«Һаятимиз вә хизмитимиз. Иш дәптири» үчүн мәлумат мәнбәлири
3—9 май
ХУДА СӨЗИДИКИ ҒӘЗНӘ | САНЛАР 27—29
Йәһвадин үлгә елип, һәммә адәмләргә тәң қараң
w13 15/6 10-б., 14-абз.
Йәһваниң есил пәзиләтлирини қәдирләң
14 Салпадниң қизлири Муса пәйғәмбәргә келип, мундақ дәп сориди: «Немә үчүн дадимизниң исми қәбилисидин йоқилиду, оғли йоқ үчүнму? Бизгә атимизниң қериндашлири арисидин йәр беришиңларни өтүнимиз». Муса уларға: «Қанунни бузушқа болмайду» дәп ейтқанму? Яқ, Муса бу мәсилини Йәһваға ейтип бәрди (Сан. 27:1—5). Йәһва Худа буниңға немә дәп җавап бәрди? У Мусаға: «Тоғра дәйду Салпадниң қизлири. Уларға дадисиниң ака-инилири арисида атисиниң йерини бөлүп бәргин»,— деди. Йәһва униңдинму көп нәрсә қилди. У: «Әгәр бирси оғул тапмай өлүп кәтсә, униң йерини қизиға бериңлар»,— дәп буйриди (Сан. 27:6—8; Йәшуа 17:1—6). Шу вақиттин тартип, қийин әһвалға дуч кәлгән һәммә исраиллиқ аялларниң һоқуқлири һимайә қилинди.
w13 15/6 11-б., 15-абз.
Йәһваниң есил пәзиләтлирини қәдирләң
15 Бу қарар Йәһваниң бәк меһрибан вә үз-хәтирә қилмайдиғанлиғини көрситиду. Йәһва ярдәмгә муһтаҗ болған шу аялларниң қәдир-қиммитини һөрмәтләп, уларға тәң қариған (Зәб. 68:5). Муқәддәс китапта йезилған көплигән вақиәләрниң арисидики мошу бир вақиәдин Йәһва һәммә хизмәтчилиригә тәң қарап, үз-хәтирә қилмайдиғанлиғини көрүмиз (Сам. 1-яз. 16:1—13; Әлч. 10:30—35, 44—48).
w13 15/6 11-б., 16-абз.
Йәһваниң есил пәзиләтлирини қәдирләң
16 Йәһва Худадин үлгә елип, бизму үз-хәтирә қилмаслиғимиз керәк. Бу хисләтниң икки қири бар. Әгәр биз оюмизда һәммә адәмләргә тәң қарисақ, уларға әмәлийәттиму үз-хәтирә қилмаймиз. Әлвәттә, өзүмизни үз-хәтирә қилмайдиған киши дәп ойлишимиз мүмкин. Адәмләргә үз-хәтирә қилмай, тоғра көзқараш сақлаш асан әмәс. Адәмләргә алилимай қараватқанлиғимизни қандақ ениқлашқа болиду? Әйса адәмләрниң у тоғрилиқ немә ойлайдиғанлиғини билишни халап, садиқ достлиридин: «Кишиләр инсан Оғлини ким дәп тонуйдикән?»— дәп сориди (Мәт. 16:13, 14). Биз Әйсадин үлгә алсақ болиду. Сиз ишәнчлик достлириңиздин адәмләргә қандақ қарайдиғанлиғиңиз тоғрилиқ сорисиңиз болиду. Әгәр улар сизниң адәмниң миллитигә, бай-гадайлиғиға, келип чиқишиға қарап, үз-хәтирә қилидиғанлиғиңизни байқиса, немә қилсиңиз болиду? Өзүңизниң һис-туйғулириңиз тоғрилиқ Йәһва Худаға дуа қилип, көзқаришиңизни өзгәртишкә ялвуруп ярдәм сораң (Мәт. 7:7; Кол. 3:10, 11).
Роһий гөһәрләрни издәйли
it «Қурбанлиқлар»
Қурбанлиқлар
Ичимлик қурбанлиғи. Исраиллар болупму Вәдә қилинған зәмингә маканлашқандин кейин, ичимлик қурбанлиғи билән биргә башқа көплигән қурбанлиқларни кәлтүргән (Сн 15:2, 5, 8—10). Бу ичимлик қурбанлиғи яки шарап (спиртлик ичимлик) қурбангаһниң үстигә чачатти (Сн 28:7, 14; Чқ 30:9; селиштуруң Сн 15:10). Әлчи Паул филипиядики етиқатдашларға: «Әгәр мән силәргә, етиқат әкәлгән хәлиқ хизмити үчүн қурбанлиққа қуюлуватқан ичимлик һәдийәсидәк [қурбанлиғидәк] төкүлүватсамму, силәр билән биллә хошал болуп шатлиниватимән»,— дәп язған. У ичимлик қурбанлиғини мисал кәлтүрүп, етиқатдашлири үчүн пүтүн вуҗиди билән өз җенини беришкә тәйяр екәнлигини көрсәткән (Фп 2:17). Паул өз өлүмигә аз қалғанда, Тимотийға: «Мән болсам, ичимлик һәдийәсидәк [қурбанлиғидәк] төкүлүватимән вә мениң азатлиниш вақтим йеқинлашти»,— дәп язған (Т2х 4:6).
