Ухлап қалған бала

АБЛА! Бу йәрдә немә иш йүз бәргәнду? Йәрдә ятқан у бала бәк еғир зәхмиләнгән охшимамду? Қараңа! Өйдин чиқиватқан кишиләрниң арисидики бири Павлус екән! Көрдиңизму, Тимотийму бар екән? У бала деризидин чүшүп кәткәндәк қиламду, немә?

Шундақ, бу иш техи һазирла йүз бәргән еди. Троас шәһиридә, Павлус шагиртларға нутуқ сөзләп тәлим бериватқан еди. У узунғичә уларни қайта көрәлмәйдиғанлиғини биләтти. Чүнки, у әтиси кемә билән сәпәр қилмақчи еди. Шуңа, у көпчиликкә йерим кечигичә сөзлиди.

Әфтикус исимлиқ бу бала деризидә олтарған еди, кейин ухлап қалди. У деризиниң сиртиға жиқилип, үчинчи қәвәттин йәргә чүшти! Шуңа, көпчиликниң немә үчүн бәкму әнсиригәндәк көрүнгәнлигини биләләйсиз. Улар балини көтирип қариса, дәл улар әнсиригәндәк, у өлгән еди!

Павлус балиниң өлгәнлигини көргәндә, өзини униң үстигә ташлап, уни қучақлиди. Андин у: “Әнсиримәңлар, униңға һеч иш болмиди!”, деди. Дегәндәк, у һаят! Бу бир мөҗүзә! Павлус уни тирилдүргән еди! Көпчилик һәммиси хошал-хорамлиққа чөмүшти.

Улар һәммиси қайта үстүнки қәвәткә чиқип, тамақ йейишти. Павлус таң атқичә сөзини давамлаштурди. Бирақ, ишинимизки, бу қетим Әфтикус чоқум ухлап қалмиған! Андин кейин, Павлус, Тимотий вә башқа биргә сәпәр қилғучилар кемигә чиқти. Уларниң қәйәргә бармақчи болғанлиғини биләмсиз?

Павлус әндила үчинчи қетимлиқ хуш хәвәр йәткүзүш сәпирини аяқлаштурған болуп, һазир өйигә қарап маңди. Павлус бу қетимлиқ сәпиридә Әфәс шәһиридә үч жил турған еди. Шуңа, униң бу қетимқи сәпири алдинқи икки сәпиридин узунирақ болди.

Троастин айрилғандин кейин, кемә Милет шәһиридә бир аз вақит тохтиди. Әфәс бу йәрдин бир нәччә чақирим жирақлиқта болғачқа, Павлус адәм әвәтип, Әфәстики етиқатчилар җамаәтчилигиниң ақсақаллирини Милеткә чақирди. Шуниң билән, у әң ахирқи қетим улар билән параңлишалиди. Кейин, Павлус кемигә олтарғанда, улар Павлусниң маңғинини көрүп, көңли бәк йерим болди!

Кемә ахири Қәйсәрийәгә йетип кәлди. Павлус у йәрдә шагирт Филипниң өйидә турғанда, Агабус пәйғәмбәр Павлусни агаһландуруп, Павлус Йерусалимға барғандин кейин, зинданға ташлинидиғанлиғини ейтти. Дәрвәқә, шундақ иш йүз бәрди. Шуниң билән, Павлус Қәйсәрийәдә икки жил зинданда ятқандин кейин, Рим һөкүмрани Қәйсәрниң сот қилиши үчүн Римға әвәтилди. Ундақта, Римға бериш сәпиридә немә ишлар йүз бәргәнлигини көрүп бақайли.