Зериккинимдә немә қилсам болиду?

Бәзилири үчүн ямғурлуқ күнләрдә һеч нәгә чиқмай, өйдә төрт тамға солинип олтириштин яман иш йоқ. Роберт исимлиқ бир жигит мундақ дәйду: «Бундақ пәйтләрдә немә қиларимни билмәй олтиримән».

Сиздиму шундақ күнләр болғанму? Шундақ болса, бу мақалә сизгә ярдәм берәләйду.

• Немиләрни билишиңиз керәк?

• Немиләрни қилсиңиз болиду?

• Тәңдашлириңизниң ой-пикри

Немиләрни билишиңиз керәк?

• Электронлуқ қурулмилардин пайдилиниш ярдәм бәрмәслиги мүмкин

  Торни кезип жүрүш вақтини өткүзүшкә ярдәм бериши мүмкин, лекин иҗаткарлиқ иқтидарини өстүрүш қабилийитини пәсәйтип, зерикиш туйғусини күчәйтиду. «Экранға тикилип қарап, башқа һеч нәрсини ойлимайсиз»,— дәп ейтиду 21 яшлиқ Джереми.

  23 яшлиқ Елена униң пикригә қошулуп, мундақ дәйду: «Электронлуқ қурулмилар арқилиқ анчә көп ишларни қилалмайсиз. Әксинчә, улар сизни һәқиқий һаяттин жирақлаштуриду екән. Шуңа қурулмиңизни бир чәткә елип қойғанда, қайтидин зерикиш һис қилисиз».

• Вәзийәткә болған көзқаришиңизни өзгәртиң

  Зерикишниң бар-йоқлуғи ишниң аз яки көп екәнлигигә бағлиқ әмәс, шуғуллиниватқан ишиңизға қизиқиш көрситишиңизгә бағлиқ. Карен исимлиқ яш қиз мундақ дәйду: «Гәрчә күн бойи қилидиған иш көп болсиму, мәктәптә маңа зерикишлик болған. Зерикип кәтмәслигиңиз үчүн сиз бирәр ишқа қизиқип, бешиңиз билән киришип кетишиңиз керәк».

Биләмсиз? Қолуңиз бош болған вақит әслидә иҗаткарлиқ иқтидарини өстүрүшкә ярдәм бериду.

Немиләрни қилсиңиз болиду?

Қизиқишлириңизни көпәйтиң. Йеңи достларни тепиң. Сизни қизиқтуридиған йеңи иш билән шуғуллиниң. Йеңи мавзулар һәққидә издиниң. Адәттә һәр түрлүк нәрсигә қизиқидиған адәм һәтта ялғуз болсиму, зерикип кәтмәйду!

Муқәддәс китаптики принцип: «Қилалайдиған ишлириңни амалиңниң баричә тиришип қилғин» (Вәз 9:10, ҺЗ).

«Йеқинда хитай тилини үгинишни башлидим. Һәр күни у тилда сөзләп мәшиқләнгәндә, өзүмдин немишкиду мән буни бурун үгәнмәй жүрдүм дәп сораймән. Мән бирәр мәхсәтни қоюп, шуниңға йетишни яхши көримән. Бу зеһнимни жиғип, вақтимни үнүмлүк ишлитишимгә ярдәм бериду» (Мелинда).

Бар диққитиңизни көзлигән мәхситиңизгә қоюң. Қилмақчи болған ишиңизниң мәхситини яхши чүшәнсиңиз, униңға болған қизиқишиңиз ашурулиду. Әгәр қандақту бир мәхсәткә интилсиңиз, һәтта мәктәптики дәрисләрму зерикәрлик болмайду.

Муқәддәс китаптики принцип: «Адәм үчүн... җапалиқ ишләп еришкән нәтиҗилиридин раһәтлиништин артуқ хошаллиқ йоқтур» (Вәз 2:24, ҺЗ).

«Мәктәпни пүтиришимгә аз қалғанда, һәр күн сәккиз саат оқуп жүрдүм. Чүнки бурун оқуп үлгәрмигән материалларни оқушқа тириштим. Зерикәрлик болдиму? Яқ, мәктәпни пүтириш мәхситим бар диққитимни оқушқа ағдурушқа дәвәт қилди». (Һанна)

Вәзийәтни өзгәртәлмисиңиз, униңға маслишиң. Һәтта әң қизиқарлиқ ишларму зерикәрлик туюлиши мүмкин. Һәтта әң йеқин достлириңиз түзүлгән планлириңизни йоққа чиқирип, сиз немә қилишни билмәй қелишиңиз мүмкин. Вәзийәтниң қурбини болуп, сәлбий һис-туйғуларға берилишниң орниға, иҗабий көзқараш билән һәрикәт қилиң.

Муқәддәс китаптики принцип: «У көңлини шат тутса дайим зияпәттә болғандәктур» (Пәнд-нәсиһәтләр 15:15, ҺЗ).

«Достум мени ялғуз қалған пәйтлиримдиму хошаллиқ тепишни үгинишкә дәвәт қилди. Униң ейтишичә, һәрбир киши һаяттики муһим бир маһарәтни ашуруши керәк. Бу башқилар билән вақит өткүзүш вә ялғуз қелишниң оттурисидики тәңпуңлуқни сақлашни үгиниш» (Айви).