10—16 май
ХУДА СӨЗИДИКИ ҒӘЗНӘ | САНЛАР 30, 31
«Қәсәмлириңизни орунлаң»
it «Қәсәм»
Қәсәм
Җәзмән орунлаш керәк, бирақ өз ихтияри билән қилинидиған қәсәм. Қәсәмни адәттә өз ихтияри билән берәтти. Бирақ Худаниң қануниға мас, қәсәм қилған киши, уни җәзмән орунлиши керәк болған. «Өз җениға мәҗбурийәт елиш» дегән ибарә кишиниң һаяти бәргән вәдисини орунлашниң капалити болғанлиғини билдүргән (Сн 30:2; шундақла Рм 1:31, 32 қараң). Адәмниң һаяти буниңға бағлиқ болғанлиқтин, Муқәддәс китапта йезилғандәк, қәсәм берип, вәзипиләрни өз бойниға елиштин авал, пухта ойлиниш керәк. Тәврат қанунида мундақ дейилгән: «Әгәр Худайиң Йәһваға вәдә бәрсәң, уни кечиктүрмәй орунлиғин, чүнки Худайиң Йәһва уни сениңдин сорайду һәм сениңда гуна болиду. Әгәр сән вәдә қилмиған болсаң, сениңда гуна болмайду» (Қ.ш 23:21, 22).
it «Қәсәм»
Қәсәм
Худаниң алдида бирнемә қилишқа, һәдийә яки қурбанлиқ елип келишкә, алаһидә хизмәтни башлашқа яки қанунға қарши әмәс қандақту бир ишни қилиштин баш тартишқа тәнтәнилик вәдә бериш. Киши вәдини өз ихтияри билән бәргән. Бу тәнтәнилик вәдә болғанлиқтин, қәсәмгә охшаш зор күчкә егә болған. Бәзидә Муқәддәс китапта бу икки сөз биллә ишлитилиду (Сн 30:2; Мт 5:33). Киши вәдә бәргәндә, нийитини ашкарә қилиду. Қәсәм болса, бәргән вәдини чоқум орунлайдиғанлиғини вә сөзлириниң растлиғини көрситидиған жуқури һоқуққа егә бирсигә қилинған мураҗиәт қилиду. Келишим түзгәндә пат-пат қәсәм ичәтти (Яр 26:28; 31:44, 53).
w04 1/8 27-б., 3-абз.
Санлар китавидики пайдилиқ ой-пикирләр
30:6—8: Худа хизмәтчиси аялиниң қәсимини әмәлдин қалдураламду? Бүгүнки күндә Йәһва Худаниң һәрбир хизмәтчиси бәргән қәсими үчүн өзи җавап бериду. Мәсилән, Худаға беғишлиниш — шәхсий вәдә (Галатилиқларға 6:5). Аялиниң бу вәдисини йолдишиниң йоққа чиқириш һоқуқи йоқ. Аяли болса, Худаниң қануниға қарши яки йолдишиниң алдида қилиши керәк вәзипилиригә қарши вәдә қилмаслиғи керәк.
Роһий гөһәрләрни издәйли
it «Йиптаһ»
Йиптаһ
Қедимда Муқәддәс чедирда алаһидә хизмәт атқуруш үчүн адәмләрни беғишлашқа болатти. Ата-аниларниң балилирини хизмәт қилишқа әвәтиш һоқуқлири болған. Мәсилән, Самуилниң аписи Һанна биләнму шундақ болған. Һанна балисини Муқәддәс чедирда алаһидә хизмәт қилиш үчүн беришни вәдә қилған. Униң йолдиши Әлқана буни мақул көрди. Бовақ әмчәктин чиқирилғанда, аписи уни Муқәддәс чедирға әкәлди. Шундақла у Йәһваға қурбанлиққа мални бәрди (С1я 1:11, 22—28; 2:11). Худаға назир сүпитидә хизмәт қилишқа беғишланған йәнә бир бала — Шимшон болған (Һк 13:2—5, 11—14; дадисиниң қизи үстидин һоқуқи тоғрилиқ Сн 30:3—5, 16дин оқуп селиштуруң).
17—23 май
ХУДА СӨЗИДИКИ ҒӘЗНӘ | САНЛАР 32, 33
«Бу йәрниң барлиқ турғунлирини қоғлап чиқиңлар»
w10 1/8 23-б.
Сиз биләмсиз?
Ибраний Язмиларда тилға елинған «егизликләр» дегән немә?
Вәдә қилинған зиминға кириштин авал, Йәһва Худа исраилларға шу йәрдә яшиған қананлиқларниң ибадәт йәрлирини йоқ қилишни буйриди. «Бу йәрниң барлиқ турғунлирини қоғлап чиқип, уларниң барлиқ тәсвирлирини вә қуюлған бутлирини йоқ қилиңлар, вә уларниң егизликлирини вәйран қилиңлар» (Санлар 33:52). Бу егизликләрдә сахта илаһларға сәҗдә қилған. Уларни һәрқандақ егиз дөңдә яки һәрқандақ йоған дәрәқниң астиға қойятти (Падишалар 1-язма 14:23; Падишалар 2-язма 17:29; Әзәкиял 6:3). У йәрдә қурбанлиқлар, муқәддәс түврүкләр, бутлар, хушпурақлиқ исриқлар вә башқиму диний затлар болған болуши мүмкин.
w08 15/2 27-б., 5, 6-абз.
