, У бизни һәммә қийинчилиқлардин қутулдурмайду (Йәшая 43:2ни оқуң). Амма У синақлардин өтүшимизгә ярдәм беридиғанлиғини вәдә қилиду. Йәһва Худа биз учриған синақларниң бизгә мәңгү зиян йәткүзүшигә йол қоймайду. У бизгә давамлиқ бәрдашлиқ беришимиз үчүн күчлүк муқәддәс роһини бериду (Луқа 11:13; Флп. 4:13). Синақларға бәрдашлиқ берип, Худаға садиқ болуп қелишимиз үчүн, У дәл вақтида вә муһтаҗ болған нәрсини беридиғанлиғиға ишәнч қилалаймизd.

ЙӘҺВА БИЗДИН НЕМИНИ КҮТИДУ?

9. Яқуп 1:6, 7дә йезилғандәк, Атимиз Йәһва бизгә ярдәм беридиғанлиғиға немә үчүн ишинишимиз керәк?

⁹ Йәһва бизниң Униңға ишинишимизни күтиду (Ибр. 11:6). Бәзидә қийинчилиқлар бизни чирмавалғандәк һис қилишимиз, һәтта Йәһваниң бизгә ярдәм беридиғанлиғиға гуман қилишимиз мүмкин. Амма Муқәддәс китапта йезилғандәк, Худаниң күчи билән биз «сепиллардин сәкрәп» өтәләймиз (Зәб. 18:29). Шуңа, гуман қилишниң орниға, Йәһва дуайимизға җавап беридиғанлиғиға толуқ ишинишимиз керәк (Яқуп 1:6, 7ни оқуң).

10. Дуалиримизға мас қандақ һәрикәт қилалаймиз?

¹⁰ Йәһва бизниң дуалиримизға мас иш-һәрикәт қилишимизни күтиду. Мәсилән, бир бурадәр конгрессқа қатнишиш үчүн иш орнидин дәм елиш соримақчи болуп, Йәһвадин ярдәм сорайду. Йәһва Худа бу дуаға қандақ җавап бериши мүмкин? У бу бурадәргә башлиғиниң алдиға бериш үчүн җасарәт бериши мүмкин. Амма бурадәр дуасиға мас һәрикәт қилиши керәк. Бәлким, башлиғидин қайта-қайта сориши, һәтта бир хизмәтдиши билән иш вақтини алмаштурушни сорап көрүшкә тоғра келиши мүмкин. Керәк болса, мааш алмай дәм елиш тәкливини сориса болиду.

11. Ғәм-әндишилиримиз тоғрилиқ немә үчүн қайта-қайта дуа қилишимиз керәк?

¹¹ Йәһва ғәм-әндишилиримиз тоғрилиқ қайта-қайта дуа қилишимизни күтиду (Сал. 1-х. 5:17). Әйса бәзи дуа-тиләклиримизниң дәрһал әмәлгә ашмайдиғанлиғини ейтқан (Луқа 11:9). Шуңа, давамлиқ дуа қилиң. Чиң көңлүңиздин қайта-қайта дуа қилиң (Луқа 18:1—7). Биз мәлум бир иш тоғрилиқ давамлиқ дуа қилғинимизда Йәһваға арзу-тиләклиримиз биз үчүн интайин муһим екәнлигини көрситимиз. Униңдин башқа, Униң бизгә ярдәм беришкә қадир екәнлигигә болған ишәнчимизни нәмаян қилимиз.

НЕМӘ ҮЧҮН БӘЗИ ТИЛӘКЛИРИМИЗНИ ӨЗГӘРТИШИМИЗ КЕРӘК БОЛУШИ МҮМКИН?

12. а) Худадин сориған тиләклиримизгә мунасивәтлик өзүмизгә қандақ соал қоюшимиз керәк? ә) Бизниң дуалиримиз Йәһваға болған һөрмитимизни қандақ көрситиду? («Арзу-тиләклирим Йәһваға болған һөрмитимни көрситәмду?» дегән рамкиға қараң.)

¹² Әгәр дуада сориған нәрсилиримизгә дәрһал еришәлмисәк, өзүмиздин мундақ үч соални сорап көрсәк болиду. Биринчи, «Мән сориған нәрсиләр Худаниң ирадисигә мас келәмду?» Биз һемишә өзүмизгә неминиң пайдилиқ екәнлигини билимиз дәп ойлаймиз. Амма биз сориған нәрсиләр биз үчүн пайдилиқ болмаслиғи мүмкин. Мәсилән, бир қийинчилиқниң һәл қилиниши тоғрилиқ дуа қиливатимиз дәйли, бирақ биз сориғандинму яхширақ һәл қилишниң йоли бар болуши еһтимал. Бәлким, сориғанлиримиз Йәһваниң ирадисигә мас кәлмәйду (Йоһ. 1-х. 5:14). Мақалиниң бешида тилға елинған ата-аниниң мисалини көрүп бақайли. Улар Йәһвадин балисиниң һәқиқәт йолида қелишини сориған. Бу өтүнүш Худаниң ирадисигә мувапиқ болсиму, Йәһва һечкимни Униңға хизмәт қилишқа мәҗбурлимайду. Яратқучимиз Униңға ибадәт қилиш кишиниң шәхсән таллиши болғанлиғини халайду (Қ. шәр. 10:12, 13; 30:19, 20). Шуңа, ата-анилар Йәһвадин балисиниң һәқиқәттә турушини әмәс, балисиниң жүригигә тәсир қилип, Худани сөйүшкә вә Униң билән дост болушиға дәвәт қилишта ярдәм соралайду (Пәнд н. 22:6; Әфәс. 6:4).