Исраилларниң хаталиқлиридин савақ елиң
Бизму исраиллар дуч кәлгән вәзийәтләргә охшаш әһвалда болумиз. Бүгүнки күндә көп илаһлар бар. Мәсилән, пул, мошу дуниядики атақлиқ адәмләр, спорт юлтузлири, сәясий партияләр, диний рәһбәрләр вә һәтта аилә әзалири. Буниң һәммиси һаятимизда биринчи орунда болуп қелиши мүмкин. Шундақла, Худани яхши көрмәйдиған кишиләр билән дост болсақ, Йәһва билән мунасивитимиз бузулиду.
Әхлақсиз җинсий мунасивәт Баалға ибадәт қилишниң бир қисми болған. Бу ибадәт көп исраилларни езиқтуруп, тузаққа чүшәрди. Бүгүнки күндә Худаниң бәзи хизмәтчилири бу тузаққа чүшүватиду. Өйдә компьютерниң алдида олтирип, пәхәс болмиған кишигә шундақ тузаққа чүшүш бәк асан. Худаниң хизмәтчиси интернетқа кирип, порнографияниң тузиғиға чүшүп қалса, бәк ечинарлиқ болатти!
it «Қанан»
Қанан
Йәшуа қананлиқларни һалак қилишқа бағлиқ Йәһва Худа Мусаға буйриған барлиқ әмирләрни орунлап, дана һәрикәт қилған (Йшу 11:15). Бирақ исраиллар Йәшуадин үлгә алмай, шу йәрдики рәзилликни түп йилтизи билән йоқ қилмиди. Қананлиқлар Исраил хәлқиниң арисида яшиған вә уларға яман тәсир қилған. Нәтиҗидә, җинайәт, әхлақсизлиқ вә бутпәрәслик көпийип, нурғун исраиллар һаятидин айрилған. Улар Худани тиңшап, һәммә қананлиқларни өлтүргән болса, шунчилик ечинарлиқ әһвалға чүшмәтти (Сн 33:55, 56; Һк 2:1—3, 11—23; Зб 106:34—43). Йәһва Худа исраилларни адаләтлик билән һәммисигә тәң һөкүм чиқиридиғанлиғини агаһландурған. Шу сәвәптин, әгәр исраиллар қананлиқлар билән нека қурған, келишим түзгән, уларниң дини вә диний урп-адәтлирини үгәнгән болса вә напак ишлирини қилған болса, қананлиқларға охшаш һаятидин айрилатти (Чқ 23:32, 33; 34:12—17; Лв 18:26—30; Қ.ш 7:2—5, 25, 26).
Роһий гөһәрләрни издәйли
it «Чегара»
Чегара
Чәк ташлиғандин кейин, қәбилиниң мираслиқ зимини қәйәрдә болидиғанлиғи ениқланғанда, қәбилидики адәмләрниң саниға қарап, зимининиң көлими бәлгүләнгән. «Уларниң йерини чәк ташлап, қәбилилириңларға бөлүп бериңлар: ким көпсанлиқ болса, уларға йоғанирақ мирасни бериңлар, ким азсанлиқ болса, уларға кичигирәк йәрни бериңлар. Кимгә қәйәрдә чәк чиқса, шу йәрдә униң мираси болиду. Ата-бовиларниң қәбилилиригә йәрни бөлүп бериңлар» (Сн 33:54). Гәрчә чәк ташланғанда һәрбир қәбилиниң мираси қәйәрдә болидиғанлиғини өзгәртишкә болмиған болсиму, мираслиқ зимининиң көлимини өзгәртишкә болған. Мәсилән, Йәһуда қәбилисиниң зимини бәк чоң болғини ениқланғанда, буни өзгәртип, мираслиқ зимининиң бәзи қисимлири Шимон қәбилисигә берилгән (Йшу 19:9).
24—30 май
ХУДА СӨЗИДИКИ ҒӘЗНӘ | САНЛАР 34—36
«Йәһва Худани пана қилиң»
w17.11 9-б., 4-абз.
Сиз Йәһвадин пана издәмсиз?
4 Амма исраиллиқ бир кишини байқимай өлтүрүп қойсичу? Бу тәсадипий әһвал болсиму, у әйипсиз адәмниң қенини төккәнлиги үчүн җавапқа тартилған (Яр. 9:5). Бирақ Йәһва мундақ вәзийәттә униңға рәһим көрситишкә болидиғанлиғини ейтқан. Байқимай киши өлтүрүп қойған адәм интиқам алғучидин қечип, алтә панаһгаһ шәһириниң биригә баралиған. Шу шәһәрдә турушқа рухсәт алғандин кейин, у хәвпсизликтә болған. Лекин у шу йәрдә алий роһанийниң өлүмигичә яшиши керәк еди (Сан. 35:15, 28).
w17.11 9-б., 6-абз.
Сиз Йәһвадин пана издәмсиз?
6 Исраиллиқларниң бири байқимай киши өлтүрүп қойса, панаһгаһ шәһиригә қечип, шәһәр дәрвазисиниң алдидики ақсақалларға «өз әһвалини» ейтип бериши лазим болған. Ақсақаллар уни иллиқ чирай билән қарши елиши керәк еди (Йәшуа 20:4). Кейинирәк улар шу кишини қатиллиқ йүз бәргән шәһәрниң ақсақаллириға әвәтип, улар униң ишини қараштурған (Санлар 35:24, 25ни оқуң). Әгәр бу ақсақаллар қатиллиқ һәқиқәтән тәсадипий болди дәп қарар қилса, һелиқи кишини панаһгаһ шәһиригә қайтурған.
w17.11 11-б., 13-абз.
Сиз Йәһвадин пана издәмсиз?
13 Қачқун панаһгаһ шәһиридин чиқмиса, хәвпсизликтә болатти. Йәһва шу шәһәрләр һәққидә: «Бу шәһәрләр... силәргә... панаһгаһ болиду»,— дәп ейтқан (Йәшуа 20:2, 3). Йәһва қачқунниң қайтидин сотлинишини тәләп қилмиған. Шуниң билән, қачқунни өлтүрмәслиги үчүн, қан интиқамини алғучиға панаһгаһ шәһиригә кириш мәнъий қилинған. Қачқун шу шәһәрдә турған һалда, Йәһваниң һимайиси астида болған. У түрмидә болмиған. Униң ишләш, башқиларға ярдәм бериш вә Йәһваға тинчлиқта ибадәт қилиш мүмкинчилиги болған. Һә, у бәхит-саадәтлик һаят кәчүрәлигән!
Роһий гөһәрләрни издәйли
w91 15/2 13-б., 13-абз.
Һәммә адәмләр үчүн мувапиқ төләм
13 Адәм ата билән Һава ана төләмниң пайдисини көрмәйду. Тәврат қанунида мундақ принцип йезилған: «Өлүмгә мәһкүм қилинған қатилниң җени үчүн төләм алмаңлар, у чоқум өлтүрүлиши лазим» (Санлар 35:31). «Адәм ата әмәс, бәлки аял киши пүтүнләй ялғанчилиққа берилип, қилмиш қилди» (Тимотийға 1-хәт 2:14). У өзиниң әвладини өлтүргәндәк болди, чүнки уларға өлүмгә елип келидиған намукәммәлликни мирасқа қалдурди. Адәм ата өлүмгә лайиқ болған, чүнки мукәммәл адәм болуп Худаниң қануниға бойсунмаслиқни әтәй қарар қилди. Әгәр төләмниң пайдиси Адәм атиғиму тәгсә, бу Йәһваниң адаләтлик принциплириға зит болатти. Адәм атиниң гунаси үчүн төләм берилгәнликтин, униң әвлатлириға чиқирилған һөкүм күчини йоқитиду (Римлиқларға 5:16). Демәк, гунаниң һалак қилидиған күчи мәнбәсидин жулуп ташланди. Әйса һәммә адәмләр үчүн өлүп, Адәм атиниң әвлатлириниң гунасини өзигә алди (Ибранийларға 2:9; Коринтлиқларға 2-хәт 5:21; Петрусниң 1-хети 2:24).
31-май — 6-июнь
ХУДА СӨЗИДИКИ ҒӘЗНӘ | ҚАНУН ШӘРҺИ 1, 2
«Һөкүм қилиш һоқуқи Йәһва Худаға мәнсүп»
w96 15/3 23-б., 1-абз.
Йәһва һәрдайим адил һәрикәт қилиду
Ақсақалларға җамаәттә еғир гуна қилинғанда сотлаш вәзиписи жүкләнгән (Коринтлиқларға 1-хәт 5:12, 13). Шундақ вәзийәтләрдә улар Худаниң адаләтлиги рәһим-шәпқәтлик екәнлигини унтумаслиғи керәк. Әгәр рәһимдиллиқ көрситишкә асас болмиса, мәсилән, гуна қилған қериндаш товва қилмиса, уни җамаәттин чиқириду. Бирақ ақсақаллар буни өч елиш үчүн қилмайду. Әксичә, улар бу чарә гунакарни товва қилишқа үндәйду дәп үмүт қилиду (Әзәкиял 18:23ни селиштуруң). Мәсиһниң рәһбәрлиги астида ақсақаллар адил һөкүм чиқирип, етиқатдашлар үчүн «борандин далдилинидиған паналиқ җай» болиду (Йәшая 32:1, 2). Шу сәвәптин, улар үз-хәтирә қилмай, даналиқ билән һәрикәт қилиши лазим (Қанун шәрһи 1:16, 17).
w02 1/8 9-б., 4-абз.
Худаниң Һөкүмранлиғиға садиқ болуң
4 Сотчилардин пәқәт Қанунни билиш тәләп қилинмиған. Улар намукәммәл болғанлиқтин, адил һөкүм чиқиришқа тосалғулуқ қилидиған иккиүзлүк, ачкөзлүк, шәхсийәтчиликтәк илләтләрдин нери болуши керәк еди. Муса пәйғәмбәр уларға: «Сотлиғанда үз айримаңлар [үз-хәтирә қилмаңлар], әрзимәсниму бүйүкни тиңшиғандәк тиңшаңлар, инсан үзидин зади қорқмаңлар, чүнки бу Худаниң сотидур»,— дегән. Немә дегән чоң җавапкарлиқ дәңа! (Қанун шәрһи 1:16, 17)
Роһий гөһәрләрни издәйли
w13 15/9 9-б., 9-абз.