13. Ибранийларға 4:16-айәтләргә асасән, Йәһва Худа бизгә қачан ярдәм бериду? Чүшәндүрүң.

¹³ Иккинчи соал, «Һазир Йәһваниң өтүнүшимни орунлайдиған вақитму?» Бәлким, Йәһваниң дәрһал дуалиримизға җавап беришини үмүт қилимиз. Амма Йәһва бизгә ярдәм беридиған әң яхши вақит қачан болидиғанлиғини билиду (Ибранийларға 4:16ни оқуң). Әгәр дуалиримизға дәрһал җавап алалмисақ, бәлким Йәһва «яқ» дәп җавап бәрди дәп ойлишимиз мүмкин. Бирақ У техи җавап бәрмигәнду. Ағриғидин сақийип кетиши үчүн дуа қилип кәлгән бир яш бурадәрниң мисалини алайли. Әгәр Йәһва Худа уни мөҗүзә қилип сақайтқан болса, Шәйтан «у сақайғанлиғи үчүнла Йәһваға давамлиқ хизмәт қиливатиду» дәп әйипләләтти (Аюп 1:9—11; 2:4). Шундақла Йәһва барлиқ ағриқларни давалап сақайтидиған вақитни аллиқачан бәлгүләп қойған (Йәшая 33:24; Вәһий 21:3, 4). Шу вақит кәлгичә биз мөҗүзилик йол билән сақийип кетишни үмүт қилмаймиз. Шуңа, бурадәр бәрдашлиқ берип, Худаға садақәтмәнлик билән хизмәт қилишни давамлаштуруш үчүн Йәһвадин күч-мәдәт вә тинч-хатирҗәмлик беришни соралайду (Зәбур 29:11).

14. Джанисниң мисалидин немигә үгәндиңиз?

¹⁴ Бәйтәлдә хизмәт қилиш тоғрилиқ дуа қилған Джанис Йәһва униң дуасиға қандақ җавап бәргәнлигини бәш жилдин кейин чүшинип йәткән. У мундақ дәйду: «Йәһва Худа шу вақитни пайдилинип, мени көп нәрсиләргә үгитип, техиму яхширақ хизмәтчи болушқа ярдәм бәрди. Йәһваға болған ишәнчим техиму күчәйди. Шәхсий үгиниш өткүзүш адитимни яхшилашқа муһтаҗ едим. Униңдин башқа, мәйли қәйәрдә Йәһваға хизмәт қилсамму, хошал болушқа үгинишим керәкти». Кейинирәк, Джанис йолдиши билән җамаәтләрни зиярәт қилип хизмәт қилған. Өтмүшни әсләп, Джанис мундақ дәйду: «Йәһва дуайимға шундақ усулда җавап бериду дәп ойлимиған едим. У маңа қиммәтбаһа соға бәргәнлигини чүшинип йетиш үчүн вақит керәк болди. Бирақ мән Униң сөйгү-муһәббити вә меһрибанлиғини һис қилғанлиғим үчүн интайин миннәтдармән».

15. Немә үчүн ениқ бир өтүнүш билән чәкләнмәслигимиз керәк? (Рәсимгиму қараң.)

¹⁵ Үчинчи соал, «Мән башқа бир нәрсә үчүн дуа қилишим керәкму?» Дуада немигә муһтаҗ екәнлигимизни ениғирақ ейтиш яхши, бирақ Йәһваниң биз үчүн немини ирадә қилғанлиғини яхширақ билиш үчүн бәзидә шу өтүнүш билән чәклинип қалмаслиғимиз керәк. Жуқурида тилға елинған той қилмиған қериндашниң мисалини көрүп бақайли. У Йәһвадин Падишалиқ вәз ейтқучилири үчүн мәктәптә оқуш һәққидә давамлиқ дуа қилиду. У вәз ейтқучилар муһтаҗ йәрләрдә хизмәт қилишни халиғанлиқтин, шу мәктәптә оқуш арзуси бар. Шуңа, у давамлиқ мәктәп тоғрилиқ, һәмдә Йәһваға көпирәк хизмәт қилишниң башқа йоллири тоғрилиқму дуа қилса болиду (Әлч. 16:9, 10). Кейин у дуасиға мас һәрикәт қилип, районға җавапкар ақсақалдин йеқин әтрапидики қайси җамаәтләр пионерларға муһтаҗ екәнлигини сориса болиду яки Бәйтәлгә хәт йезип, қәйәрдә вәз ейтқучилар керәк екәнлигини соралайдуe.

16. Немигә ишәнчлик болалаймиз?

¹⁶ Бу мақалидә үгинип өткинимиздәк, Йәһва Худа дуалиримизға көйүмчанлиқ вә адиллиқ билән җавап бериду (Зәб. 4:3; Йәшая 30:18). Бәзидә биз ойлиғандәк җавапқа еришмәслигимиз мүмкин, бирақ Йәһва дуалиримизға бепәрвалиқ қилмайду. У бизни интайин яхши көриду вә бизни һәргизму ташлимайду (Зәб. 9:10). Шуңлашқа, давамлиқ Худаға ишәнч қилип, Униңға дуада ич бағриңизни төкүп бериң (Зәб. 62:8).