Йәһва Худаниң қанунлири ишәнчиликтур
9 Исраиллар чөл-баяванда 40-жил маңғанда, Йәһва Худа уларни қандақ йетәкләйдиғанлиғини, қандақ һимайә қилип ғәмхорлуқ қилидиғанлиғини алдин-ала тәпсилий ейтмиған. Шундақ болсиму, Йәһва хәлқигә Униңға ишинишкә болидиғанлиғини көрсәткән. Мәсилән, Йәһва хәлқини күндизи булут, кечиси от түвриги арқилиқ йетәкләп, қоллап-қувәтлигәнлигини көрсәтти (Қ. шәр. 1:19; Чиқ. 40:36—38). Шундақла, Йәһва исраилларниң асасий еһтияҗлирини қанаәтләндүргән. Һәтта уларниң «кийим-кечәклири упримиди вә путлириму ишшимиди». Улар растинла һечнемигә муһтаҗ болмиған (Нәһ. 9:19—21).
7—13 июнь
ХУДА СӨЗИДИКИ ҒӘЗНӘ | ҚАНУН ШӘРҺИ 3, 4
«Йәһваниң қанунлири дана вә адаләтликтур»
it «Чүшиниш»
Чүшиниш
Худа Сөзини пухта тәтқиқ қилидиған киши яшанғанлар билән устазлардинму чоңқурирақ чүшинишкә егә болалайду (Зб 119:99, 100, 130; Лқ 2:46, 47ни селиштуруң). Сәвәви Худаниң һәммә әмирлири вә пәрманлири даналиқтур. Исраил хәлқи уларни орунлиған болса, хошна хәлиқләрниң көз алдида чүшиниши мол вә даналиққа еришкән хәлиқ дәп тонулатти (Қ.ш 4:5—8; Зб 111:7, 8, 10; П1я 2:3ни селиштуруң). Чүшинишкә егә болған киши Худа Сөзиниң өзгәрмәйдиғанлиғини билиду вә Униң қанунлири бойичә яшашни халап, Худадин ярдәм сорайду (Зб 119:169). У Худа Сөзиниң униң жүригидә чоңқур йилтиз тартишиға йол қойиду (Мт 13:19—23), қәлбиниң чоңқур қатламлирида сақлайду (П.н 3:3—6; 7:1—4) вә «сахта йолларни» өч көриду (Зб 119:104). Худаниң Оғли Әйса йәрдә яшиғанда, шундақ чүшәнчигә егә болған. У һәтта өлүм түвригидә өлүшкә келишкән, чүнки Язмилардики пәйғәмбәрлик сөзләр әмәлгә ешиши үчүн шундақ өлүши керәклигини билгән еди (Мт 26:51—54).
w99 1/11 20-б., 6, 7-абз.
Мәрт болуң
Көргән вә аңлиған нәрсиләрниң һәммисигә һәйран қелип, падиша аял мундақ деди: «Сизниң адәмлириңиз нәқәдәр бәхитликтур, сизниң алдиңизда туруп, даналиғиңизни аңлаватқан қуллириңиз нәқәдәр бәһримәндур!» (Падишалар 1-язма 10:4—8). У Сулайманниң хизмәтчилирини бай болуп, яхши шараитларда яшиғанлиғи үчүн әмәс, Худаниң дана сөзлирини һәр күни аңлашқа мүмкинчилиги барлиғи үчүн бәһримән яки бәхитлик дәп атиған. Бүгүнки күндә Яратқучимиз Йәһвадин вә Униң Оғли Әйса Мәсиһтин дана сөзләрни үгинидиған Худа хизмәтчилири үчүн Саба аял падишаси яхши үлгә болмақта.
Саба аял падишаси Сулайман падишаға ейтқан мону сөзлири диққәткә сазавәр: «Худайиңиз Йәһва мәдһийиләнсун!» (Пад. 1-яз. 10:9). Ениқки, у Сулайманниң даналиғи вә гүлләп-яшнишидин Йәһва Худаниң қолини көргән. Бу Худаниң Исраилға илгири бәргән вәдисигә мас болған. «Шундақ қилип, уларни сақлап орунлаңлар, чүнки мошуниңда хәлиқләрниң көзидә силәрниң даналиғиңлар вә әқлиңлар көрүниду. Улар барлиқ мошу тохтамларни аңлап: “Пәқәт мошу бүйүк хәлиқ данишмән һәм әқиллиқ хәлиқ екән!”— дәйду» (Қанун шәрһи 4:5—7).
w07 1/8 29-б., 13-абз.
Сиз Худаниң алдида байму?
13 Йәһва Худа хәлқини бәрикәтлигәндә, уларға әң яхшисини бериду (Яқуп 1:17). Мәсилән, Исраил хәлқигә «сүт билән һәсәл ақидиған йәрни» бәргән. Гәрчә Мисир зиминиму наһайити чирайлиқ йәр болған болсиму, Йәһва Худа Исраил хәлқигә бәргән Вәдә қилинған зиминниң униңдин муһим бир пәрқи болған. «Бу йәр һәққидә Йәһва Худаниң Өзи ғәмхорлуқ қилған». Башқичә ейтқанда, исраиллар Йәһва уларға ғәмхорлуқ қилғанлиғи үчүн гүлләп-яшниши керәк еди. Улар Йәһва Худаға садиқ болған чағда, бәрикәткә еришкән вә хошна хәлиқләргә қариғанда нәқәдәр яхши һаят кәчүргән. Растинла, «байлиқ кәлтүрәр Пәрвәрдигарниң бәрикити» (Санлар 16:13; Қанун шәрһи 4:5—8; 11:8—15).
Роһий гөһәрләрни издәйли
w04 15/9 25-б., 3-абз.
Қанун шәрһи китавидики пайдилиқ ой-пикирләр
4:15—20, 23, 24: Бутни ясимаңлар дегән қанун бирсиниң сүритини селишқа яки һәйкәл ясашқа болмайдиғанлиғини билдүрәмду? Яқ. Бу қанун сәҗдә қилиш үчүн һәйкәл ясашқа яки сүрәтләр селишқа болмайдиғанлиғини билдүриду. Муқәддәс китап сәнъәт үчүн сүрәт селишни яки һәйкәл ясашни мәнъий қилмайду (Падишалар 1-язма 7:18, 25).
14—20 июнь
ХУДА СӨЗИДИКИ ҒӘЗНӘ | ҚАНУН ШӘРҺИ 5, 6
«Балиңизға Йәһва Худани сөйүшни үгитиң»
w05 15/6 20-б., 11-абз.
Ата-анилар, аиләңларға ғәмхорлуқ қилиңлар
11 Ата-анилар балилириға Худани сөйүшни қандақ үгитәләйду? Бу тоғрилиқ Қанун шәрһи 6:5—7 айәтләрдин биләләймиз. Муқәддәс китапни ечип, бу айәтләрни оқуп беқиң. Бу йәрдә йезилғандәк, ата-анилар биринчи новәттә өзлири Йәһва Худаға болған меһир-муһәббәтни риваҗландуруши керәк вә Униң билән йеқин мунасивәттә болуп, пүтүн қәлби билән Худаниң сөзини қобул қилиши керәк. Йәһваниң принциплирини вә қанунлирини чүшинип, уларни сөйүш үчүн Муқәддәс китапни пухта тәтқиқ қилип, оқуғанлириңиз тоғрилиқ чоңқур ойлиниш муһим. Шу чағда қәлбиңизниң қатламлирида Муқәддәс китаптики әҗайип һәқиқәтләр орун елип, хошаллиққа чөмүсиз вә Йәһваға болған меһир-муһәббитиңиз техиму өсиду. Шу чағда балилириңизниң жүригигә һәқиқәтни сиңдүрәләйсиз (Луқа 6:45).
w07 15/5 15, 16-б.
Балилиримға керәклик тәлим елишқа қандақ ярдәм берәләймән?
Сизниң арман-арзуйиңиз, мәхсәтлириңиз, халиған нәрсилириңиз, немини қәдирләйдиғанлиғиңиз пәқәт сөзлириңиздин әмәс, ишлириңиздинму көрүнүп туриду (Римлиқларға 2:21, 22). Балилар кичигидин ата-анисини дорап, улардин үгиниду. Улар ата-аниси үчүн неминиң муһим екәнлигини көриду вә адәттә балилар үчүнму бу нәрсиләр муһим болуп кетиду. Сиз Йәһва Худани һәқиқәтән яхши көрсиңиз, балилириңиз буни байқайду. Мәсилән, Муқәддәс китапни оқуш вә үгиниш сиз үчүн муһим вә Падишалиқ ишлири һаятиңизда биринчи орунда екәнлигини чүшиниду (Мәтта 6:33). Шундақла, сизниң җамаәт учришишлириға дайим берип турушиңиз һәм вәз ишиға паал қатнишиватқанлиғиңиз Йәһваға хизмәт қилиш сиз үчүн әһмийәтлик екәнлигиниң бәлгүси болиду (Мәтта 28:19, 20; Ибранийларға 10:24, 25).
w05 15/6 21-б., 14-абз.
Ата-анилар, аиләңларға ғәмхорлуқ қилиңлар
14 Қанун шәрһи 6:7дә йезилғандәк, ата-аниларда балилири билән Худа тоғрилиқ сөзлишишкә көп пурсәт бар. Йолда маңғанда, өйниң ишлирини қилғанда, дәм алғанда, балиларни Худа тоғрилиқ үгитишкә мүмкинчилик тепишқа болиду. Әлвәттә, балиларға Муқәддәс китаптики һәқиқәтләр тоғрилиқ тохтимай «әқил үгитишниң» һаҗити йоқ. Әксичә, аилидики сөһбәтләр илһам беридиған болуши керәк. Мәсилән, «Ойғиниш!» журналида һәр түрлүк мавзулар тоғрилиқ мақалиләр бар. Мошу мавзуларға асаслинип, һәрхил нәрсиләр тоғрилиқ параңлишишқа болиду. Мәсилән, Йәһва Худа яратқан һайванатлар, тәбиәттә учрайдиған чирайлиқ йәрләр вә һәрхил милләтләрниң мәдәнийити. Шундақ сөһбәтләр яшларни «садиқ қул» бериватқан әдәбиятларни оқушқа дәвәт қилиши мүмкин (Мәтта 24:45—47).
Роһий гөһәрләрни издәйли
w19.02 22-б., 11-абз.
Тәврат қанунидики адаләт билән меһир-муһәббәт
11 Биз үчүн савақ: Йәһва адәмниң тешиға бақмай, ичигә бақиду (Сам. 1-яз. 16:7). Һечқандақ ой, һис-туйғу яки иш-һәрикәт Униңдин йошурун қалмайду. Йәһва бизгә нәзәр селип, яхши пәзиләтлиримизни көриду вә уларни риваҗландурушимизни халайду. Бирақ У хата арзу-һәвәсләр бизни гунаға йетәкләштин авал бизниң уларни байқап, тизгинлишимизни халайду (Тар. 2-яз. 16:9; Мәт. 5:27—30).
21—27 июнь
ХУДА СӨЗИДИКИ ҒӘЗНӘ | ҚАНУН ШӘРҺИ 7, 8
«Қизиңни униң оғлиға бәрмә вә униң қизини оғлуңға алма»
w12 1/7 29-б., 2-абз.
Немә үчүн Худа Өз хизмәтчилиридин пәқәт етиқатдашлар билән нека қурушни тәләп қилған?
Йәһва Худа билгәнки, Шәйтан исраилларни езиқтуруп, сахта илаһларға сәҗдә қилишқа дәвәт қилишни халиған. Шуңа Йәһва Өз хәлқини мундақ дәп агаһландурған: «Улар оғуллириңни башқа илаһларға хизмәт қилиши үчүн, Мениңдин үз өргүзиду». Бу агаһландурушқа қулақ селиш бәк муһим болған. Әгәр исраиллар сахта илаһларға ибадәт қилған болса, Йәһва уларға рази болматти вә уларни һимайә қилматти. Шундақ қилип, исраиллар дүшмәнлири үчүн оңай олҗа болатти. Амма бу хәлиқтин вәдә қилинған Мәсиһ чиқиши керәк еди. Шәйтанниң исраилларни езиқтуруп, Йәһва Худаға ибадәт қилмайдиған адәмләр билән нека қурушқа дәвәт қилишиниң сәвәви ениқ.
w15 15/3 30, 31-б.
«Һакимдарниң избасари билән турмушлуқ болуш» буйруғи күчидин қалдиму?
Йәһва Худа пәқәт етиқатдаш билән турмуш қурушни тәләп қилиду. Немә үчүн? У хизмәтчилириниң бәхитлик болуши үчүн немә керәклигини яхши билиду вә чиқарған натоғра қарарлири түпәйли азап чекишини халимайду. Шундақла Йәһва Худа бизниң бәхитлик болушимизни халайду. Нәһәмияниң вақтида исраиллар Йәһваға ибадәт қилмиған ят хәлиқтин чиққан аялларға өйләнгән. Нәһәмия уларға Сулайман падиша билән немә болғанлиғини есигә салди. Худа униңға меһир-муһәббәт көрсәтсиму, у «аялларниң аздуруши билән гуна өткүзгән» (Нәһ. 13:23—26). Шу сәвәптин, Йәһва Худа хизмәтчилириниң пайдиси үчүн етиқатдашлар билән нека қурушни тәләп қилиду (Зәб. 19:7—10; Йәшая 48:17, 18). Худаниң хизмәтчилири Йәһваниң меһир-муһәббити вә ғәмхорлуғи үчүн бәк миннәтдар һәм Униң мәслиһәтлиригә риайә қилиду (Пәнд н. 1:5).
w15 15/8 26-б., 12-абз.
Ахирқи күнләрдә достларни даналиқ билән таллаң
12 Болупму той қилмиған вә турмуш қилишни халиған қериндашлар достларни даналиқ билән таллиши керәк. Муқәддәс китапта мундақ дәп йезилған: «Етиқатсизлар билән тәң әмәс боюнтуруққа четилип қалмаңлар. Чүнки һәққанийлиқниң қанунсизлиқ билән қандақ алақиси болуши мүмкин? Яки йоруқлуқниң қараңғулуқ билән қандақ алақиси бар?» (Кор. 2-х. 6:14). Турмуш қурушни халиған қериндашлар пәқәт һаятини Худаға беғишлап, чөмдүрүлүштин өткән вә Муқәддәс китапқа мас һаят кәчүридиған қериндаш билән турмуш қуруши керәк (Кор. 1-х. 7:39). Бу мәслиһәткә қулақ салған қериндашлар Йәһваға садақәтмәнлигини сақлашқа ярдәм беридиған вападар өмүрлүк җүптиси болиду.
Роһий гөһәрләрни издәйли
w04 1/2 13-б., 4-абз.
Йәһва бизгә ғәмхорлуқ қилиду
4 Дуа қилғанда күндилик ненимизни бәргәй дегән илтимас роһий озуқни һәр күни қобул қилишимиз керәклигини есимизгә салиду. Әйса хелә вақит роза тутқандин кейин, қосуғи бәк ечип кәтсиму, Шәйтанниң ташларни нанға айландуруң дегән езиқтурушиға берилмиди. У Шәйтанға мундақ деди: «Муқәддәс Язмиларда: “Адәм пәқәт нан биләнла әмәс, бәлки Йәһваниң еғизидин чиққан һәрбир сөз билән яшиши керәк”,— дәп йезилған» (Мәтта 4:4). Әйса бу йәрдә Муса пәйғәмбәр исраилларға ейтқан сөзләрни нәқил кәлтүргән: «У сени мөмүнләштүрди, ачарчилиқ билән қийниди вә сени йә сән, йә әҗдатлириң билмигән манна билән озуқландурди. Униң сәвәви, адәм пәқәт нан биләнла әмәс, бәлки Йәһваниң еғизидин чиққан һәрбир сөз билән яшайду» (Қанун шәрһи 8:3). Йәһва исраилларға манна берип, озуқ билән тәминләп, муһим нәрсиләрни үгәткән. Мәсилән, улар «һәрқайси өзигә қанчә керәк болса, шунчини күндин-күнгә жиғиши» керәк еди. Улар көпирәк жиқса, униңда қурутлар пәйда болуп, у сесишқа башлатти (Чиқиш 16:4, 20). Амма алтинчи күни улар икки күнлүк озуқни жиғиши керәк еди вә у бузулматти (Чиқиш 16:5, 23, 24). Шундақ қилип, маннаға қарап, улар муһим савақ алатти. Улар Худаға қулақ селиши керәк еди вә уларниң һаяти пәқәт нанға әмәс, бәлки Йәһваниң еғизидин чиққан һәрбир сөзигә бағлиқ болған.
28-июнь — 4-июль
ХУДА СӨЗИДИКИ ҒӘЗНӘ | ҚАНУН ШӘРҺИ 9, 10
«Йәһва сиздин немә тәләп қилиду?»
w09 1/10 10-б., 3, 4-абз.
Йәһва сиздин немә тәләп қилиду?
Худаға чин жүрәктин бойсунушқа немә дәвәт қилиду? Муса пәйғәмбәр «Худайиң Йәһвадин қорққин» дегән (12 айәт). Бу җазадин қорқуш әмәс, Худа алдида чоңқур әйминиш вә Униң йоллирини тутушни билдүриду. Әгәр сиз Худадин әймәнсиңиз, Уни хапа қилмаслиққа бар күчиңизни чиқирисиз.
Бирақ биринчи новәттә Худаға бойсунушқа немә дәвәт қилиши керәк? Муса пәйғәмбәр мундақ дегән: «Уни сөйүшиңни вә Худайиң Йәһваға пүткүл жүригиң һәм пүткүл җан-дилиң билән хизмәт қилишиңни тәләп қилиду» (12-айәт). Худаға болған меһир-муһәббәтни билдүрүш үчүн һис-туйғуниң болғанлиғи йетәрлик әмәс. Бир китапта мундақ йезилған: «Һис-туйғуларни билдүридиған ибраний пеиллар бәзидә иш-һәрикәтни билдүриду». Худани яхши көридиғанлиғимизни иш-һәрикәт билән көрситишимиз керәк. Башқа сөзләр билән ейтқанда, Худани рази қилидиған ишларни қилсақ, униңға болған меһир-муһәббитимизни көрситимиз (Пәнд-нәсиһәтләр 27:11).
w09 1/10 10-б., 6-абз.
Йәһва сиздин немә тәләп қилиду?
Чин жүрәктин Йәһваға бойсунсақ, бәрикәткә еришимиз. Муса пәйғәмбәр Исраил хәлқигә Йәһваға немә үчүн бойсунуш керәклигини чүшәндүрүп, мундақ дегән: «Шу вақиттила саңа яхши болиду» (13-айәт). Раст, Йәһваниң һәммә қанунлири биз үчүн көп пайда әкелиду. Немә үчүн? «Худа Өзи меһир-муһәббәттур» (Йоһанниң 1-хети 4:8). Шу сәвәптин, У бизгә мәңгү пайда елип келидиған қанунларни бәргән (Йәшая 48:17). Һазирниң өзидә Йәһваниң тәләплирини орунлисақ, көп азаплардин қутулимиз, келәчәктә болса, Худа Падишалиғиниң һөкүмранлиғиниң астида бизни әҗайип һаят күтмәктә.
cl 16-б., 2-абз.
Биз Худа билән дост болалаймизму?
2 Қедимий заманда Ибраһим пәйғәмбәр Худа билән йеқин мунасивәттә болған. Йәһва Худа уни «достум» дәп атиған (Йәшая 41:8). Йәһва Худа Ибраһимни дости дәп һесаплиған. Ибраһим пәйғәмбәр Йәһваға ишәнгәнликтин, Униң билән йеқин мунасивәткә егә болди (Яқуп 2:23). Бүгүнки күндиму Йәһва Униңға чин жүрәктин хизмәт қиливатқанларни «қобул қилишқа» мүмкинчилик издәйду (Қанун шәрһи 10:15). Униң Сөзидә мундақ дәп йезилған: «Худаға йеқинлишиңлар һәм Уму силәргә йеқинлишиду» (Яқуп 4:8). Бу айәт бизни Худаға йеқинлишишқа чақириду вә Униңму бизгә йеқинлишиду дәп вәдә бериду.
Роһий гөһәрләрни издәйли
it «Енак»
Енак
Қанан зимининиң тағлиқ йәрлиридә, деңизға йеқин бәзи йәрләрдә вә болупму дөләтниң җәнубий тәрипидә яшайдиған узун бойлуқ адәмләр. Шу вақитта Һибронда Ахиман, Шешай вә Талмай дегән Енакниң оғуллири яшиған (Сн 13:22). 12 исраиллиқ пайлақчи Енакниң оғуллирини көргәндә, уларниң арисидики 10 пайлақчи шу йәр тоғрилиқ қорқунучлуқ нәрсиләрни ейтқан. Улар исраилларға Енакниң оғуллири Топан сүйидин бурун яшиған нефилимларға охшаш күчлүк вә исраиллар уларниң қешида «чекәткиләргә» охшайду дәп ейтқан (Сн 13:28—33; Қ.ш 1:28). Уларниң бойлири бәк егиз болғачқа, бәзидә уларни репайимлар вә емимлар билән селиштуратти. Улар интайин күчлүк болғанлиқтин, бәлким шундақ сөз-ибарә пәйда болғанду: «ким Анакийлар [Енакниң оғуллири] алдида туралисун!» (Қ.ш 2:10, 11, 20, 21; 9:1—3).